ނޭޕާލަށް ކުރަމުންދާ ވިއްސާރާގައި މަރުވި މީހުންގެ އަދަދު 70 އަށް އަރައިފި

ނޭޕާލަށް ކުރަމުންދާ މޫސުމީ ވިއްސާރަގައި މިހާތަނަށް މަރުވި މީހުންގެ އަދަދު 70 އަށް އަރައިފި ކަމަށް ރިޕޯޓުތައް ބުނެފިއެވެ.

ބޯކޮށް ވާރޭ ވެހި ބިންގަނޑުކަނޑައިގެން ދިއުމުގެ ހާދިސާތަކުގައި މަރުވި މީހުންގެ އަދަދު 70 އަށް އެރިއިރު އެތައް ހާސް ބަޔަކު ގެދޮރު ދޫކޮށް ދާން ޖެހިފައިވާ ކަމަށް ވެސް އޮފިޝަލުން ބުނެއެވެ.

ނޭޕާލުގެ 75 ޑިސްޓްރިކްޓްގެ ތެރެއިން 26 ޑިސްޓްރިކްޓެއް ވަނީ ފެނު އަޑީގައި ނުވަތަ ބިންގަނޑު ކަނޑައިގެން ދިޔުމުގެ ހާދިސާތަކާއި ކުރިމަތިލާން ޖެހިފައެވެ.

ރެޑް ކްރޮސް އިން ހާމަކުރާގޮތުން ނޭޕާލަށް މިހާރު ކުރަމުންދާ ވިއްސާރާއިގެ އަސަރު 100،000 މީހުންނަށް ކޮށްފައިވެއެވެ.

މީހުން ސަލާމަތް ކުރުމުގެ މަސައްކަތުގައި ފުލުހުންނާއި، ސިފައިންނާއި އަދި އާންމުން ދަނީ ހަރަކާތްތެރި ވަމުންނެވެ.

ނޭޕާލަށް ޖޫން އިން ފެށިގެން ސެޕްޓެމްބަރު މަހާ ހަމައަށް ކުރާ މޫސުމީ ވިއްސާރަ އަކީ ދަނޑުގޮވާން ކުރުމަށް ބަރޯސާވާ ނޭޕާލަށް މުހިންމު ވިއްސާރައެކެވެ. އެހެން ނަމަވެސް ކޮންމެ އަހަރަކު ވެސް ވިއްސާރައިގެ ސަބަބުން ނޭޕާލަށް ބޮޑެތި ގެއްލުން ލިބެއެވެ.