ވެސްޓް ބޭންކަކީ އިސްރާއީލްގެ ބިމަކަށް ހަދާނެ ކަމަކަށް ނުދެކެން؛ ރޫބިއޯ

އިސްރާއީލް އިން، ވެސްޓް ބޭންކަކީ އެ ޤައުމުގެ އަމިއްލަ ބިމަަކަށް ހަދާނެ ކަމަށް ނުދެކޭ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ.

ރޫބިއޯ މިހެން ވިދާޅުވެފައި ވަނީ ވެސްޓް ބޭންކުގައި އާާބާދުވުމަށް އިސްރާއީލް ނިންމާފައިވާ ޕްލޭން މިދިޔަ ހަފުތާގެ ތެރޭގައި ފާސްކޮށްފައި ވަނިކޮށް، އެކަމާ ގުޅޭ ގޮތުން ވާހަކަ ދައްކަވަމުންނެވެ.

ހުކުރު ދުވަހު ވާހަކަ ދައްކަވަމުން ރޫބިއޯ ވިދާޅުވެފައި ވަނީ އިސްރާއީލްގެ ޤާނޫނު ހަދާ މަޖިލީހުގައި ނެގުނު ވޯޓަކީ ސިޔާސީ ވޯޓެއް ކަމަށެވެ. އެގޮތުން އެއީ އެމެރިކާގެ ނައިބު ރައީސް ޖޭޑީ ވޭންސް އާއި، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ "ދެރަކޮށްލުމަށް" ނެގުނު ވޯޓެއް ކަމަށް ރޫބިއޯ ވަނީ ވިދާޅުވެފަ އެވެ.

އިސްރާއީލްގެ ދެކުނު ހުޅަނގުގައި ހުންނަ އެމެރިކާ އިން އިސްކޮށް ހިންގާ ސިވިލް މިލިޓަރީ ކޯޑިނޭޝަން ސެންޓަރަށް ކުރެއްވި ޒިޔާރަތުގައި ރޫބިއޯ ވިދާޅުވީ، އެކަން އެގޮތަށް ހިނގާނެ ކަމަށް އެމެރިކާ އަދި އޭނާ ވެސް ނުދެކޭ ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް ރޫބިއޯ ދެއްވާފައި ނުވެ އެވެ.

ޣައިރު ޤާނޫނީ ގޮތުން ވެސްޓް ބޭންކުގައި އާބާދުވުމަށް އިސްރާއީލްގެ ޕްލޭނަށް މިދިޔަ ހަފުތާގެ ތެރޭގައި ހުއްދަ ދީފައިވާއިރު، އެކަމަކީ ބައިނަލްއަޤުވާމީ މުޖުތަމައުން އިންތިހާ އަށް ކަންބޮޑުވުން ފާޅު ކޮށްފައިވާ ކަމެކެވެ. އިސްރާއީލްގެ ސަރުކާރުން ހުއްދަ ދީފައި ވަނީ، އެ ޤައުމުން ވެސްޓް ބޭންކާއި، އިރުމަތީ ޖެރޫސަލަމް ވަކި ކޮށްލައިި، ފަލަސްޠީނުގެ ބިން ދެބައި ކޮށްލާ ފަދަ، އާބާދުވުމުގެ މަޝްރޫއު އަކަށެވެ.

"އީ1"ގެ ނަމުން މަޝްހޫރު މި ސަރަހައްދުގައި އާބާދީ ވުމުގެ މަސައްކަތް މިހާތަނަށް ހުއްޓިފައި ހުއްޓިފައި އޮތީ، ފާއިތުވި 20 އަހަރުގެ ތެރޭގައި ބައިނަލްއަޤުވާމީ މުޖުތަމައުން އެކަމާ ދެކޮޅު ހަދަމުން އަންނާތީ އެވެ. ނަމަވެސް، އިސްރާއީލްގެ ޑިފެންސް މިނިސްޓްރީގެ ކޮމެޓީ އަކުން ބުދަ ދުވަހު ވަނީ، އެ ސަރަހައްދުގައި 3،400 ގެ އެޅުމުގެ ޕްލޭން އަށް ހުއްދަ ދީފަ އެވެ.

އެކަމާ ގުޅޭ ގޮތުން ވާހަކަ ދައްކަވަމުން އިސްރާއީލްގެ ކަނާއަތު ފިޔައިގެ މާލީ ވަޒީރު ބެޒަލެލް ސްމޮޓްރިޗް ވިދާޅުވެފައި ވަނީ، އެ މަޝްރޫއާ އެކު ފަލަސްޠީނު ދައުލަތެއްގެ ޚިޔާލު ފޮހެވިގެން ދާނެ ކަމަށެވެ. އޭނާ އަކީ ފަލަސްޠީނުގެ ރައްޔިތުންނާ ދެކޮޅަށް އިސްރާއީލް އިން ހިންގަމުން އަންނަ ޖަރީމާ ތަކަށް އެންމެ ބޮޑަށް ތާއީދުކޮށް ވާހަކަ ދައްކަވާ އެކަކެވެ.

1967 ވަނަ އަހަރުގެ މެދު އިރުމަތީގެ ހަނގުރާމައިގައި އިސްރާއީލް އިން ވެސްޓް ބޭންކާއި، އިރުމަތީ ޖެރޫސަލް އަތުލުމަށް ފަހު، މިހާތަނަށް އެ ސަރަހައްދުގައި 160 ގެ ޤާއިމުކޮށް، 700،000 (ހަތް ލައްކަ) އަށް ވުރެ ގިނަ ޔަހޫގީން ދިރިއުޅެމުން ގެންދެ އެވެ.

މި ސަރަހައްދު ތަކަކީ ޣައްޒާ އާއެކު ފަލަސްޠީނުގެ މުސްތަޤުބަލުގެ ދައުލަތަށް ބޭނުންވާ ބިންތަކެވެ. މިހާރު މި ސަރަހައްދުގައި 3.3 މިލިއަން ފަލަސްޠީނު ރައްޔިތުން ދިރިއުޅެމުން ގެންދެ އެވެ.