އާ ސީޒަނުގެ ފުރަތަމަ "ކްލެސިކޯ" މިރޭ!

ސްޕެނިޝް ސުޕާ ކަޕްގައި ބާސެލޯނާއާއި ރެއާލް މެޑްރިޑް ބައްދަލުކުރާ މެޗު މިރޭ ކުޅެވިގެންދާނެއެވެ.

ރާއްޖެ ގަޑިން އެކެއް ޖަހާއިރު ފަށާ މެޗު ކުޅުމަށް ހަމަޖެހިފައިވަނީ ބާސާގެ އަމިއްލަ ދަނޑުކަމަށްވާ ކޭމްޕްނޯގަ އެވެ.

ބާސާއަށް ސުޕާކަޕުން ޖާގަ ލިބުނީ މިދިޔަ ސީޒަނުގައި ކޮޕާ ޑެލްރޭ އުފުލާލައިގެންނެވެ. ރެއާލްއަށް ފުރުސަތު ލިބިފައިވަނީ މިދިޔަ ސީޒަނުގައި ސްޕެނިޝް ލަލީގާ ކާމިޔާބުކޮށްގެންނެވެ.

މި މެޗަށް ނުކުންނައިރު ދެ ޓީމުންވެސް ބަދަލުތަކެއް ފެނިގެން ދާނެއެވެ. އެގޮތުން އެންމެ ބޮޑަށް ފާހަގަ ވެގެންދާނީ ފާއިތުވި ސީޒަނުގައި ބާސާއާށް ކުޅުނު ބްރެޒިލްގެ ފޯވާޑް ނޭމާ ފެނިގެން ނުދިޔުމެވެ. އޭނާވަނީ ދުނިޔޭގެ ރިކޯޑް އަދަދަކަށް ފްރާންސްގެ ޕީ.އެސް.ޖީއަށް ބަދަލުވެފައެވެ.

ހަމަ އެހެންމެ ރެއާލްއިންވެސް އެތަކެއް ތަރިންތަކެއް ފެނިގެންނުދާނެއެވެ. އެގޮތުން ޕެޕޭ، ޑެނިލޯ، މޮރާޓާ އަދި ހުނަރުވެރި މިޑްފީލްޑާ ޖޭމްސް ރޮޑްރިގޭޒް ވަނީ މިސީޒަނުގައި އެހެން ޓިމުތަކަށް ބަދަލުވެފައެވެ.

މިރޭގެ މެޗުގައި މި ދެޓީމުންވެސް އާ މޫނުތަކެއް ފެނިގެންދާނެއެވެ. އެގޮތުން ރެއާލްއިން ވަނީ ޑިފެންޑާ ތިއޯ ހަނާންޑޭޒް އާއި 21 އަހަރުން ދަށުގެ ޔޫރޯގައި ވިދާލި ހުނަރުވެރި މިޑްފީލްޑާ ޑެނީ ސެބަލޯސް ގެނެސްފައެވެ. މީގެ އިތުރުންވެސް އެތަކެއް ޒުވާން ކުޅުންތެރިންތަކެއް ވަނީ އެޓީމާ ގުޅިފައެވެ. ބާސާއިންވަނީ ޕޯޗުގަލްގެ ޑިފެންޑާ ނެލްސަން ސެމޭޑޯގެ އިތުރަށް ސްޕެއިންގެ ފޯވާޑް ޖެރާޑް ޑެއުލޮފޯގެ ސޮއި ހޯދާފައެވެ.

މި މެޗުގައި ސަސްޕެންޝަންގެ ސަބަބުން ރޭއާލްގެ މިޑްފީލްޑާ ލޫކާ މޮޑްރިޗް ނުކުޅޭނެއެވެ. އަދި އިންޖަރީގެ ސަބަބުން ބާސާގެ ރަފީންޔާ އަދި އަންދްރޭ ގޯމޭޒް ނުކުޅޭނެއެވެ.

މިރޭގެ މެޗަކީ ބާސާއާއި އަލަށް ގުޅުނު ކޯޗް އާނެސްޓޯ ވަލްވާޑޭ ވާދަވެރި މުބާރާތެއްގައި އެހެން ޓީމަކާ ދެކޮޅަށް ބާސާ ގޮވައިގެން ނުކުންނަ ފުރަތަމަ ފަހަރެވެ.

ޕްރީ ސީޒަންގައި މިދެޓީމު ވާދަކުރި މެޗު 2-3 ގެ ނަތީޖާއަކުން ކާމިޔާބުކުރީ ބާސާއެވެ. މި މުބާރާތުގެ ދެވަނަ ލެގު ކުޅެވޭނީ އޮގަސްޓް މަހުގެ 17 ވަނަ ދުވަހުއެވެ.