ގާނޫނުތައް ތަންފީޒު ކުރަމުންދާތީ ބައެއް މީހުންނަށް އުދަނގޫވާނެ: މިނިސްޓަރު އިހުސާން

ގާނޫނުތައް ތަންފީޒު ކުރަމުންދާތީ ބައެއް މީހުންނަށް އުދަނގޫވާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

މިނިސްޓަރު އިހުސާން މިހެން ވިދާޅުވީ ރައްކާ ޕްރޮގްރާމަށް 10 އަހަރު ފުރުން ފާހަގަކުރުމަށް ފުވައްމުލައް ސިޓީގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

މިނިސްޓަރު އިހުސާން ވިދާޅުވީ ރާއްޖޭގެ ދާޚިލީ ސަލާމަތާއި ރައްކާތެރިކަން ކަށަވަރު ކުރުމަށް ބޮޑު އިސްކަމެއް ދީގެން މަސައްކަތްތައް ކުރަމުންދާ ކަމަށާއި، ޚާއްސަ އޮޕަރޭޝަންތައް ކުރިއަށް ގެންދާ ކަމަށެވެ.

އެގޮތުން ރާއްޖެ މަސްތުވާތަކެތީގެ ވަބާއިން ސަލާމަތްކުރުމާއި، ގޭންގު ހަދައިގެން ކުށްތައް ކުރުން ހުއްޓުވުމާއި، ގަވާއިދާ ޚިލާފަށް އުޅެމުންދާ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ޚާއްސަ އިސްކަމެއް ދީގެން މަސައްކަތް ކުރަމުންދާ ކަމަށް މިނިސްޓަރު އިހުސާން ވިދާޅުވިއެވެ. މިނިސްޓަރު އިހުސާން ވިދާޅުވީ މި މަސައްކަތްތަކުން ހަގީގީ ނަތީޖާއެއް ފެންނާނީ ހުރިހާ ރައްޔިތުންގެ އެއްބާރުލުން ލިބިގެން ކަމަށެވެ.

ގިނަ ގާނޫނުތައް ތަންފީޒުވެގެން އަންނައިރު ބައެއް މީހުންނަށް އުނދަގޫ ވާނެކަން ފާހަގަކުރައްވައި މިނިސްޓަރު އިހުސާން ވިދާޅުވީ މިހާތަނަށް ގާނޫނުތައް ތަންފީޒު ނުވެ ދިޔުމުން ފައިދާތަކެއް ލިބެމުންދިޔަ ބަޔަކު ތިބެދާނެ ކަމަށެވެ. ނަމަވެސް ގާނޫނުތައް ނަގަހައްޓަން ކުރާ މަސައްކަތްތަކުން ކޮންމެވެސް ބަޔަކަށް ވަގުތީގޮތުން ތަކުލީފެއް އަންނާނެ ކަމަށާއި، އެކަން ތަހައްމަލު ކުރަން ޖެހޭނެ ކަމަށް މިނިސްޓަރު އިހުސާން ވިދާޅުވިއެވެ.

މީގެ އިތުރުން މިނިސްޓަރު އިހުސާން ވަނީ ރައްކާ ރޯޑް ޝޯވ ޕްރޮގްރާމުގެ މުހިންމު ކަމަށް އަލިއަޅުއްވާލައްވާ ވާހަކަދައްކަވާފައެވެ.

މިނިސްޓަރު އިހުސާން ވިދާޅުވީ މި ޕްރޮގްރާމްގެ މަގުސަދުތަކުގެ ތެރޭގައި އެކްސިޑެންޓްތައް މަދުކުރުމާއި، އެކްސިޑެންޓްތަކުން ލިބޭ ގެއްލުންތައް ކުޑަކުރުމާއި، ގާނޫނާއި ގަވާއިދުތަކަށް މީހުން އަހުލުވެރިކުރުވުމާއި، އަދި ނަމޫނާ މަގުތަކަކަށް މަގުތައް ހެދުން ހިމެނޭ ކަމަށެވެ. މިނިސްޓަރު އިހުސާން ވިދާޅުވީ ޕްރޮގްރާމުގެ ދެވަނަ ބައި ފެށިގެންދާއިރު، ވީހާވެސް ގިނަ ބައިވެރިން ޕްރޮގްރާމުގައި ސީދާ އަދި ނުސީދާކޮށް ބައިވެރިވެ، މީގެއިން މަންފާތަކެއް ލިބިގެން ދިޔުމަކީ ލިބޭނެ ވަރަށް ބޮޑު ކުރިއެރުމެއް ކަމަށެވެ.

ދިވެހި ފުލުހުންގެ ޚިދުމަތުން 2014 ވަނަ އަހަރުން ފެށިގެން "ރައްކާ" ގެ ނަމުގައި ޚާއްސަ ޕްރޮގްރާމެއް ގެންދަނީ ހިންގަމުންނެވެ. މި ޕްރޮގްރާމުގެ މައިގަނޑު މަޤްޞަދަކީ މަގުމަތީގެ ސަލާމަތާއި ރައްކާތެރިކަމާ ގުޅޭގޮތުން ރައްޔިތުން ހޭލުންތެރިކުރުވުމެވެ. މިއަހަރުގެ ރައްކާ ރޯޑް ޝޯވ 2024 ގެ ނަމުގައި ކުރިޔަށްދާ ހަރަކާތްތައް ކުރިއަށް ގެންދަނީ ފުވައްމުލައް ސިޓީގައެވެ. މި ޕްރޮގްރާމް ކުރިއަށް ގެންދިއުމުގައި ސަރުކާރު ހިއްސާވާ ކުންފުނިތަކާއި އަމިއްލަ ވިޔަފާރި ކުންފުނި ތަކުގެ އެހީތެރިކަން ލިބޭ ކަމަށް ފުލުހުން ބުނެއެވެ.

ފުވައްމުލަކުގައި ކުރިޔަށްދާ މި ޕްރޮގްރާމް ބެހިފައިވަނީ މައިގަނޑު ދެ ބަޔަކަށެވެ. ފުރަތަމަ ބައިގެ ގޮތުގައި އޮގަސްޓް މަހުގެ 3 އިން 8 އަށް ކުރިޔަށް ގެންގޮސްފައިވަނީ ސަތޭކަވަނަ ސްކޫލް ޓްރެފިކް މޮނިޓަރސް ޕްރޮގްރާމެވެ. ދެވަނަ ބައިގެ ގޮތުގައި މަގުމަތީގެ ސަލާމަތާއި ރައްކާތެރިކަމާ ގުޅުންހުރި އެކި ޙަރަކާތްތައް އޮގަސްޓް މަހުގެ 10 އިން 17 އަށް ކުރިޔަށް ގެންދިއުމަށް ވަނީ ހަމަޖެހިފައެވެ.