ދަނޑުން ފޭބީ ރޮމުން، މުޅި ޓީމު ދެރަވެފައި

ބާސެލޯނާގެ 17 އަހަރުގެ މިޑްފީލްޑަރު މާކް ބާނަލްގެ ކަކޫ ހަލާކުވެ، ދިގު މުއްދަތަކަށް އޭނާ ނުކުޅެ ހުންނަންޖެހިދާނެ ކަމަށް ބެލެވެން ފަށައިފި އެވެ.

ރާޔޯ ވަޔެކާނޯ އަތުން ބާސެލޯނާ ރޭ 2-1އިން މޮޅުވި މެޗު ފުރިހަމަ ނުކުރެވި ބާނަލް ދަނޑުން ފޭބީ 97 ވަނަ މިނިޓްގަ އެވެ. އޭނާ ދަނޑުން ފޭބީ ފަރުވާދޭން ދަނޑަށް އެރި ދެ ފިޒީޝަނުންގެ އެހީތެރިކަމާއެކު ރޮމުންނެވެ. މެޗަށް ފަހު ކޯޗު ހަންސީ ފްލިކް ބުނީ އަނިޔާ ސީރިއަސް ކަމަށެވެ.

ބާނަލް އަކީ ބާސެލޯނާގެ އެކަޑަމީން ތަމްރީނުވެ ޕްރީ ސީޒަނުގައި ކޯޗު ފްލިކްގެ އިތުބާރު ވަރަށް ބޮޑަށް ހޯދި ކުޅުންތެރިއެކެވެ. ނަތީޖާއެއްގެ ގޮތުން މި ސީޒަނުގައި މިހާތަނަށް ކުޅުނު ތިން މެޗުގައި ވެސް އޭނާ ވަނީ ފުރަތަމަ 11ގައި ކުޅެފަ އެވެ. ނަމަވެސް ބާނަލް އަށް އަނިޔާވުމަކީ މިހާރު ވެސް މެދަށް ކުޅޭ ގިނަ ކުޅުންތެރިންތަކެއް އަނިޔާގައި ތިބި ބާސެލޯނާ އަށް ދިމާވާނެ ވަރަށް ބޮޑު މައްސަލައަކަށްވާނެ އެވެ. ސަބަބަކީ މާލީ ހާލަތު ހުރި ގޮތުން އިތުރު ކުޅުންތެރިއަކު ގަންނަން ދަތިވުމާއި ޓްރާންސްފާ މާކެޓް ވެސް ސެޕްޓެމްބަރު 1ގައި ހަމަވާނެތީ އެވެ.

ބާނަލް އަށް އަނިޔާވުމުން ރޭ މެޗުން މޮޅުވި ނަމަވެސް ބާސެލޯނާގެ ކުޅުންތެރިން ޗޭންޖިން ރޫމުގައި ތިބީ ވަރަށް ބޮޑަށް ދެރަވެފަ އެވެ. މެޗަކުން މޮޅުވުން އާއްމުކޮށް އުފާކޮށް ހެދި ނަމަވެސް ރޭ ހުރިހާ ކުޅުންތެރިންގެ މޫނު މަތިން ވެސް ފެނުނީ ކަންބޮޑުވުން ކަމަށް ސްޕޭނުގެ މީޑިއާތަކުން ބުނެ އެވެ.