ބީއެމްއެލް އިން ބަޣާވާތްކުރިކަމަށް ބުނުމަކީ އަޅުގަނޑުމެންގެ ޤައުމީވަންތަކަމަށް ޗެލެންޖްކުރުން - ޝާހިދު
27 އޯގަސްޓު 2024 | އަންގާރަ 10:22ޝާހިދު ވަނީ ބީއެމްއެލް އާއި މެދު ސަރުކާރުން ކުރާ ތުހުމަތުތަކަކީ ކުޑަ ކަމެއްގެ ގޮތުގައި ބެލެވެން ނެތް ކަމަށް ވިދާޅުވެފަ
އެމްޑީޕީގެ ނޫސްވެރިންގެ ބައްދަލުވުމުގެ ތެރެއިން | އެމްޑީޕީ
ބޭންކް އޮފް މޯލްޑިވްސް، ބީއެމްއެލް އިން ބަޣާވާތްކުރިކަމަށް ބުނުމަކީ އަޅުގަނޑުމެންގެ ޤައުމީވަންތަކަމަށް ޗެލެންޖްކުރުން ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރ އަބްދުﷲ ޝާހިދު ވިދާޅުވެެއްޖެއެވެ.
ޝާހިދު އެފަދައިން ވިދާޅުވީ އަންގާރަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
ޝާހިދު ވަނީ ބީއެމްއެލް އާއި މެދު ސަރުކާރުން ކުރާ ތުހުމަތުތަކަކީ ކުޑަ ކަމެއްގެ ގޮތުގައި ބެލެވެން ނެތް ކަމަށް ވިދާޅުވެފައެވެ. ބީއެމްއެލް އާއި މެދު ބަޣާވާތްކުރަން އުޅުނުކަމުގެ ތުހުމަތު ސަރުކާރުން ކުރުމަކީ އެއީ ވަރަށް ބޮޑަށް ބޭންކްގެ އަގު ވެއްޓޭނެ ކަމެއް ކަމަށް ވެސް ޝާހިދު ވިދާޅުވިއެވެ. ބޭންކް އޮފް މޯލްޑިވްސް (ބީއެމްއެލް)ގެ ކާޑުތަކުން ކުރެވޭ ބޭރުގެ މުއާމަލާތްތަކުގެ ލިމިޓަށް ބަދަލުގެނައުމަށް ފަހު ފަހުން އެކަން ވަނީ ކުރިން އޮތް ގޮތަށް އިއާދަކޮށްފައެވެ. ޝާހިދު ވަނީ އެންމެ ފުރަތަމަ އެ ބަދަލު އިޢުލާންކުރުމުން މަޖިލީހުގެ ސަރުކާރަށް ނިސްބަތްވާ މެމްބަރުންނާއި، ސަރުކާރުގެ ބައެއް ވަޒީރުން އެކަން ދިފާއުކުރައްވާ ވާހަކަދެއްކެވިކަން ހާމަކުރައްވާފައެވެ. އެހެންކަމަށް ވާނަމަ ބީއެމްއެލް އިން އެ ބަޣާވާތް ކުރީ ސަރުކާރުގެ ވަޒީރުންނާއި މެމްބަރުންގެ ބައިވެރިވުން އޮވެގެންތޯ ޝާހިދު ސުވާލު އުފެއްދެވިއެވެ. އެކަމުގެ ދިފާއުގައި މެމްބަރުން ވާހަކަދައްކަވާނީ ކޮންމެވެސް ވަރެއްގެ މައުލޫމާތުތަކެއް ލިބިލައްވާކަމަށް ޤަބޫލުކުރައްވާ ކަމަށް އެ މަނިކުފާނު ވިދާޅުވިއެވެ.
ޝާހިދު ވަނީ 180 ޑިގްރީ އެއް ނެގުމަށް ފަހު ބީއެމްއެލް އާއި މެދު ސަރުކާރުގެ ރާގު ބަަދަލުވެގެން ދިޔައީ ކުއްލިއަކަށް ކަމަށެވެ. ޝާހިދު އިތުރަށް ވިދާޅުވީ ސަރުކާރުގެ އެތެރޭގެ ގުޅުން ކުޑަ ކަމަށް ފާހަގަކުރެވޭ ކަމަށެވެ. ސަރުކާރުން ފެނިގެން ދަނީ ރޫޅި، ވަކިވެ، ބަލިކަށި ވެފައިވާ ސަރުކާރެއްގެ ސިފަތައް ކަމަށް އެ މަނިކުފާނު ވިދާޅުވިއެވެ. ޝާހިދު ވަނީ 2023 ވަނަ އަހަރު ރައްޔިތުން ސަރުކާރަށް ފާރަވެރިވާން އެމްޑީޕީ އާއި ހަވާލުކޮށްފައިވާ ކަމަށް ވެސް ވިދާޅުވެފައެވެ. ރިޔާސީ އިންތިޚާބުގައި ލައްކައަކަށް ވުރެ ގިނަ ރުފިޔާ ލިބުމުން އާއްމުން ސަރުކާރަށް ޖަވާބުދާރީވާން ބޭނުންވާކަން އެނގޭ ކަމަށް ޝާހިދު ވިދާޅުވިއެވެ.
