ރާއްޖޭގައި އިންޝުއަރެންސް ފްރޯޑް ހިނގާ، ބިލުން އެކަމަށް ހައްލު ލިބެން ޖެހޭ - ޣަފޫރު
ޣަފޫރު ވިދާޅުވީ އިންޝުއަރެންސް ބުނަނީ ކޮން އޮތޯރިޓީ އެއްގެ ވާހަކަ ކަން ސާފު ނުވާ ކަމަށް
މަޖިލީހުގެ ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާ
ރާއްޖޭގައި އިންޝުއަރެންސް ފްރޯޑް ހިނގާ، އިންޝުއަރެންސް ބިލުން އެކަމަށް ހައްލު ލިބެން ޖެހޭ ކަމަށް މަޖިލީހުގެ ހަނިމާދޫ ދާއިރާގެ މެމްބަރު އަބްދުލް ޢަފޫރު މޫސާ ވިދާޅުވެއްޖެއެވެ.
އޭނާ އެފަދައިން ވިދާޅުވީ ބުދަ ދުވަހުގެ މަޖިލީހުގެ ޖަލްސާގެ ބަޙުސް މަރުހަލާގައި ވާހަކަދައްކަވަމުންނެވެ. އިންޝުއަރެންސްގެ ޚިދުމަތް މިހާރު ދެމުންދާ ފަރާތްތަކަށް ވެސް ނިޒާމުގެ ތެރެއަށް ވަދެވޭނެ ފުރުސަތު ދޭން ޖެހޭނެ ކަމަށް އޭނާ ވަނީ ވިދާޅުވެފައެވެ. މިހާރު އިންޝުއަރެންސްގެ ޚިދުމަތް ދެނީ އެޖެންޓުން މެދުވެރިކޮށް ކަމަށާއި ރާއްޖެއިން ބޭރުގެ ކުންފުނިތަކަށް ވެސް ރާއްޖޭގައި އިންޝުއަރެންސް ޚިދުމަތް ދެވެންޖެހޭ ކަމަށް އޭނާ ވިދާޅުވިއެވެ. 100 މިލިއަން ރުފިޔާގެ އިންވެސްޓްމެންޓްތައް ކުރެވޭ ވަރުގެ ކުންފުނިތައް މި ވަގުތު ރާއްޖެގައި ނު އުފެދޭނެ ކަމަށް ޢަފޫރު ވަނީ ވިދާޅުވެފައެވެ. ރާއްޖޭގައި އިންޝުއަރެންސް ނިޒާމަކީ އާއްމު މީހާ އަށް ލިބިގަނެވޭ ވަރަށް ވުރެ މާ އަގުބޮޑުކޮށް ދޭ ޚިދުމަތެއް ކަމަށް އޭނާ ވިދާޅުވިއެވެ. ތިން ޕާޓީ، ހަތަރު ޕާޓީ މެދުވެރިކޮށް އެ ޚިދުމަތް ދޭ އިރު އާއްމު މީހާ އަހަރަކު 60،000 އާއި 200000 ރުފިޔާ އާއި ދެމެދުގެ އަދަދެއް ދައްކަން ޖެހޭ ކަމަށް އޭނާ ވިދާޅުވިއެވެ.
އިންޝުއަރެންސް ނަހަމަ ގޮތުގައި ބޭނުންކުރާ މީހުން ރާއްޖޭގައި މަދުން ނަމަވެސް ތިބި ކަމަށް ޢަފޫރު ވަނީ ވިދާޅުވެފައެވެ. ގަސްތުގައި ދޯނީގައި ރޯކޮށްލުމާއި، ރިސޯޓްގައި ރޯކޮށްލުން ފަދަ ކަންކަން ރާއްޖޭގައި ހިނގާފައި ހުރިކަން އެއީ ބަދަލު ނުކުރެވޭނެ ހަގީގަތެއް ކަމަށް ޢަފޫރު ވަނީ ވިދާޅުވެފައެވެ. އަދި ގިނަ ފަހަރު ޝަރީއަތަށް ދިޔައީމަ އެ ފައިސާ އަށް އެދި ދައުވާ ކުރާ ފަރާތަށް ފައިސާ ދޭންޖެހޭ ކަމަށާއި މި ބިލް ވަރަށް ރަނގަޅަށް ދިރާސާކޮށް މިފަދަ މައްސަލަތަކަށް ހައްލު ހޯދަން ޖެހޭ ކަމަށް އޭނާ ވަނީ ވިދާޅުވެފައެވެ.
އޭނާ ވިދާޅުވީ އިންޝުއަރެންސް އަކީ ރާއްޖޭގައި ވަރަށް ރަނގަޅަށް މޮނިޓަރކުރެވެން ޖެހޭ ކަމެއް ކަަމަށެވެ. ޢަފޫރު އިތުރަށް ވިދާޅުވީ އިންޝުއަރެންސް ބިލުގައި އޮތޯރިޓީއެއްގެ ވާހަކަ ބުނެފައި ވީ ނަމަވެސް އެއީ ކޮން އޮތޯރިޓީ އެއްކަން ސާފު ނުވާ ކަމަށެވެ. އެއީ މުސްތަޤިއްލު އޮތޯރިޓީ އެއްކަން ނުވަތަ ނޫންކަން ވެސް ސާފު ނުވާ ކަމަށް އޭނާ ވިދާޅުވިއެވެ. އެ ބިލުގައި ބުނާ އޮތޯރިޓީ އަކީ އެމްއެމްއޭތޯ ސާފުނުވާ ކަމަށާއި ބިލް ތަންފީޒު ކުރާނެ ފަރާތް ވަރަށް ސާފުކޮށް އެނގުން މުހިންމު ކަމަށް އޭނާ ވިދާޅުވިއެވެ.
