މިހާރު ކަޅު ބާޒާރުގައި ވެސް ޑޮލަރު ނުލިބޭ: އަމީރު
12 ޖުލައި 2026 | އާދީއްތަ 17:39އަމީރު ވިދާޅުވެފައި ވަނީ، މިހާރު ރާއްޖޭގައި ޑޮލަރުގެ އަގު ގާތް ގަނޑަކަށް 21 ރުފިޔާ އަށް އަރާފައިވާ ކަމަށް. ޑޮލަރުގެ އަގު އަރައިގެންދާއިރު، ރާއްޖޭގައި އިޤްތިޞާދީ ގިނަ ޙަރަކާތް ތަކެއް ވަނީ ހުއްޓިފައި ކަމަށް.
އެމްޑީޕީ އިން ބޭއްވި ޑޮލަރެއް ނެތް ޕެނަލް ޑިސްކަޝަންގެ ތެރެއިން. | ސޯޝަލް މީޑިއާ
ރާއްޖޭގައި ޑޮލަރުގެ ރޭޓު އިންތިހާ އަށް މަތިވެފައިވާއިރު، މިހާރު ކަޅު ބާޒާރުގައި ވެސް ޑޮލަރު ލިބެން ނެތް ކަމަށް ކުރީގެ ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެ އެވެ.
އަމީރު އެހެން ވިދާޅުވެފައި ވަނީ އާދީއްތަ ދުވަހުގެ ރޭ، އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ކުރިއަށް ގެންދިޔަ "ޑޮލަރެއް ނެތް" ޕެނަލް ޑިސްކަޝަންގައި އެވެ. އެ ޕެނަލް ޑިސްކަޝަންގައި އަމީރު ވަނީ ޕްރެޒެންޓޭޝަނެއް ހިއްސާ ކުރައްވައިފަ އެވެ.
އެ ޕްރެޒެންޓޭޝަންގައި އަމީރު ވިދާޅުވެފައި ވަނީ، މިހާރު ރާއްޖޭގައި ޑޮލަރުގެ އަގު ގާތް ގަނޑަކަށް 21 ރުފިޔާ އަށް އަރާފައިވާ ކަމަށެވެ. ޑޮލަރުގެ އަގު އަރައިގެންދާއިރު، ރާއްޖޭގައި އިޤްތިޞާދީ ގިނަ ޙަރަކާތް ތަކެއް ވަނީ ހުއްޓިފައި ކަމަށް އަމީރު ވިދާޅުވި އެވެ. އެގޮތުން ޕަބްލިކް ސެކްޓަރ އިންވެސްޓްމަންޓް ޕްރޮޖެކްޓުތައް ކުރިއަށް ނުދާ ކަމަށާއި، ކުދި އަދި މެދު ފަންތީގެ ވިޔަފާރި ތަކުގެ ވިޔަފާރި ހުއްޓިފައިވާ ކަމަށާއި އަދި ރާއްޖޭގެ ކޮންސްޓްރަކްޝަން ސިނާއަތުގެ ގިނަ ކުންފުނި ތަކެއް ވެސް ހުއްޓިފައިވާ ކަމަށެވެ.
ޑޮލަރުގެ އަގު ހުރީ 21 ރުފިޔާގައި ކަމަށް ފާހަގަ ކުރައްވައި އެ ޕްރެޒެންޓޭޝަންގައި އަމީރު ވިދާޅުވީ، ރާއްޖެ ޑޮލަރަށް ޖެހިފައިވާ ކަމަށެވެ. އަދި މީގެ ކުރިން ކަޅު ބާޒާރުގައި ޑޮލަރު ގަންނަން ލިބުނު ނަމަވެސް، މިހާރު ކަޅު ބާޒާރުގައި ޑޮލަރު ގަންނަން ވެސް ނުލިބޭ ކަމަށް ވިދާޅުވެފައިވެ އެވެ. މީގެ އިތުރުން ޑޮލަރު މާރުކުރުމުގެ ސިޔާސަތަށް ސަރުކާރުން 2025 ވަނަ އަހަރު ގެނައި ބަދަލާ އެކު، ބޭންކުތަކާއި އެމްއެމްއޭ އަށް 650 މިލިއަން ޑޮލަރު ވަދެފައިވާ ކަމަށް ޕްރެޒެންޓޭޝަންގައި ފާހަގަ ކޮށްފައިވެ އެވެ.
