ވެސްޓް ބޭންކުގެ މިސްކިތެއްގައި ޔަހޫދީން ހުޅު ޖަހައި، ގެއްލުން ދީފި

ގަދަކަމުން ވެސްޓް ބޭންކުގައި ވަޒަންވެރިވެގެން އުޅޭ ޔަހޫދީންގެ ބަޔަކު ވެސްޓް ބޭންކުގައި މިސްކިތެއްގައި އަލިފާން ރޯކޮށް މިސްކިތުގެ ތެރެއަށް ގެއްލުން ދީފި އެވެ.

މިއީ ފަލަސްޠީނުގެ ރައްޔިތުންނާ ދެކޮޅަށް ރަށްވެހިން ހިންގާ އަނިޔާވެރި ޢަމަލުތަކުގެ ތެރެއިން އެންމެ ފަހުން ބުރާސްފަތި ދުވަހު ހިންގި ހާދިސާއެވެ.

ފަލަސްޠީނުގެ ރަސްމީ ނޫސް އޭޖެންސީ ވަފާއިން، ރިޕޯޓުކުރި ގޮތުގައި، މިސްކިތައް ހަމަލާ ދިނީ ބުރާސްފަތި ދުވަހުގެ ފަތިހުގެ ވަގުތުގައެވެ.

ޙައްޖާ ޙަމީދާ މިސްކިތުގައި ރޯކޮށްލީ މިސްކިތުގެ ދޮރުމައްޗަށް އަލިފާން ހިފާ މާއްދާއެއް އަޅައި ގެން ކަމަށް ރިޕޯޓު ކޮށްފައި ވެއެވެ.

މިސްކިތުގެ ހުރިހާ ތަނަކަށް އަލިފާން ފެތުރުނަ ނުދިނުމަށް އެ ސަރަހައްދުގެ މީހުން މަސައްކަތް ކޮށްފައިވެއެވެ.

މީގެއިތުރުން، މިސްކިތުގެ ފާރުތަކުގައި ޢަރަބިންނާއި މުސްލިމުންނާ ދެކޮޅު ނަސްލީ ތަފާތުކުރުމުގެ ޝިޢާރުތައް ސްޕްރޭ ކޮށްފައި ވެއެވެ.

އިޒްރޭލުގެ ބާރުތަކުން ފާއިތުވި މަހު ވެސްޓް ބޭންކުގައި ޖުމްލަ 1,584 ހަމަލާ ދީފައިވެއެވެ. މީގެ ތެރޭގައި ސީދާ ޖިސްމާނީ ގޮތުން ދެވުނު ހަމަލާތަކާއި، ގެދޮރު ތަޅާލުމާއި، އަދި ޒައިތޫނި ގަސްތައް އުފުރާލުން ފަދަ ޖަރީމާތައް ހިމެނެއެވެ.

އެންމެ ގިނައިން އަނިޔާވެރިކަން ތަޙައްމަލުކުރަން ޖެހުނު ސަރަޙައްދުތަކަކުގެ ތެރޭގައި ރާމަﷲ، ނާބްލުސް، އަދި އަލް-ޚަލީލް ސަރަޙައްދު ހިމެނެއެވެ.

ޖުލައި 2024 ގައި، އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން، ކުރި ހުކުގައި ވެސްޓް ބޭންކު ގަދަ ކަމުން ހިފައިގެން އިޒްރޭލުން ތިބި ތިބުމަކީ ޣައިރު ގާނޫނީ ކަމެއް ކަމަށް ވަނީ ކަނޑައަޅާފަ އެވެ.

ވެސްޓް ބޭންކާއި އިރުދެކުނު އަލް-ޤުދުސް ގައި ހުރި ހުރިހާ ސެޓްލްމަންޓްތައް ހުސްކުރުމަށް ވެސް އައިސީޖޭ އިން ވަނީ ގޮވާލާފަ އެވެ.

ކޯޓުގެ އެޑްވައިޒަރީ އޮޕީނިއަން އަކީ ގާނޫނީ ގޮތުން ތަންފީޒު ކުރުން ލާޒިމު އެއްޗެއް ނޫން ނަމަވެސް، 57 އަހަރުގެ ހިސޯރު ކުރުމުގެ ގާނޫނީ ހައިސިއްޔަތާ ބެހޭ ގޮތުން އައިސީޖޭ އިން ނިންމި ނިންމުމަކީ ތާރީޚީ މުހިންމު ނިންމުމެއްގެ ގޮތުގައި ގިނަ ގައުމުތަކުން ބަލައިގަނެ އެވެ.