އިޒްރޭލުގެ ޓޭންކުތައް ޣައްޒާގެ މެދުތެރޭގެ ދީރް އަލް ބަލާހް އަށް ވަދެގަންނަމުންދާއިރު، އިޒްރޭލުގެ މަތިންދާބޯޓުތަކުން އެ ސަރަހައްދުގެ ކައިރީގައިވާ މަޣާޒީ ރެފިއުޖީ ކޭމްޕަށް ބޮން އަޅައި، 3 ފަލަސްތީނު މީހުން ޝަހީދު ކޮށްލައިފިއެވެ.

އދ. އިން ބުނެފައިވަނީ، އިޒރޭލުން ދީރް އަލް ބަލާހްގެ ކޭމްޕުގައި ތިބި ފަލަސްތީނުގެ ރެފިއުޖީން އެ ތަން ދޫކޮށް ދިއުމަށް އަމުރުކުރުމާ ގުޅިގެން، އެ ތަނުގައި ދެމުން ދިޔަ އިންސާނީ އެހީގެ މަސައްކަތް ހުއްޓާލަން މަޖުބޫރުވެފައިވާ ކަމަށް އދ. ން ބުނެފައިވެއެވެ. ރަފަހް އަށް މިއަހަރު ކުރީ ކޮޅު އިޒްރޭލު ސިފައިން ހަމަލާ ދޭން ފެށުމުން އެތަނުގައި ހުރި އދ ގެ އެހީގެ މައި މަރުކަޒު ބަދަލު ކުރީ ދީރް އަލް ބަލާހް އަށް ކަމަށް އޮފިޝަލުން ބުނެފައިވެއެވެ.

ސިއްހީ އޮފިޝަލުންނާ ހަވާލާދީ އަލްޖަޒީރާ އިން ބުނެފައިވަނީ އދ އިން ހިންގާ އެހީގެ މަސައްކަތަކީ "ޣައްޒާގެ ހޮސްޕިޓަލްތައް ހިންގުމަށް 100 އިންސައްތަ މުހިންމު" ކަމެއް ކަމުގައެވެ. ސިއްހީ ޚިދުމަތައް ބޭނުންވާ ތަކެތި ފޯރުކޮށްދިނުމާއި، ބޭރު ގައުމުތަކުން އަންނަ ޑޮކްޓަރުންގެ މަސައްކަތްތައް ވިލަރެސް ކުރުން މިކަމާ އެކު މުޅިން ހުއްޓުމަކަށް އަންނާނެ ކަމަށް އޮފިޝަލުން ވަނީ ބުނެފައެވެ.          

އަނެއްކޮޅުން ހިފާފައިވާ ހުޅަނގު އައްސޭރީގައި އިޒްރޭލުގެ ސިފައިންނާއި އެތަނުގައި ގަދަކަމުން ވަޒަންވެރިގެން އުޅޭ ޔަހޫދީން ހަމަލާދީ 6 ފަލަސްތީނު މީހުން ޝަހީދުކޮށްލާފައިވެއެވެ. މިއާއެކު، އިޒްރޭލުގެ ހައްދުފަހަނައަޅާފައިވާ މިނިސްޓަރު އިޓާމާ ބެން-ގަވީރު ވަނީ އަލް-އަޤްޞާ މިސްކިތުގެ ގޯތިތެރޭގައި "އިސްރާއީލުގެ ދިދަ ޖަހާނެ" ކަމަށާއި އެތަނުގައި ޔަހޫދީ ފައްޅިއެއް އަޅާނެ ކަމަށް ވަނީ ބުނެފައެވެ.

އިޒްރޭލުގެ ހައްދުފަހަނަ އެޅި ވަޒީރުގެ މި ވާހަކައަށް ނުރުހުން ފާޅު ކުރައްވާ ސައުދީ އަރަބިއްޔާގެ ޚާރިޖީ ވަޒީރު އެކްސްގައި ކުރެއްވި ޕޯސްޓެއްގައި، އިޒްރޭލުގެ އޮފިޝަލުން "ބައިނަލްއަޤްވާމީ ޤާނޫނުތަކާ ޚިލާފުވަމުންދާ" މައްސަލައިގައި ޖަވާބުދާރީ ކުރުވުމަށް ގޮވާލައްވާ ކަމަށާއި، "މާތްވެގެންވާ މަސްޖިދުލް އަޤްޞާގެ ތާރީޚީ އަދި ޤާނޫނީ ހައިސިއްޔަތަށް އިޙްތިރާމްކުރުމުގެ މުހިންމުކަން" ފާހަގަ ކުރައްވާފައިވެއެވެ.     

އިޒްރޭލުން ޣައްޒާގައި ކުރަމުންދާ ހަނގުރާމައިގައި މިހާތަނަށް މަދުވެގެން 40،435 މީހުން ވަނީ ޝަހީދު ކޮށްލާފައެވެ. އަދި އިޒްރޭލުގެ ހަމަލާތަކުގައި ޒަޚަމްވި މީހުންގެ އަދަދު 93،534 ށް ވަނީ އަރާފައެވެ.