މެންޗެސްޓަރ ސިޓީ އަށް ކުޅެމުން އަންނަ ބްރެޒިލްގެ ގޯލު ކީޕަރު އެޑާސަން އެ ކުލަބުގައި މަޑު ކުރާނެކަން ކޯޗު ޕެޕް ގާޑިއޯލާ ހާމަކޮށްފި އެވެ.

އުމުރުން 30 އަހަރުގެ އެޑާސަން ސިޓީ އަށް ބަދަލުވީ 2017 ވަނަ އަހަރު އެވެ. ބެންފީކާގައި ހުރުމަށްފަހު އެޑާސަން ސިޓީ އަށް ބަދަލުވީ، އޭރު އެންމެ އަގު ބޮޑު ގޯލް ކީޕަރުގެ ގޮތުގަ އެވެ. ސިޓީ އާއެކު އެންމެ ފަހުން އެޑާސަން ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އެއްބަސްވުމުގައި ބާކީ ދެ އަހަރު އޮއްވައި، ސައުދީ ޕްރޯ ލީގުގެ ބައެއް ކުލަބުތަކުން ވަނީ އޭނާ ހޯދުމުގެ މަސައްކަތް ކޮށްފަ އެވެ.

އެގޮތުން ސައުދީ ލީގުގެ އަލް އިއްތިހާދާއި، އަލް ނަސްރުން ވަނީ އޭނާގެ ހޯދުމުގެ މަސައްކަތް ކޮށްފައި ކަމަށް މީޑިއާ ރިޕޯޓުތައް ބުނެ އެވެ. އަދި އެކަމާ ގުޅުން ހުރި މަޝްވަރާތައް ވެސް ކުރިއަށް ދިޔަ ކަމަށާއި، އެހެން ނަމަވެސް އެއްވެސް ފަރާތަކަށް އެއްބަސްވުމަކަށް އާދެވިފައި ނުވާ ކަމަށް ވެސް ރިޕޯޓުތައް ބުނެ އެވެ.

އެކަމާ ގުޅޭ ގޮތުން ވާހަކަ ދައްކަމުން ގާޑިއޯލާ ބުނީ، އެޑާސަން ސިޓީ ގައި މަޑު ކުރާނެ ކަމަށާއި، އޭނާ ކުލަބުގައި ހުރުމަކީ ލިބޭނެ ވަރަށް ބޮޑު ހިތްހަމަ ޖެހުމެއް ކަމަށެވެ. ސިޓީ ގައި އެޑާސަން މޮޅު ކުޅުމެއް ދައްކާފައިވާއިރު، އެޑާސަން އަކީ ސިޓީ އަށް މުހިންމު ކުޅުންތެރިޔެއްކަން ފާހަގަކޮށް ގާޑިއޯލާ ބުނީ، ސިޓީ ގައި އެޑާސަންގެ ސިލްސިލާ ކުރިއަށް ދާނެ ކަމަށެވެ.

އެޑާސަން ވަނީ ސިޓީގައި ހޭދަކޮޮށްފައިވާ ހަތް ސީޒަންގެ ތެރޭގައި، 332 މެޗުގައި އެ ޓީމުގެ ގޯލު ބަލަހައްޓައިފަ އެވެ. ސިޓީ އާއެކު އެޑާސަން ވަނީ 17 ތައްޓެއް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު، އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ހިމެނެ އެވެ.