މެޗުގެ ފެށުން ދިޔައީ ރަނގަޅަކަށް ނޫން: ފްލިކް

ސްޕެނިޝް ލީގުގައި ރަޔޯ ވަޔެކާނޯއާ ދެކޮޅަށް ކުޅުނު މެޗުގެ ފެށުން ދިޔައީ ރަނގަޅަށް ނޫން ކަމަށް، ބާސެލޯނާގެ ކޯޗު ހަންސީ ފްލިކް ބުނެފި އެވެ.

ވަޔެކާނޯއާ ދެކޮޅަށް ކުޅުނު މެޗުން ބާސެލޯނާ މޮޅުވީ، މެޗުގައި ވަޔެކާނޯ އިން ލަނޑު ޖަހައި ލީޑު ނަގާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ. ބާސެލޯނާ އިން މެޗުގެ ދެ ލަނޑު ވެސް ޖެހީ ފަހު ހާފުގަ އެވެ.

އެމެޗަށްފަހު ނޫސްވެރިންނާ ވާހަކަ ދައްކަމުން ބާސެލޯނާ ކޯޗު ފްލިކް ބުނީ، މެޗުގެ ފުރަތަމަ ވަގުތުތައް ދިޔައީ އެންމެ ރަނގަޅަށް ނޫން ކަމަށެވެ. އެގޮތުން ބާސެލޯނާ އަށް އެންމެ ރަނގަޅަށް ނުކުޅެވުނު ކަމަށާއި، ބޯޅަ ހިފަހައްޓައިގެން އެންމެ ރަނގަޅަށް ކުޅެވިފައި ނެތް ކަމަށެވެ. ޚާއްސަކޮށް ކުޅުންތެރިން އެކުވެގެން އެއްވެސް ކަމެއް ކުރެވުނު މަންޒަރު ނުފެނުނު ކަމަށާއި، ނަމަވެސް ދެ ވަނަ ހާފުގައި ވަރަށް ބޮޑަށް ކުޅުން ރަނގަޅު ކުރި ކަމަށް ވެސް އޭނާ ބުންޏެވެ.

ދެ ވަނަ ހާފުގައި ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ޑެނީ އޮލްމޯ އާއެކު، ބާސެލޯނާ އިން ކުރި މަސައްކަތް ރަނގަޅު ކަމަށް ފްލިކް ވަނީ ބުނެފަ އެވެ. ޚާއްސަކޮށް ފާއިތުވި އަހަރުތަކު ކުޅެފައިވާ މެޗުތަކުގެ ނަތީޖާތަކަށް ބަލާއިރު، މިފަހަރު ވެސް އުނދަގޫ މެޗަކަށް އުންމީދު ވެސް ކުރި ކަމުގައި ފްލިކް ބުންޏެވެ. އެހެން ނަމަވެސް، އެ މެޗުން ލިބުނު މޮޅަކީ، ޚާއްސަކޮށް ފަހަތުން އަރައި ދެ ލަނޑު ޖަހައިގެން މޮޅު ވެވުނީ، ދެ ވަނަ ހާފުގައި ދެއްކި ތަފާތުން ކަމަށް ވެސް ފްލިކް ޤަބޫލު ކުރެ އެވެ. ތިން މެޗުން ވެސް މޮޅުވެ، ނުވަ ޕޮއިންޓު ލިބިފައި އޮތުމަކީ ހިތްހަމަ ޖެހޭ ކަމެއް ކަމަށް ވެސް އޭނާ ވަނީ ބުނެފަ އެވެ.

އިތުރަށް ފްލިކް ބުނީ އުނދަގޫ މެޗުތަކާއި، ޕްރެޝަރު މެޗުތައް ކުރިއަށް އޮތީ ކަމަށާއި، ބާސެލޯނާ އިން މިހާރު ކުރަމުން އަންނަ މަސައްކަތް ހުއްޓާ ނުލާ ކުރިއަށް ގެންދާނެ ކަމަށެވެ. އަދި އުންމީދަކީ ކޮންމެ މެޗަކުން ވެސް ތިން ޕޮއިންޓު ހޯދުން ކަމަށާއި، ކުޅުންތެރިން މަސައްކަތް ކުރާނީ އެ އަމާޒުގައި ކަމަށް ވެސް އޭނާ ބުންޏެވެ.