ޖަރުމަނުގެ ބަޔާން މިއުނިކަށް ކުޅެމުން އަންނަ ނެދަލެންޑްސްގެ ޑިފެންޑަރު މަތައިސް ޑި ލިޓްއާ މެދު ވާހަކަ ދައްކާނީ އެންމެ ރަނގަޅު ވަގުތުގައި ކަމަށް އެ ކުލަބުގެ ޑައިރެކްޓަރު މެކްސް އެބާލް ވިދާޅުވެއްޖެ އެވެ.

އުމުރުން 24 އަހަރުގެ ކުޅުންތެރިޔާ ބަޔާނަށް ބަދަލުވީ 2022 ވަނަ އަހަރު އެވެ. އިޓަލީގެ ޔުވެންޓަސް ދޫކޮށްލުމަށްފަހު އޭނާ ބަޔާނަށް ބަދަލުވީ، ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އެއްބަސްވުމުގައި ބާކީ ތިން އަހަރު އޮއްވާ، ބަޔާން ދޫކޮށްލަން ޑި ލިޓް ބޭނުންވާ ކަމުގެ އަޑުތަކެއް ވަނީ ފެތުރިފަ އެވެ.

މީޑިއާ ތަކުގައި ބުނެފައިވާ ގޮތުން ޑި ލިޓް ހޯދުމުގެ މަސައްކަތް ކުރަމުން އަންނަ ކުލަބުތަކުގެ ތެރޭގައި މެންޗެސްޓަރ ޔުނައިޓެޑު ހިމެނެ އެވެ. އެހެން ނަމަވެސް ޑި ލިޓް އަންނަނީ ބަޔާންގެ ފަރިތަކުރުންތަކުގައި ބައިވެރިވަމުންނެވެ. އައު ކޯޗު ވިންސެންޓް ކޮމްޕެނީގެ އިރުޝާދުގެ ދަށުން އަންނަ ސީޒަނަށް ނިކުންނަން މަސައްކަތް ކުރާ ބަޔާންގެ ފަރިތަކުރުންތަކަށް ޑި ލިޓް ނިކުމެ އެވެ.

އެކަމާ ގުޅޭ ގޮތުން ވާހަކަ ދައްކަމުން އެބާލް ވިދާޅުވީ، އެކަމާ ގުޅޭ ގޮތުން އެންމެ ރަނގަޅު ވަގުތުގައި ވަކި އެއްޗެއް ބުނާނެ ކަމަށެވެ. އަދި މިއީ އެންމެ ރަނގަޅު ވަގުތު ނޫން ކަމަށް ވެސް އެބާލް ވިދާޅުވި އެވެ. މީގެ އިތުރުން އެބާލް ވިދާޅުވީ ކޮންމެ ނިންމުމެއް ވެސް ނިންމުމުގެ ކުރިން، އެކަމާ މެދު ވަރަށް ރަނގަޅަށް ވިސްނަން ޖެހޭނެ ކަމަށެވެ. ޑި ލިޓް އަކީ އަދި ވެސް ބަޔާންގެ ކުޅުންތެރިޔެއް ކަމަށާއި، ބަޔާނުން އަބަދު ވެސް އޭނާ އަށް ފުރިހަމަ ސަޕޯޓު ދޭނެ ކަމުގައި ވެސް އެބާލް ވިދާޅުވި އެވެ.

ޑި ލިޓް ވަނީ ބަޔާނަށް ބަދަލުވެ އެ ކުލަބަށް ކުޅެދިން 73 މެޗުގައި ފަސް ލަނޑު ޖަހައިފަ އެވެ. ބަޔާނާ އެކު ހޭދަކޮށްފައިވާ ދެ ސީޒަންގައި އޭނާ ވަނީ އެ ކުލަބާ އެކު ދެ ތައްޓެއް ކާމިޔާބު ކޮށްފަ އެވެ. އެއީ ޖަރުމަނު ލީގު އަދި ޖަރުމަނު ސުޕަ ކަޕް އެވެ.