ނޭޕާލަށް ކުރަމުންދާ ވިއްސާރައިގައި މަރުވި މީހުންގެ އަދަދު 49 ކަށް އަރައިފި
މިހާރު ކުރަމުންދާ ވިއްސާރައިގައި ދިމާވި އެކި ހާދިސާތަކުގައި 13 މީހަކު ޒަޚަމްވެފައިވާ އިރު 17 މީހަކު ގެއްލިފައިވާ ކަމަަށް ރިޕޯޓުތައް ބުނޭ
ނޭޕާލަށް ކުރަމުން ދަނީ މޫސުމީ ވިއްސާރައެއް
ނޭޕާލަށް ކުރަމުންދާ މޫސުމީ ވިއްސާރަގައި މިހާތަނަށް މަރުވި މީހުންގެ އަދަދު 49 ކަށް އަރައިފި ކަމަށް ރިޕޯޓުތައް ބުނެފިއެވެ.
ބޯކޮށް ވާރޭ ވެހި ބިންގަނޑުކަނޑައިގެން ދިއުމުގެ ހާދިސާތަކުގައި މަރުވި މީހުންގެ އަދަދު 49 ކަށް އެރިއިރު އެތައް ހާސް ބަޔަކު ގެދޮރު ދޫކޮށް ދާން ޖެހިފައިވާ ކަމަށް ވެސް އޮފިޝަލުން ބުނެއެވެ.
ނޭޕާލްގެ ހޯމް އެފެއާޒް މިނިސްޓްރީން މީޑިއާތަކަށް ބުނެފައި ވަނީ ނޭޕާލަށް މިހާރު ކުރަމުންދާ ވިއްސާރައިގައި ދިމާވި އެކި ހާދިސާތަކުގައި 13 މީހަކު ޒަޚަމްވެފައިވާ އިރު 17 މީހަކު ގެއްލިފައިވާ ކަމަށެވެ.
މީހުން ސަލާމަތް ކުރުމުގެ މަސައްކަތުގައި ފުލުހުންނާއި، ސިފައިންނާއި އަދި އާންމުން ދަނީ ހަރަކާތްތެރި ވަމުންނެވެ.
ރިޕޯޓުތައް ބުނާގޮތުން ފެންބޮޑުވުމާއި އަދި ބިންގަނޑުކަނޑައިގެން ދިޔުމުގެ ހާދިސާތަކުގެ އަސަރު ވަރަށް ބޮޑަށް ނޭޕާލުގެ 21 ޑިސްޓްރިކްޓް ކުރިމަތިވެފައިވެއެވެ.
ނޭޕާލަށް ޖޫން އިން ފެށިގެން ސެޕްޓެމްބަރު މަހާ ހަމައަށް ކުރާ މޫސުމީ ވިއްސާރަ އަކީ ދަނޑުގޮވާން ކުރުމަށް ބަރޯސާވާ ނޭޕާލަށް މުހިންމު ވިއްސާރައެކެވެ. އެހެންނަމަވެސް ކޮންމެ އަހަރަކުވެސް ވިއްސާރައިގެ ސަބަބުން ނޭޕާލަށް ބޮޑެތި ގެއްލުން ލިބެއެވެ.
