ބަކަރި ކޮށްޓަކަށް ބަކަރިތައް އަޅައިގެން ފަތް ކޯޅިން އެއަށް ކާންދީ، ކޮންޓްރޯލް ކުރަން އުޅޭހެން ދިވެހިން ގެންގުޅެން މި ސަރުކާރުން ބޭނުންވަނީ: ޒަރިޔަންދު

ރައީސް ޑރ. މުހައްމަދު މުއިއްޒުގެ މި ސަރުކާރުން ދިވެހި ރައްޔިތުން ގެންގުޅެން ބޭނުންވަނީ ބަކަރި ކޮށްޓަކަށް ބަކަރިތައް އަޅައިގެން ފަތް ކޯޅިން އެއަށް ކާންދީ، ކޮންޓްރޯލް ކުރަން އުޅޭހެން ކަމަށް މާލީ ދާއިރާގެ ތަޖުރިބާކާރެއް ކަމަށްވާ އިސްމާއީލް ޒަރިޔަންދު ވިދާޅުވެއްޖެ އެވެ.

ރާއްޖެޓީވީގެ 'ފަލަސުރުޚީ' ޕްރޮގްރާމްގައި ވާހަކަދައްކަވަމުން ޒަރިޔަންދު ވިދާޅުވީ މިއީ ރައްޔިތުން އަޅުދާސް ކުރުމުގެ ދައުރު ކަމަށެވެ. މި ސަރުކާރުގައި އަމިއްލަ މީހަކަށް އެއްވެސް މަސައްކަތެއް ކުރުމުގެ ފުރުސަތެއް ނެތް ކަމަށާ ދާދި މިދާކަށް ދުވަހު 2.5 ބިލިއަން  ބަހާލީ ސަރުކާރުން ބޭނުންވާ ފަރާތްތަކުގެ ވިޔަފާރި އަށް ކަމަށެވެ. 

ނަމަވެސް މިއަދު އޭގެ ޕްރޮޖެކްޓެއްގެ އަޑު ވެސް ނީވޭއިރު ސަރުކާރުން 2.5 ބިލިއަން ރުފިޔާގެ ޕްރޮޖެކްޓް އެއްވެސް ބިޑަކާ ނުލައި ސަރުކާރުން ބޭނުންވާ ފަރާތްތަކަށް ބަހާލާފައިވާ ކަމަށް ވެސް އޭނާ ވިދާޅުވި އެވެ. އަދި އާދައިގެ ކޮންސްޓްރަކްޝަން ކުންފުންޏަކުން ބޭނުންވާ ކްލާސްރޫމް އެޅުން ފަދަ ކަންތައްތައް ކުރުން ވެސް މިހާރު ކުރަނީ އެމްޓީސީސީ ފަދަ ބޮޑެތި ކުންފުނިތަކުން ކަމަށް ޒަރިޔަންދު ވިދާޅުވި އެވެ.

ސަރުކާރަށް އެއްގޮތަކަށް ވެސް ސާފުވެފަ އެއް ނެތް އަޅުގަނޑު ދެން ގަބޫލު ކުރަނީ އެ ބޭފުޅުން އެހާ. އެ ބޭފުޅުން ހަމަ އެނގިވަޑައިގެން ތިއްބަވާ ހަމަ ގަސްތުގަ ކުރައްވާ ކަމެއް ކަމަށް. އެއީ މިދަންނަވާ ގޮތުގެ މަތިން ބޮޑެތި ކުުންފުނިތަކުން އެކަހަލަ ކުދިކުދި ކްލާސްރޫމް އަޅައި، ފާޚަނާބަރި އަޅައި، އެ ފެންވަރުގެ މަސައްކަތް ކުރަން ފެށީމަ ރާއްޖޭގެ މަސައްކަތުގެ މާހައުލުގަ މަސައްކަތް ކުރާ ކުންފުނިތަކުގަ ފުރުސަތެއް ނޯންނާނެ. މިދިޔަ އަހަރުގެ އޮކްޓޫބަރު މަހުގެ ތެރޭގައި އެމްއެމްއޭ އިން ނެރެފަ އޮންނާނެ ދިރިއުޅުމުގެ ބޭނުމަށް ފްލެޓް އިމާރާތް ކުރުމާއި ބޭންކުން ލޯނު ދިނުމާ ބެހޭ ގަވާއިދެއް. މި ގަވާއިދު ނެރުމާ އެކީގައި ބީއެމްއެލް އިން ސަބްސިޑަރީ ކުންފުންޏެއް ހެދީ. އެ ސަބްސިޑަރީ ކުންފުނި ހެދީމަ ބީއެމްއެލް އިން އަނެއްކާ ނިންމީ ވަކި 3 ކުންފުންޏެއް. އާރްސީސީ އާ އަދި ކޮންމެވެސް އެހެން ދެ ކުންފުންޏެއް ލައިގެން އެ ބޭފުޅުން ބޭނުންވާ 3 ކުންފުންޏަށް އެކަނި.

