ރެއާލްގައި ފުރަތަމަ ތައްޓާއެކު އެމްބާޕޭ އަށް އުފާވެރި އިޙުސާސެއް!

ސްޕެއިންގެ ރެއާލް މެޑްރިޑާ އެކު ފުރަތަމަ ތަށި ކާމިޔާބު ކުރެވުމުން އުފާވެރި އިޙުސާސެއް ކުރެވޭ ކަމަށް، އެ ޓީމަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭ ބުނެފި އެވެ.

ފްރާންސްގެ ޕެރިސް ސެއިންޓް ޖާމަން (ޕީއެސްޖީ)ދޫކޮށް، އެމްބާޕޭ ރެއާލަށް ބަދަލުވީ މިދިޔަ ޖުލައި މަހުގެ ތެރޭގަ އެވެ. އެ ކުލަބާ އެކު އެމްބާޕޭ ކުޅުނު ފުރަތަަމަ މެޗަކީ ޔުއެފާ ސުޕަ ކަޕްގެ ފައިނަލް މެޗެވެ. އެޓަލަންޓާއާ ދެކޮޅަށް ރެއާލުން ކުޅުނު އެ މެޗުގެ ފުރަތަމަ 11 ގައި ހިމެނިގެން އެމްބާޕޭ ވަނީ ކުޅެފަ އެވެ. މެޗުގައި ރެއާލްގެ ދެ ވަނަ ލަނޑު ޖެހީ ވެސް އެމްބާޕޭ އެވެ. މެޗުގެ ވަކި ހިސާބަކުން އޭނާ ވަނީ ބަދަލުކޮށްފަ އެވެ.

އެ މެޗަށްފަހު ވާހަކަ ދައްކަމުން އެމްބާޕޭ ބުނީ، ރެއާލް މެޑްރިޑްގެ ޖާޒީ ލުމަކީ ވަރަށް އުފާވެރި އިޙުސާސެއް ކުރެވޭ ކަމަށެވެ. އަދި ޚާއްސަކޮށް ފުރަތަމަ މެޗުގައި ލަނޑު ޖަހައި، ރެއާލަށް ތަށި ކާމިޔާބު ކުރުމަށް އެހީތެރިވެވުމުން އުފާވާ ކަމަށް އެމްބާޕޭ ވަނީ ބުނެފަ އެވެ. ޔުއެފާ ސުޕަ ކަޕަކީ އެމްބާޕޭގެ ކެރިއަރުގައި އޭނާ ކާމިޔާބު ކުރި ކުލަބް އިންޓަނޭޝަނަލް ފުރަތަމަ ތައްޓެވެ.

މީގެ އިތުރުން އެމްބާޕޭ ބުނީ، ރެއާލް މެޑްރިޑްގެ ނަން ބުނުމާއެކު ދެން ބުނެވޭނީ ތަށީގެ ވާހަކަ ކަމަށެވެ. ރެއާލް އަކީ އަބަދު ވެސް ތަށިތައް ކާމިޔާބު ކުރުމުގައި އޮންނަ ޓީމެއްކަން ފާހަގަ ކުރަމުން އެމްބާޕޭ ބުނީ، ރެއާލް އަކީ ދުނިޔޭގައި އޮތް އެންމެ މޮޅު ކުލަބު ކަމަށެވެ. އަދި އެ ކުލަބުގައި ހުރުމަކީ ފަޚުރުވެރިވާ ކަމެއް ކަމަށް ވެސް އެމްބާޕޭ ބުންޏެވެ.

ރެއާލުން އެމްބާޕޭގެ ސޮއި ހޯދީ އޭނާ ހޯދަން ދެ ފަހަރެއްގެ މަތިން މަސައްކަތް ކުރުމަށްފަހު އެވެ. އެންމެ ފުރަތަމަ އެމްބާޕޭ ހޯދުމަށް ރެއާލުން މަސައްކަތް ކުރި ފަހަރު، ފަހު ވަގުތު އެމްބާޕޭ ނިންމީ ޕީއެސްޖީގައި މަޑު ކުރުމަށެވެ. ނަމަވެސް އޭގެ ފަހުން ދެ ވަނަ ފަހަރަަށް އޭނާ ހޯދުމަށް ކުރި މަސައްކަތުގައި ރެއާލުން ވަނީ ޑީލް ކާމިޔާބު ކޮށްފަ އެވެ.