ހުޅަނގު އައްސޭރީގައި އިޒްރޭލުގެ ހަމަލާތައް އިތުރުވުމާއެކު، މަހްމޫދު އައްބާސްގެ ސައުދީ ދަތުރުފުޅު ކުރުކޮށްލައްވައިފި

ހިފާފައިވާ ހުޅަނގު އައްސޭރީގެ އެކި ސަރަހައްދުތަކަށް އިޒްރޭލް ސިފައިން އަރާ ދެމުންދާ ހަމަލާތައް އިތުރުވުމާއެކު ފަލަސްތީނުގެ ރައީސް މަޙްމޫދު އައްބާސް ސައޫދީ އަރަބިއްޔާއަށް ކުރެއްވި ދަތުރުފުޅު ކުރުކޮށްލައްވާ ފަލަސްތީނަށް އެނބުރި ވަޑައިގެންފިއެވެ.

ސައުދީ ނޫސް އެޖެންސީ (އެސްޕީއޭ) އިން އަންގާރަ ދުވަހު ރިޕޯޓުކުރި ގޮތުގައި، ސައުދީ ޢަރަބިއްޔާގެ ވަލީ ޢަހުދު މުޙައްމަދު ބިން ސަލްމާން ވަނީ ފަލަސްޠީނުގެ ރައީސް މަޙްމޫދު ޢައްބާސްއާ ރިޔާޟުގައި ބައްދަލުކުރައްވާފައެވެ. މި ބައްދަލުވުމުގައި ޣައްޒާއާއި އެ ސަރަޙައްދުގައި އިޒްރޭލުން ކުރިއަށްދާ ހަނގުރާމައިގެ ޙާލަތާ ބެހޭގޮތުން މަޝްވަރާކުރެވުނެވެ.

އެސްޕީއޭ އިން އިތުރަށް ބުނެފައިވާ ގޮތުގައި، މި ބައްދަލުވުމުގައި ވަލީޢަހުދު ވަނީ މަސްރަހް ފިނިކުރަން ބައިނަލްއަޤްވާމީ އަދި ސަރަޙައްދީ ފަރާތްތަކާއެކު މަސައްކަތްކުރުމަށް ސައުދީ ޢަރަބިއްޔާ އިން ތައްޔާރަށް އޮތްކަން އައްބާސް އަށް ދަންނަވާފައެވެ. އަދި ފަލަސްޠީނު ރައްޔިތުންގެ ޙައްޤުތަކަށާއި، ގަދަރުވެރި ދިރިއުޅުމަކަށާއި، ޢަދުލުވެރި އަދި ދެމެހެއްޓެނިވި ސުލްޙައަކަށް ކުރާ މަސައްކަތުގައި ސައުދީ ޢަރަބިއްޔާއިން އެހީތެރިކަން ދޭނެ ކަމަށް ވަލީ އަހްދު ވަނީ ވިދާޅުވެފައެވެ.

ހުޅަނގު އައްސޭރީގެ އެކި އަވަށްތަކަށް އިޒްރޭލު ސިފައިން އަރާ ދެމުންދާ ހަމަލާތަކުގައި މިހާތަނަށް ފަލަސްތީނުގެ 10 މީހުން ޝަހީދު ވެފައިވާ ކަމަށް ރެޑްކްރެސެންޓް އިން ބުނެފައިވެއެވެ.

ރެޑް ކްރެސެންޓުގެ ތަރުޖަމާނު އަޙްމަދު ޖިބްރީލް އާ ހަވާލާދީ މީޑިއާ ރިޕޯޓްތައް ބުނާ ގޮތުގައި، އިޒްރޭލުގެ ހަމަލާތަކުގައި ޖެނީން ސިޓީން ދެ މީހުން ޝަހީދުވެފައިވާއިރު، ޖެނިން ކައިރީގައި އޮންނަ އަވަށަކުން އިތުރު ހަތަރު މީހުން ޝަހީދުވެފައިވެއެވެ. އަދި ތޫބާސް ޓައުން އާ ކައިރީގައި ވާ ރެފިއުޖީ ކޭމްޕެއްގައި އިތުރު ހަތަރު މީހުން ވަނީ ޝަހީދުވެފައެވެ.

އިޒްރޭލުގެ އަސްކަރީ ތަރުޖަމާނު ބުނެފައިވަނީ، އިޒްރޭލުގެ ބާރުތަކުން ޖެނީނާއި ތުލްކަރަމްގައި އަސްކަރީ އޮޕަރޭޝަނެއް ފަށާފައިވާ ކަމަށެވެ.