ޑޯޓްމަންޑު ދޫކޮށް، ފުލްކްރުގް ވެސްޓް ހޭމަށް ބަދަލުވެއްޖެ

ބޮރޫޝިއާ ޑޯޓްމަންޑަށް ކުޅެމުން އައި ޖަރުމަނުގެ ފޯވާޑް ނިކްލަސް ފުލްކްރުގް، އެ ކުލަބު ދޫކޮށް ވެސްޓް ހޭމް ޔުނައިޓެޑަށް ބަދަލުވެއްޖެ އެވެ.

އުމުރުން 31 އަހަރުގެ ކުޅުންތެރިޔާ ޑޯޓްމަންޑަށް ބަދަލުވީ 2023 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ ތިން އަހަރު ދުވަހުގެ އެއްބަސްވުމުގެ މުއްދަތު ހަމަވާން އޮތީ 2026 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް، އެއްބަސްވުމުގައި ބާކީ ދެ އަހަރު އޮއްވާ އޭނާ ވަނީ އެ ކުލަބު ދޫކޮށްލައިފަ އެވެ.

ފުލްކްރުގް ހޯދުމަށް ވެސްޓް ހޭމުން ވަނީ 27 މިލިއަން ޔޫރޯ ޚަރަދު ކޮށްފަ އެވެ. ވެސްޓް ހޭމާ އެކު ފުލްކްރުގް ސޮއި ކޮށްފައި ވަނީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެހެންކަމުން، 2028 ވަނަ އަހަރުގެ ޖޫން މަހުގެ ނިޔަލަށް އޭނާ ވެސްޓް ހޭމްގައި ހުންނާނެ އެވެ. ވެސްޓް ހޭމުން ފުލްކްރުގް ހޯދާފައި ވަނީ އެ ކުލަބުގެ އިސްވެރިން ބޭނުން ވެގެންނެވެ.

ފުލްކްރުގް ވަނީ ޑޯޓްމަންޑަށް ކުޅެދިން 43 މެޗުގައި 15 ލަނޑު ޖަހައިފަ އެވެ. އޭނާ އަކީ ޖަރުމަނު ޤައުމީ ޓީމުގައި ވެސް ހިމެނޭ ކުޅުންތެރިޔެކެވެ. ޖަރުމަނު ޤައުމީ ޓީމުން އޭނާ އަށް ޖާގަ ލިބުނީ 2022 ވަނަ އަހަރު އެވެ. އޭގެ ފަހުން އޭނާ ވަނީ އެ އަހަރު ޤަތަރުގައި އޮތް ފީފާ ވޯލްޑް ކަޕް ގައި ޖަރުމަނަށް ކުޅެފަ އެވެ. އޭގެ ފަހުން މިއަހަރު އަމިއްލަ ޤައުމުގައި ކުރިއަށް ދިޔަ ޔޫރޯ ގައި ވެސް އޭނާ ކުޅުނެވެ. ޤައުމީ ޓީމަށް ކުޅެދިން 21 މެެޗުގައި ފުލްކްރުގް ވަނީ 13 ލަނޑު ޖަހައިފަ އެވެ.