ގަތަރުން ހުޅުމާލޭގައި އަޅައިދޭން ބުނި ސްޓޭޑިއަމްއާ ބެހޭގޮތުން ވަކި އެއްޗެއް ދަންނަވަން ނޭގޭ ކަމަށް ބަންޑާރަނައިބް މުހައްމަދު އަނިލް ވިދާޅުވެއްޖެ އެވެ.
ހޯމަ ދުވަހުގެ ރޭ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އަނިލް ވިދާޅުވީ، ގަތަރާއި ރާއްޖެއާ އޮތް ސިޔާސީ ގުޅުން ކަނޑާލުމާއެކު ހުޅުމާލޭ ސްޓޭޑިއަމްއާ ގުޅޭގޮތުން ޔަގީންކަމާއެކު ވަކި އެއްޗެއް ދަންނަވާކަށް ނޭގޭ ކަމަށެވެ.
އެހެންނަމަވެސް އަނިލް ވިދާޅުވީ، ހުޅުމާލޭގައި ބައިނަލްއަގުވާމީ ފެންވަރުގެ ސްޓޭޑިއަމެއް ބިނާކުރެވިގެންދާނެކަމުގެ ޔަގީންކަން ސަރުކާރުގެ ފަރާތުން ދިވެހި ޒުވާނުންނަށް އަރުވާ ކަމަށެވެ. އެގޮތުން އެކަން ކުރިޔަށް ގެންދަވާނީ ދިވެހި ސަރުކާރުގެ އިތުރުން ދޭދޭ ގައުމުތަކާ ޖަމިއްޔާތަކުގެ ހޭދައާއެކު ކަމަށެވެ.
ގަތަރުގެ އުރީދޫ ގްރޫޕުން މިދިޔަ އަހަރު ހުޅުމާލޭގައި ސްޓޭޑިއަމްއެއް އަޅައިދޭން ވަނީ ނިންމާފައެވެ. މިދިޔަ އަހަރު އޮކްޓޫބަރު މަހު މިކަން އިއުލާންކުރެއްވީ އުރީދޫ ގްރޫޕުގެ ޗެއާމަން އަބްދުﷲ ބިން މުހައްމަދު ބިން އަލް ސައުދު އަލް ސާނީ އެވެ.
އުރީދޫ ގްރޫޕުން ދަނީ ދުނިޔޭގެ އެކި ގައުމުތަކަށް އެހީތެރިކަން ފޯރުކޮށްދެމުންނެވެ. ދުނިޔޭގެ މޮޅު ކުޅުންތެރިޔާގެ މަޤާމު އެތައް ފަހަރަކު ހޯދާފައިވާ އާޖެންޓީނާގެ ލަޔޮނަލް މެސީ އަކީ އުރީދޫގެ ބްރޭންޑް އެމްބެސަޑަރެވެ.
