މެންޗެސްޓަރ ސިޓީ އަށް ކުޅެމުން އަންނަ ޕޯޗުގަލްގެ ޔާއޯ ކަންސޭލޯ، ސައުދީ ޕްރޯ ލީގުގެ އަލް ޙިލާލަށް ދޫކޮށްލަން އެ ކުލަބުން އެއްބަސްވެއްޖެ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 30 އަހަރުގެ ކަންސޭލޯ ސިޓީ އަށް ބަދަލުވީ 2019 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. ސިޓީ އަށް ބަދަލުވީ ފަހުން ކަންސޭލޯ ވަނީ ލޯނު އެއްބަސްވުމެއްގެ ދަށުން ޖަރުމަނުގެ ބަޔާން މިއުނިކް އަދި ސްޕެއިންގެ ބާސެލޯނާ އަށް ކުޅެފަ އެވެ.

މީޑިއާ ތަކުގައި ބުނެފައިވާ ގޮތުން ކަންސޭލޯ ހޯދުމަށް އަލް ޙިލާލުން ސިޓީ އާއެކު ކުރިއަށް ގެންދިޔަ މަޝްވަރާތަކުން، މިހާރު ދެ ކުލަބަށް ވަނީ އެއްބަސްވުމަކަށް އާދެވިފަ އެވެ. އެގޮތުން ކަންސޭލޯ ހޯދުމަށް އަލް ޙިލާލުން ހުށަހަޅާ އަގަކީ 25 މިލިއަން ޔޫރޯ ކަަމަށްވާއިރު، އެ އަދަދަށް ސިޓީން އެއްބަސްވެފައިވާ ކަމަށް ވެސް ރިޕޯޓުތައް ބުނެ އެވެ.

ކަންސޭލޯ ވަނީ ސިޓީ އަށް ކުޅެދިން 154 މެޗުގައި ނުވަ ލަނޑު ޖަހައިފަ އެވެ. ސިޓީ އާއެކު އޭނާ ވަނީ ފަސް ތައްޓެއް ވެސް ކާމިޔާބު ކޮށްފަ އެވެ.