ލުބުނާން އަށް އަނެއްކާވެސް އިޒްރޭލުން ހަމަލާދީފި، އެކަކު މަރުވެ، ގިނަ ބަޔަކު ޒަޚަމްވެއްޖެ

ލުބުނާން އަށް އަނެއްކާވެސް އިޒްރޭލުން ބޮން އަޅާ، އެކަކު މަރުވެ، ގިނަ ބަޔަކު ޒަޚަމްވެއްޖެއެވެ.

ލުބުނާން ގެ ސިއްހީ ވުޒާރާއިން ބުދަ ދުވަހުގެ ފަތިހު ބުނެފައިވަނީ އިޒްރޭލުން އެ ގައުމުގެ އިރުމަތީ ސަރަހައްދަށް ދިން ހަމަލާތަކުގައި އެކަކު މަރުވެ 20 މީހުން ޒަޚަމްވެފައިވާ ކަމަށެވެ. މި ހަމަލާގެ މައުލޫމާތު ހާމަ ކުރުމުގެ ކުރިން ލުބުނާންގެ ދެކުނުގައި އިޒްރޭލުން އޭގެ 24 ގަޑީއިރެއްހާ އިރު ކުރިން ދިން ހަމަލާއެއް ގައި 4 މީހުން މަރުވެފައިވާ ކަމަށް އެ ވުޒާރާއިން ބުނެފައިވެއެވެ.

ހިޒްބުﷲ ގެ އިސް ކޮމާންޑަރެއް ކަމަށްވާ ފުއާދް ޝުކްރު އިޒްރޭލުން އަވަހާރަ ކޮށްލުމާ ގުޅިގެން ދެ ފަރާތުގެ ދެމެދުގައި ހަމަލާތައް ބަދަލު ކުރުން މި ފަހަކަށް އައިސް ވަރަށް ބޮޑަށް ވަނީ އިތުރުވެފައެވެ.

އިޒްރޭލުން ބުދަދުވަހު ލުބުނާން އަށް މިދިން ހަމަލާ އަކީ ނުރައްކާތެރި ހަމަލާ އެއް ކަމަށާއި ހަމަލާގައި 8 ކުޑަކުދިންނާއި މާބަނޑު އަންހެނަކު ޒަޚަމްވި ކަމަށްވެސް ލުބުނާންގެ ސިއްހަތާ ބެހޭ ވުޒާރާ އިން ބުނެފައިވެއެވެ.

އެ ސަރަހައްދުގެ ހޮސްޕިޓަލެއްގެ މަސްދަރަކުން އޭއެފްޕީއަށް ބުނެފައިވަނީ އެއް އާއިލާއެއްގެ 10 އަހަރުން ދަށުގެ 5 ކުދިން ޒަޚަމްވި މީހުންގެ ތެރޭގައި ހިމެނޭ ކަމަށެވެ.

ބުދަ ދުވަހުގެ މެންދަމުގެ ވަގުތު ދިން މި ހަމަލާތައް އައިސްފައިވަނީ ހޯމަ ދުވަހުގެ ރޭ ބެކާ ސަރަހައްދުގައި ދިން މިފަދަ ހަމަލާތަކަކަށްފަހުގައެވެ. އިޒްރޭލުން ބުނެފައިވަނީ އެއީ "ހިޒްބުﷲ ގެ ހަތިޔާރު ރައްކާކުރާ ތަންތަނަށް" އަމާޒުކޮށްގެން ދިން ހަމަލާތަކެއް ކަމަށެވެ.