ބާސެލޯނާގެ ސޯޓު ގަތީ ޔޫއޭއީގެ މެޑޫސާއިން

ސްޕޭނުގެ މަޝްހޫރު ކުލަބު ބާސެލޯނާގެ ސޯޓް ޔުނައިޓެޑް އަރަބް އެމިރޭޓްސްގެ މެޑޫސާއިން ސްޕޮންސާކޮށްފި އެވެ.

މި ސްޕޮންސާޝިޕްގެ އަގަކީ އަހަރަކު 15 މިލިއަން ޔޫރޯ އެވެ. މިހެންވެ ތިން އަހަރުގެ މުއްދަތަށް ބާސެލޯނާއަށް 45 މިލިއަން ޔޫރޯ ލިބޭނެ އެވެ. މިއީ މާލީ ގޮތުން ހާސްކަމުގެ ތެރޭގައި ބާސެލޯނާ އަށް ލިބިގެންދާނެ ވަރަށް ބޮޑު ހިތްހަމަޖެހުމެކެވެ.

ޑިސްއިންފެކްޓް ކުރާ ބޭހެއް ކަމަށްވާ މެޑޫސާއިން ބާސެލޯނާގެ ސޯޓް ސްޕޮންސާ ކުރުމަކީ ތާރީހީ ކަމެކެވެ. އެއީ މިއީ އެކުލަބުގެ 124 އަހަރުގެ ތާރީހުގައި ސޯޓްގައި ސްޕޮންސާއެއް ޖަހާ ފުރަތަމަ ފަހަރު ކަމުގައިވުމުންނެވެ.

ތާރީހު ބަދަލުކުރަން ނިންމީ މާލީ ގޮތުން ދިމާވެފައިވާ މާލީ ދަތިތަކުން އަރައިގަތުމަށް ފައިސާ ހޯދާނެ އިތުރު ގޮތްތައް ތައާރަފް ކުރުމުގެ ގޮތުންނެވެ.

ބާސެލޯނާގެ ޖާޒީ މިހާރު ސްޕޮންސަރ ކުރަމުން އަންނަނީ ސްޕޮޓިފައިއިންނެވެ. އަދި ޖާޒީ ތައްޔާރުކޮށްދެނީ ނައިކީއިންނެވެ. ޖާޒީގެ އަތުގައި ސްޕޭނުގެ މަޝްހޫރު ޓީވީ އިސްތިހާރެއް ޖަހާފައިވެ އެވެ.