މިހާރު އަޅުގަނޑުމެންނަށް އެބަ ފެނޭ ޑޮލަރުގެ އަގު މި ހުރީ ގާތް ގަނޑަކަށް އެކާވީސް ރުފިޔާ އަށް އަރާފައި. އެކާވީސް ރުފިޔާ އަށް މި އަރައިގެންދާއިރު، އަޅުގަނޑުމެންނަށް އެބަ ފާހަގަވޭ ރާއްޖޭގެ ގިނަ އިޤްތިޞާދީ ޙަރަކާތް ތަކެއްހެން ހުރީ ހުއްޓިފައި. ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮޖެކްޓު ތަކެއް ކުރިއަކަށް ނުދޭ، ކުދި އަދި މެދު ފަންތީގެ ވިޔަފާރިތައް ވަނީ ހުއްޓިފައި، ރާއްޖޭގެ ކޮންސްޓްރަކްޝަން ސިނާއަތުގެ ގިނަ ކުންފުނި ތަކެއް ވެސް ވަނީ ހުއްޓިފައި. މިއާ އެކު ވެސް އަޅުގަނޑުމެންނަށް މި ފެނިގެން ދަނީ ބްލެކް މާާކެޓުގައި ރޭޓު މި ހުރީ ގާާތް ގަނޑަކަށް އެކާވީސް ރުފިޔާ އަށް. އަޅުގަނޑުމެންނަށް މި ފެނިގެން ދަނީ ކުރިއަށް އޮތް ތަނުގައި ވެސް މި ރޭޓު މަތިވެގެންދާ ތަން.އިބްރާހީމް އަމީރު / ކުރީގެ ފިނޭންސް މިނިސްޓަރު
މީގެ އިތުރުން ބޭންކު ތަކަށް ޑޮލަރު މާރު ކުރި ނަމަވެސް، ޑޮލަރުގެ ރޭޓު ދަށަށް ނުދާނެ ކަމަށް މީގެ ކުރިން ވެސް އެމްޑީޕީ އިން ފާހަގަ ކޮށްފައި ވާނެ ކަމަށް ވަނީ ވިދާޅުވެފައި އެވެ. އަދި ޑޮލަރުގެ ރޭޓު ދަށަށް ދާ ކަމަށް ރައީސް ޑޮކްޓަރު މުޙައްމަދު މުޢިއްޒު ވިދާޅުވެފައި ވަނީ އިޤްތިޞާދީ އެއްވެސް ހަމަޔަކަށް ބިނާ ނުކޮށް ކަމަށް ވެސް ފާހަގަ ކޮށްފައިވެ އެވެ. އެއާ އެކު ސަރުކާރުގެ ސިޔާސަތުގެ ސަބަބުން ޑޮލަރުގެ ރޭޓު ދަނީ މައްޗަށް ކަމަށް އަމީރު ވަނީ ފާހަގަ ކުރައްވައިފަ އެވެ.
އަމީރު ވިދާޅުވީ ޑޮލަރުގެ ދަތިކަމާ އެކު ރާއްޖޭގެ އާންމު ރައްޔިތު މީހާ އާއި ވިޔަފާރި ތަކަށް ވެސް ވަރަށް ބޮޑެތި ދަތި ތަކެއް ދިމާވާ ކަމަށެވެ. އެގޮތުން ރައްޔިތުން ކާޑު ތަކުން ކުރަމުން އަންނަ މުއާމަލާތް ގާތް ގަނޑަކަށް ހުއްޓިފައިވާ ކަމަށާއި، އީކޮމާސް ސައިޓު ތަކުން ޗާޖު ނަގަމުން ގެންދާ ކަމަށާއި، އަދި ލިމިޓު ކަނޑައަޅާފައިވާ ކަމަށް ވެސް އަމީރު ވިދާޅުވި އެވެ.
ރާއްޖެ މިހާރު އޮތީ ކޮސްޓް އޮފް ލިވިން ކްރައިސިސްގެ ތުންފަތް މަތީގައިކަން ފާހަގަ ކުރައްވައި އަމީރު ވިދާޅުވީ، މިހާރު ރާއްޖޭގެ ރައްޔިތުންގެ ދިރިއުޅުމުގެ ޚަރަދުތައް އިންތިހާ އަށް ބޮޑުވެފައިވާ ކަަމަށެވެ. އަދި ތަކެތީގެ އަގުތައް އިންތިހާ އަށް މަތިވަމުން އަންނަ ކަމަށް ވެސް އަމީރު ވިދާޅުވި އެވެ. ވިޔަފާރި ތަކަަށް ޑޮލަރު ލިބުމުގައި ހުރި ދަތި ކަމުގެ ސަބަބުން، ވިޔަފާރިތައް ރަނގަޅަށް ކުރިއަށް ގެންދިޔުމަށް ފުރުސަތެއް ނެތް ކަމަށެވެ.
