އަންހެނަކު ރަހީނުކޮށް އަނިޔާކުރި މައްސަލައިގައި ފުލުހުންގެ ބެލުމުގެ ދަށަށް ގެންގޮސްފައި ހުއްޓާ މަރުވެފައިވާ ށ.މިލަންދޫ، ހެޕީލޭންޑް، އާދަމް އަޠުހަރު ހައްޔަރުކުރުމާއި، އޭނާ އަށް ސިއްހީ ފަރުވާ ދިނުން އަދި އޭނާ މަރުވި ގޮތުގެ މައްސަލަ ބަލަމުންދާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބުނެފިއެވެ.
އެޗްއާރްސީއެމުން ބުނީ ހޯމަ ދުވަގެ ހަވީރުގެ ވަގުތެއްގައި އިންދިރާ ގާންދީ މެމޯރިއަލް ހޮސްޕިޓަލުގައި ފަރުވާ ދެމުން ދަނިކޮށް ނިޔައުވި ށ.މިލަންދޫ، ހެޕީލޭންޑް، އާދަމް އަޠުހަރު 2024 އޮގަސްޓް 29 ވަނަ ދުވަހުގެ ރޭގަނޑު އޭނާ ފުލުހުންގެ ބެލުމުގެ ދަށަށް ގެނައުމަށް މަސައްކަތްކުރުމުގެ ތެރޭގައި ދިވެހި ފުލުހުންގެ ޚިދުމަތުގެ އޮފިސަރުން ބާރުގެ ބޭނުންކޮށްފައިވާގޮތް ބަލަމުންދާ ކަމަށެވެ. އަދި މި ހާދިސާއާ ގުޅިގެން އަނިޔާ ލިބުނު ފަރާތް ތަކަށް އެރޭ ބޭސްފަރުވާ ފޯރުކޮށްދިނުމުގައި ދިވެހި ފުލުހުންގެ ޚިދުމަތުން އަމަލުކޮށްފައިވާ ގޮތް ވެސް ބަލާނެ ކަމަށް އެޗްއާރްސީއެމުން ވަނީ ބުނެފައެވެ. ހަމައެހެންމެ މި ހާދިސާގައި ދިވެހި ފުލުހުންގެ ޚިދުމަތުގެ ބެލުމުގެދަށަށް އާދަމް އަޠުހަރު ގެންދިއުމަށްފަހު އޭނާއަށް ސިއްޙީ ފަރުވާ ފޯރު ކޮށްދިނުމުގައި ދިވެހި ފުލުހުންގެ ޚިދުމަތުން އަމަލު ކޮށްފައިވާ ގޮތް ހާދިސާ ހިނގި ރެއިން ފެށިގެން އެ ކޮމިޝަނުން ބަލަމުންދާ ކަމަސް ވަނީ ބުނެފައެވެ. މީގެއިތުރުން، ދިވެހި ފުލުހުންގެ ޚިދުމަތުގެ ބެލުމުގެ ދަށުގައި އާދަމް އަޠުހަރު ވަނިކޮށް 2024 ސެޕްޓެމްބަރު 01 ވަނަ ދުވަހު އާދަމް އަޠުހަރު އަމިއްލައަށް މަރުވާން އުޅުނު ހާދިސާއާ ގުޅޭ މަޢުލޫމާތު ދިވެހި ފުލުހުންގެ ޚިދުމަތުގެ ފަރާތުން މި ކޮމިޝަނުގެ ސަމާލުކަމަށް ގެނެސްފައިވާ ކަމަށް އެ ކޮމިޝަނުން ވަނީ ބުނެފައެވެ. އަދި އެ ވަގުތުން ފެށިގެން ކޮމިޝަނުގެ ރެޕިޑް ރެސްޕޮންސް ޓީމުން ހަރަކާތްތެރިވެ މިކަމާ ގުޅުންހުރި މައުލޫމާތުތައް އެއްކޮށް މި މައްސަލަ ވެސް ކޮމިޝަނުން ބަލަމުންދާކަމުގައި ދަންނަވަމެވެ. ހަމަ އެހެންމެ، ދިވެހި ފުލުހުންގެ ޚިދުމަތުގެ ބެލުމުގެ ދަށުގައި ހުއްޓާ އާދަމް އަޠުހަރު ނިޔާވި މައްސަލައިގައި ކަން ހިނގާ ދިޔަ ގޮތް ވެސް ކޮމިޝަނުން ބަލަމުންދާކަމަށް އެ ކޮމިޝަނުން ވަނީ ބުނެފައެވެ.
ފުލުހުން ބުނީ އޭނާ މަރުވީ އިންދިރާގާނދީ މެމޯރިއަލް ހޮސްޕިޓަލުގައި ފަރުވާދެމުން ދަނިކޮށް ކަމަށެވެ. އޭނާ ނިޔާވީ ހޯމަ ދުވަހުގެ 16:08 އެހާކަށް ހާއިރު ކަމަށް ފުލުހުން ވަނީ އައިޖީއެމްއެޗާއި ހަވާލާދީ ބުނެފައެވެ. އަތުހަރު އަށް އަައިޖީއެމްއެޗްގައި ފަރުވާދީފައިވަނީ ފުލުހުންގެ ބެލުމުގެ ދަށުގައި ދޫނިދޫގައި ހުއްޓާ އާދިއްތަ ދުވަހުގެ ރޭގެ ވަގުތެއްގައި އޭނާ ބަންދުގަ ހުރި ޖަލުގައި އޭނާ ދަންޖެހުމާއި ގުޅިގެންނެވެ. އޭނާ ނިޔާވި މައްސަލަ ދިވެހި ފުލުހުންގެ ޚިދުމަތުން ދަނީ ތަހުގީގުކުރަމުންނެވެ. އަދި އޭނާ މަރުވި ސަބަބު ދެނެގަތުމަށް އޮޓޮޕްސީ އެއް ހަދަން ނިންމާފައިވާކަމަށް ފުލުހުން ވަނީ ބުނެފައެވެ. އަދި މި މައްސަލަ އާއި ގުޅިގެން މިނިވަން މުއައްސަސާތަކުން ކުރާ ތަހުގީގަށް ފުރިހަމަ އަށް އެއްބާރުލުން ދޭނެ ކަމަށް ފުލުހުން ވަނީ ބުނެފައެވެ.
