އިސްރާއީލުގެ ނެޝަނަލް ސެކިއުރިޓީ މިނިސްޓަރ އިޓަމާރ ބެން ގްވިރް މަރާލުމަށް ރޭވުމެއްގައި ބައިވެރިވުމެއް އޮތްކަން ކަމަށް ބުނާ ރިޕޯޓުތައް ތުރުކީން ދޮގު ކޮށްފިއެވެ.

އިސްރާއީލުގެ މީޑިއާގައި ފެތުރުނު މި ވާހަކަތަކަކީ އެ ގައުމާ ދެކޮޅަށް "ގަސްތުގައި ހިންގޭ ދޮގު މަޢުލޫމާތު ފެތުރުމުގެ ކެމްޕޭނެއް،" ކަމުގައި ތުރުކީން ވަނީ ބުނެފައެވެ.

"އިސްރާއީލުގެ މިނިސްޓަރަކު މަރާލުމުގެ ރޭވުމަކާ ގުޅޭ ގޮތުން އިސްރާއީލުގެ މީޑިއާގެ ބައެއް ރިޕޯޓުތަކުގައި [ތުރުކީ] އާ ގުޅުވައި ދައްކާފައިވާ ވާހަކަތަކަކީ އަޅުގަނޑުމެންގެ ގައުމާ ދެކޮޅަށް ގަސްތުގައި ހިންގޭ ދޮގު މަޢުލޫމާތު ފެތުރުމުގެ ކެމްޕޭނެއްގެ ނަތީޖާއެކެވެ،" ތުރުކީގެ ރައީސްގެ އޮފީހުން ނެރުނު ބަޔާނެއްގައި ބުނެފައިވެއެވެ.

އިސްރާއީލުގެ ޝިން ބެޓް ޑޮމެސްޓިކް އިންޓެލިޖެންސް ސަރވިސް އިން ބުދަ ދުވަހު ބުނެފައި ވަނީ، ހަމާސްގެ މިފަފަ ހަމަލާއެއް ނާކާމިޔާބު ކޮށްލާފައިވާ ކަމަށެވެ. މި ހަމަލާގައި ގޮވާ ޒާތުގެ ޑްރޯންތަކެއް ބޭނުންކޮށްގެން އިސްރާއީލު ސަރުކާރުގެ ހައްދުފަހަނަ އެޅި ކަނާތުފިޔައިގެ ވަޒީރަކަށް އަމާޒުކޮށް ހަމަލާދޭން ރޭވިކަމަށް ބުނެފައިވެއެވެ.

ޝިން ބެޓުން ބުނެފައިވާ ގޮތުގައި، ތުރުކީގައި ހަމާސްގެ މައި މަރުކަޒެއް ހިންގާ ކަމަށް ޝައްކުކުރެވޭ ސެލްއެއްގެ މެންބަރުން އިސްރާއީލުން ހިސޯރު ކޮށްފައިވާ ވެސްޓް ބޭންކުން ވަނީ ހައްޔަރު ކޮށްފައެވެ.

"ތުރުކީ ގައި ހުރި ހަމާސް ގެ އޮފީހުން ފައިސާ ދީގެން ހިންގި މި ސެލް އިން ހެދި ޓެސްޓެއް ފެއިލްވުމާ ގުޅިގެން މި ރޭވުން ދޫކޮށްލާފައިވާ ކަމަށް" ޖެރޫސަލަމް ޕޯސްޓުން ބުރާސްފަތި ދުވަހު އެކްސްގައި ބުނެފައިވެއެވެ.

ނަމަވެސް، ތުރުކީގެ ބަޔާނުގައި ފާހަގަ ކޮށްފައިވާ ގޮތުގައި، މިކަމުގެ ތުހުމަތުގައި ހައްޔަރު ކުރެވުނު މީހުން ސާފުކޮށްދީފައި ވަނީ އެމީހުންނާ ތުރުކީ އާ އެއްވެސް ގުޅުމެއް ނެތް ކަމަށެވެ. އަދި ރެޑް ކްރޮސްގެ އޮފިޝަލުންވެސް މިކަން ކުރިން ކަށަވަރު ކޮށްދީފައިވާ ކަމަށް ބުނެފައިވެއެވެ.

"މި ނޫސް ރިޕޯޓުތަކުގެ އަސްލު މަޤްޞަދަކީ ބައިނަލްއަޤްވާމީ މުޖުތަމަޢުގައި [ތުރުކީ] އާ ދެކޮޅަށް ގަސްތުގައި އޮޅުވާލައިގެން ދޮގު ތަސައްވުރެއް އުފެއްދުމާއި، އެގޮތުން [ތުރުކީ] އިން ގެންގުޅޭ ފަލަސްޠީނާ ބެހޭ ސިޔާސަތަށް ގެއްލުން ދިނުމެވެ،" ބަޔާނުގައި އިތުރަށް ބުނެފައިވެއެވެ.

ޣައްޒާ އަށް ވަގުތުން އިންސާނީ އެހީ ވެއްދުމަށާއި ހަނގުރާމަ ދާއިމީ ކޮށް ހުއްޓުމަކަށް ގެނައުމަށް ގޮވާލައި، މިދިޔަ އަހަރުގެ މޭ މަހު އިސްރާއީލާއެކު އޮންނަ ސީދާ ގުޅުންތައް ކަނޑާލުމަށް ފަހު، ތުރުކީން އޯގަސްޓް މަހު ޣައްޒާގައި ހިނގަމުންދާ ހަނގުރާމައާ ދެކޮޅަށް އިހުތިޖާޖު ކުރުމުގެ ގޮތުން އިސްރާއީލުގެ މަތިންދާބޯޓުތަކަށް އެ ގައުމުގެ ވައިގެ ސަރަހައްދު ބަންދުކޮށްފައި ވެއެވެ.

"އަޅުގަނޑުމެން އިސްރާއީލާއެކު ވިޔަފާރި މުޅިން ހުއްޓާލައިފިން. އަޅުގަނޑުމެންގެ އުޅަނދުތައް އިސްރާއީލުގެ ބަނދަރުތަކަށް ދިއުމަށް ހުއްދައެއް ނުދެން. އެމީހުންގެ މަތިންދާބޯޓުތައް އަޅުގަނޑުމެންގެ ވައިގެ ސަރަހައްދަށް ވަނުމަށް ހުއްދައެއް ނުދެން،" ފޮރިން މިނިސްޓަރ ހަކަން ފިދާން އަންކާރާގައި ބޭއްވުނު ޣައްޒާއާ ގުޅޭ ޚާއްޞަ ޕާލިމެންޓަރީ ބަހުސެއްގައި ވިދާޅުވެފައިވެއެވެ.