އިޒްރޭލުން ފަލަސްތީންގެ ޣައްޒާ އަށް އަރާ ހަމަލާތައްދީ ކުށެއް ނެތް މީހުން މަރަމުންދާތާ 12 މަސް ހޮނިހިރު ދުވަހާ ހަމައަށް ވެފައިވާއިރު، ހަނގުރާމަ ހުއްޓުމުގެ ކޮޅެއް އަދި ފެންނާކަށް ނެތެވެ.

ހަމާސްއިން ޝަރުތުކުރަނީ އިޒްރޭލުގެ ހުރިހާ ސިފައިން ފަލަސްތީނުން ބޭލުމަށެވެ. ނަމަވެސް، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ޣައްޒާ އާއި މިޞްރުގެ ބޯޑަރުގެ ސަރަޙައްދެއްގައި އިޒްރޭލުގެ ސިފައިން ބަހައްޓާނެކަމަށް ބުނެފައެވެ.

އިޒްރޭލުން ފަލަސްތީނުގައި ހިންގަމުންދާ ގަތުލުއާންމަށް 12 މަސްވެފައިވާ ކަން ފާހަގަކުރަމުން އދ. އިން ފަލަސްތީނުގެ ރެފިއުޖީންނަށް ހާއްސަކޮށްފައިވާ ޖަމިއްޔާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ (އަންރްވާ) ގެ ޗީފް ފިލިޕް ލަޒަރިނީ ވިދާޅުވެފައިވަނީ "މިހާރު މިވަރުން ފުދިއްޖެ. މިކަން އިތުރަށް ދެމިގެންދިއުމަކީ އެއްވެސް ފަރާތަކަށް ބަރުދާސްތުކުރެވޭނެ ކަމެއް ނޫން. މިއީ އިންސާނިއްޔަތުކަމަށް އިސްކަންދޭންވީ ވަގުތު،" ކަމަށެވެ. އޭނާ ވަނީ އިޒްރޭލުން ފަލަސްތީނުގައި ހިންގާ އުދުވާން ނިންމުމަކަށް ގެނެސް، މިހާރުން މިހާރަށް ހަނގުރާމަ ހުއްޓުމަށް ގޮވާލާފައެވެ.

އެމެރިކާ، ޤަޠަރު އަދި މިސްރުން އަންނަނީ ހަނގުރާމަ ހުއްޓުމަކަށް ގެނައުމަށްޓަކައި މަސައްކަތްކުރަމުންނެވެ.

އެމެރިކާގެ ސްޓޭޓް ސެކްރެޓަރީ އެންޓަނީ ބްލިންކެން ވިދާޅުވެފައިވަނީ "ހަނގުރާމަ ހުއްޓުމުގެ އެއްބަސްވުމަށް %90 އެއްބަސްވެވިފައިވާ" ކަމަށެވެ. މިކަން ދޮގުކުރަމުން އިޒްރޭލުގެ ހައްދުފަހަނަ އަޅާފައިވާ ބޮޑުވަޒީރު ބެންޖަމިން ނަތަންޔާހޫ ފޮކްސް ނިއުސްއަށް ދިން އިންޓަވިއުއެއްގައި ވިދާޅުވެފައިވަނީ "އެއްބަސްވުމަކާ ގާތްވެސް ނުވާ،" ކަމަށެވެ.

ފަލަސްތީނު ޕްރިޒަނަރސް ސޮސައިޓީގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި މަދުވެގެން 9،900 ފަލަސްތީނު މީހުން އިޒްރޭލުގެ ޖަލުތަކުގައި ބަންދުކޮށްފައި އެބަތިއްބެވެ.

އިޒްރޭލުން ޣައްޒާއަށް ދެމުންދާ ހަމަލާތަކުގައި މިހާތަނަށް މަދުވެގެން 40،939 މީހުން ޝަހީދުވެ، 94،616 މީހުން ވަނީ ޒަޚަމްވެފައިވެއެވެ. ޝަހީދުވި މީހުންގެ ތެރެއިން ގިނައީ އަންހެނުންނާއި ކުޑަކުދިން ކަމަށް އދ. ގެ އިންސާނީ ޙައްޤުތަކާބެހޭ އޮފީހުގެ ރިޕޯޓުތަކުން ހާމަވެއެވެ.

ކޮންމެ ދުވަހަކު އެތައް ފަލަސްތީން މީހުން އިޒްރޭލުގެ ހަމަލާތަކުގައި ޝަހީދުވަމުން ދާއިރު ހަނގުރާމަ އަށް އަވަސް ނިމުމެއް އަތުވެދާނެ ކަމުގެ އެއްވެސް ކޮޅެއް ފެންނާކަށް ނެތެވެ.