ކަމަވިންގާ އަށް އަނިޔާވެ، ސުޕަ ކަޕްގެ ފައިނަލްގައި ނުކުޅެވޭނެ
14 އޯގަސްޓު 2024 | ބުދަ 06:08އަނިޔާއާ ގުޅޭ ގޮތުން ވާހަކަ ދައްކަމުން ކަމަވިންގާ ބުނީ، އަނިޔާ ލިބުނީ އޭނާގެ ކަކުލަށް ކަމަށެވެ.
ރެއާލަށް ކުޅެމުން އަންނަ އެޑުއާޑޯ ކަމަވިންގާ
ސްޕެއިންގެ ރެއާލް މެޑްރިޑަށް ކުޅެމުން އަންނަ ފްރާންސްގެ އެޑުއާޑޯ ކަމަވިންގާ އަށް އަނިޔާވެ، ކުރިއަށް އޮތް ސްޕެނިޝް ސުޕަ ކަޕްގެ ފައިނަލްގައި ނުކުޅެވޭނެކަން އެނގިއްޖެ އެވެ.
ސްޕެނިޝް ސުޕަ ކަޕްގެ ފައިނަލްގައި ބުދަ ދުވަހުގެ ރޭ ދަންވަރު ރެއާލުން ނިކުންނާނީ އެޓަލަންޓާއާ ދެކޮޅަށެވެ. އެ މެޗުގެ ކުރިން ރެއާލުން ކުރިއަށް ގެންދިޔަ ފަރިތަކުރުންތަކުގެ ތެރެއިން ކަމަވިންގާ އަށް ވަނީ އަނިޔާވެފަ އެވެ. އެއާއެކު އަނިޔާއާ ގުޅިގެން ހަދަން ޖެހޭ އިތުރު މެޑިކަލް ޓެސްޓުތައް ހަދާނެ ކަމަށް ރިޕޯޓުތައް ބުނެ އެވެ.
އަނިޔާއާ ގުޅޭ ގޮތުން ވާހަކަ ދައްކަމުން ކަމަވިންގާ ބުނީ، އަނިޔާ ލިބުނީ އޭނާގެ ކަކުލަށް ކަމަށެވެ. އަދި ކަކުލަށް ލިބުނު އަނިޔާގެ ސަބަބުން، ވަރަށް ބޮޑަށް ރިއްސާ ކަމަށާއި އަނިޔާގެ ސީރިއަސްކަން ބުނެދޭން އުނދަގޫ ކަމަށް ވެސް އޭނާ ބުންޏެވެ. އެހެން ނަމަވެސް، ބުދަ ދުވަހު އިތުރު ޓެސްޓުތައް ހެދުން އޮންނާނެ ކަމަށާއި، ލިބިފައިވާ ގެއްލުމެއް އިނގޭނީ އެއަށްފަހު ކަމަށް ކަމަވިންގާ ބުންޏެވެ.
ރެނެސް ދޫކޮށް 2021 ވަނަ އަހަރު ރެއާލަށް ބަދަލުވި ކަމަވިންގާ އަންނަނީ އެ ކުލަބުގައި މޮޅު ކުޅުމެއް ދައްކަމުންނެވެ. އޭނާ ވަނީ މިހާތަނަށް ރެއާލްގައި ހޭދަކޮށްފައިވާ ހަތަރު ސީޒަންގެ ތެރޭގައި އެ ޓީމަށް 145 މެޗު ކުޅެދީ ދެ ލަނޑު ޖަހައިފަ އެވެ. ރެއާލާ އެކު ކަމަވިންގާ ވަނީ، ނުވަ ތައްޓެއް ވެސް ކާމިޔާބު ކޮށްފަ އެވެ.
