ނ.ހެނބަދޫ ކައުންސިލްގެ ރައީސް ހުސެއިން އަބޫބަކުރު އެމްޑީޕީން ވަކިވެ އެމްޑީއޭ އަށް

ނ.ހެނބަދޫ ކައުންސިލްގެ ރައީސް ހުސެއިން އަބޫބަކުރު އެމްޑީޕީން ވަކިވެ އެމްޑީއޭ އަށް ސޮއިކުރައްވައިފިއެވެ.

އެކަން އިއުލާނު ކުރައްވައި އެމްޑީއޭގެ ނައިބްރައީސް މުހައްމަދު އައްބާސް ވިދާޅުވީ، ހުސެއިން އަބޫބަކުރު އެމްޑީޕީން ވަކިވެ އެމްޑީއޭ އަށް ސޮއިކުރައްވާފައިވާ ކަމަށާއި، މީގެ އިތުރުން ނ.ހެނބަދޫގެ ގިނަ ރައްޔިތުން ތަކެއް އެމްޑީއޭ އާ ގުޅިފައިވާ ކަމަށެވެ.

އެކަމާ ގުޅިގެން އެންޓި ޑިފެކްޝަން ޤާނޫނުގެ ދަށުން އޭނާގެ އިންތިހާބީ މަގާމު ގެއްލިފައިވާ ކަމަށް ބުނެ އިލެކްޝަން ކޮމިޝަން (އީސީ) އަށް އަމިއްލަ ފަރާތަކުން މައްސަލަ ހުށަހަޅާފައިވާކަމަށް މީޑިއާތަކުން ވަނީ ރިޕޯޓު ކޮށްފައެވެ.

އެންޓި-ޑިފެކްޝަން ގާނޫނަކީ، ދިވެހިރާއްޖޭގައި ހިންގަމުންދާ މަލްޓި-ޕާޓީ ސިސްޓަމްގެ ދަށުން، ވަކި ސިޔާސީ ޕާޓީއެއްގެ ޓިކެޓްގައި ވާދަކޮށްގެން ރައްޔިތުންގެ މަޖިލީހަށާއި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމަށް ޤާއިމުކޮށްފައިވާ ސިޓީ ކައުންސިލްތަކަށާއި، އަތޮޅު ކައުންސިލްތަކަށާއި، ރަށު ކައުންސިލްތަކަށާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް އިންތިޚާބުވުމަށްފަހު، އެ އިންތިޚާބުވި ދައުރުގެ ތެރޭގައި، އިންތިޚާބުވި ޕާޓީގެ މެންބަރުކަމުން އެ މީހަކު ވަކިކޮށްފިނަމަ، ނުވަތަ އަމިއްލައަށް ވަކިވެއްޖެނަމަ، ނުވަތަ އެހެން ޕާޓީއެއްގެ މެންބަރަކަށް ވެއްޖެނަމަ، ނުވަތަ އަމިއްލަ ގޮތުން އިންތިޚާބުވެފައިވާ މެންބަރަކު އެ މީހަކު އިންތިޚާބުވި ދައުރުގެ ތެރޭގައި ސިޔާސީ ޕާޓީއެއްގެ މެންބަރަކަށް ވެއްޖެނަމަ އެފަދަ މެންބަރެއްގެ ގޮނޑިއާމެދު އަމަލުކުރާނޭ ގޮތް ކަނޑައެޅުމާއެކު، އެފަދައިން ގޮނޑި ހުސްވާ ހާލަތްތަކުގައި ބައި-އިލެކްޝަން ބޭއްވުމާގުޅޭ އުސޫލުތަކާއި އިޖުރާއަތުތައް ބަޔާންކުރުމުގެ ގާނޫނެވެ.