މާލީ ދާއިރާގެ ތަޖުރިބާކާރެއް ކަމަށްވާ އިސްމާއީލް ޒަރިޔަންދު

ޒަރިޔަންދު ވިދާޅުވީ ސަރުކާރަށް ވާގިދޭ ފަރާތްތަކަށް ކަނޑައެޅިގެން ފައިސާ ދިނުމަށް ޕްރޮޖެކްޓް ހަވާލު ކުރަމުންދާއިރު ފުރަތަމަ ބަހާލީ 2.5 ބިލިއަން ރުފިޔާ ކަމަށެވެ. އޭގެ ފަހުން ވަކި ގަވާއިދެއް ހަދައި، އެ ގަވާއިދުގެ ދަށުން ފްލެޓް އެޅުމަށް އާރްސީސީ ގެ އިތުރުން ސަރުކާރުން ބޭނުން 2 ކުންފުންޏަކަށް ދީފައިވާ ކަން އޭނާ ފާހަގަ ކުރެއްވި އެވެ. 

ޒަރިޔަންދު ވިދާޅުވީ ސަރުކާރުން ބޭނުން ވަރަކަށް ފައިސާ ޗާޕު ކޮށްގެން މުސާރަ ދެވިދާނެ ކަމަށެވެ. އަދި ދިވެހި ކުންފުނިތަކަށް ފައިސާ ވެސް ދެވިދާނެ ކަމަށެވެ. އެހެން ނަމަވެސް ބޭރު ފައިސާ ދައްކަން ޖެހޭ ހިސާބުން ރާއްޖެ ބަނގުރޫޓު ވާނެ ކަމަށް އޭނާ ވިދާޅުވި އެވެ.

މި ބޭފުޅުންނަށް ފައިސާ ދެއްކިދާނެ ޗާޕު ކޮށްގެން. މުސާރަ ދެވިދާނެ. އެކަމު ރުފިޔާ ޗާޕު ކޮށްގެން ގޮސް އޮމާން އަށް ގޮސް ތެލެއް ނުގަނެވޭނެ އެއް ނޫންތޯ. އެމީހުން ބޭނުންވާނީ ބޭރު ފައިސާ އެއް ނޫންތޯ. އެހެންވީމަ އެހާ ހަމައަށް ދާއިރު ރާއްޖެ ދާނީ ބަނގުރޫޓަށް. އަޅުގަނޑަށް ގަބޫލު ކުރެވެނީ ސަރުކާރުގެ މައިގަނޑު ވިސްނުމުގެ ތެރޭގައި މި ދައުލަތުގެ މާލީ އިންތިޒާމު މި ވަށާޖެހޭ ގޮތް އެހާ ރަނގަޅަށް ސާފެއް ނުވޭކަން. ނުވީމަ އެންމެ އާންމު މީހާ އަށް މަސައްކަތް ކުރުމުގެ ފުރުސަތު ގެއްލުވާލާފަ. ބަކަރި ކޮށްޓަކަށް ބަކަރިތައް އަޅައިގެން ފަތް ކޯޅިން އެއަށް ކާންދީގެން ބަކަރި ކޮންޓްރޯލް ކުރަން އުޅޭހެން އަޅުގަނޑުމެން ދިވެހި ރައްޔިތުން ގެންގުޅެން މި ބޭނުންވަނީ

މާލީ ދާއިރާގެ ތަޖުރިބާކާރެއް ކަމަށްވާ އިސްމާއީލް ޒަރިޔަންދު

ޒަރިޔަންދު ވިދާޅުވީ މުޅި ސިސްޓަމް މިހާރު އޮތީ ހަލާކު ކޮށްލާފައި ކަމަށެވެ. ރައީސް ޑރ. މުހައްމަދު މުއިއްޒު ބޭނުންފުޅުވާ ބަޔަކަށް ވަޒީފާ ދީގެންނާ، ޕްރޮޖެކްޓުތައް ދީގެން ރައްޔިތުންގެ އުފެއްދުންތެރިކަމާ މަސައްކަތްތެރިކަން ވެސް ހުއްޓުވާފައިވާ ކަމަށް ވެސް ޒަރިޔަންދު ވިދާޅުވި އެވެ. އަދި އޭގެ ސަބަބުން މުޅި ރާއްޖެއަށް ގެއްލުން ވަމުންދާ ކަމަށް އޭނާ ވިދާޅުވި އެވެ.