ޗެމްޕިއަންސް ކަޕްގެ ނަމުގައި އިންޑިއާ އިން ބޮޑު މުބާރާތެއް ބާއްވަނީ
މިމުބާރާތުގައި ދައުވަތު ދޭނީ ވަރުގަދަ ގައުމުތަކަށް
އިންޑިއާގެ ޤައުމީ ޓީމު ފޮޓޯއަކަށް އެތުރިލައިގެން
އިންޑިއާގެ ގައުމީ ޓީމަށް ބައިނަލްއަގުވާމީ މެޗުތަކުގެ ތަޖުރިބާތަކެއް އިތުރުކުރުމުގެ ވިސްނުމުގައި ބައިނަލްއަޤްވާމީ ބޮޑު ފުޓްބޯޅަ މުބާރާތެއް ބޭއްވުމަށް އެގައުމުން ނިންމައިފިއެވެ.
އިންޑިއާ އިން މީގެ ކުރިން އަންނަނީ ނެހްރޫ ކަޕްގެ ނަމުގައި ބައިނަލްއަޤްވާމީ މުބާރާތެއް ބާއްވަމުންނެވެ. އެ ގޮތުން 1982 ވަނަ އަހަރު ފެށި މި މުބާރާތުގައި ދުނިޔޭގެ އެކިކަންކޮޅުތަކުގެ ގައުމުތަކަށް ދައުވަތު ދެއެވެ.
އެންމެ ފުރަތަމަ އޮތް ނެހްރޫ ކަޕްގެ ޗެމްޕިއަންކަން ހޯދާފައި ވަނީ ޗައިނާ ބަލިކުރުމަށް ފަހު އުރުގުއޭ އިންނެވެ. އެންމެ ފަހުން އޮތް މުބާރާތުގެ ޗެމްޕިއަން ހޯދާފައިވަނީ އިންޑިއާއެވެ. ނަމަވެސް 2012 ވަނަ އަހަރުގެ ފަހުން މި މުބާރާތް ބާއްވާފައެއް ނުވެއެވެ.
ނެހްރޫ ކަޕްގެ ބަދަލުގައި އަލުން ބޭއްވުމަށް ތައްޔާރުވަމުން އަންނަ ޗެމްޕިއަންސް ކަޕްގައި ދުނިޔޭގެ ހަތަރު ބައްރެއްގެ ގައުމުތަކަށް ދައުވަތު ދޭނެއެވެ.
އެގޮތުން އިންޑިއާ ގައުމީ ޓީމުގެ އިތުރުން އޭޝިއާ، އެފްރިކާ އަދި އުތުރު އެމެރިކާގެ ގައުމުތަކަށް ދައުވަތު ދޭނެއެވެ. އަދި ކުރިން ގިނަ ޓީމުތައް ބައިވެރިކުރި ނަމަވެސް އަލަށް ފަށާ މުބާރާތުގައި ދައުވަތު ދޭނީ ހަތަރު ގައުމަކަށެވެ.
މިއަހަރު އޯގަސްޓު މަހު ފެށުމަށް ނިންމާފައިވާ ޗެމްޕިއަންސް ކަޕަށް ފީފާގެ ރިކޮގްނިޝަން ލިބޭނެ ކަމަށް އިންޑިއާގެ ފުޓްބޯޅައިގެ މައި އިދާރާއިން ބުނެއެވެ.
މީގެ ކުރިން އިންޑިއާގައި ބާއްވަމުން އައި ނެހްރޫ ކަޕްގައި އުރުގުއޭ، ބަލްގޭރިއާ، ކެމަރޫން، ޗައިނާ، ޕޮލަންޑް ފަދަ ގައުމުތަކުން ބައިވެރިވެފައި ވެއެވެ.
އެންމެ ފަހުން ބޭއްވި ނެހްރޫކަޕްގައި ދިވެހިރާއްޖޭން ވެސް ވަނީ ބައިވެރިވެފައެވެ.
