ސްޕެއިންގެ ބާސެލޯނާ އަށް ކުޅޭ އާޖެންޓީނާގެ ފޯވާޑް ލިއޮނެލް މެސީ، އެކްލަބުގެ އައު އެއްބަސްވުމުގައި ސޮއިކޮށްފި އެވެ.

އުމުރުން 30 އަހަރުގެ ފޯވާޑް، ބާސެލޯނާ އާއެކު ހޮނިހިރު ދުވަހު ސޮއިކުރި އައު އެއްބަސްވުމުގެ މުއްދަތު ހަމަވާނީ 2020 ވަނަ އަހަރުގެ ފުޓްބޯޅަ ސީޒަންގެ ނިޔަލަށެވެ. މިއެއްބަސްވުމުގެ ދަށުން، އޭގެ ކުރިން އެހެން ކްލަބަކުން މެސީ ގެންދަން ބޭނުންނަމަ، ރިލީސް ފީގެ ގޮތުގައި 700 މިލިއަން ޔޫރޯ ބާސެލޯނާ އަށް ދައްކަން ޖެހެއެވެ.

ބާސެލޯނާގެ އައު އެއްބަސްވުމުގައި މެސީ ސޮއިކޮށްފައިވަނީ، ޔޫރަޕްގެ ފުޓްބޯޅަ ލީގުތަކުގައި އެންމެ ގިނަ ލަނޑު ޖެހި ކުޅުންތެރިޔާ އަށް ދޭ ޔޫރަޕްގެ ރަން ބޫޓު ހަތަރުވަނަ ފަހަރަށް ކާމިޔާބު ކުރިތާ 24 ގަޑިއިރުވެސް ނުވަނީހެވެ. ހުކުރު ދުވަހުގެ ރޭ ބޭއްވި އެވޯޑް ހަފްލާގައި މެސީ އަށް މިދިޔަ ސީޒަނުގެ ޔޫރަޕްގެ ރަން ބޫޓު ހަވާލު ކޮށްފައިވާއިރު، ސްޕެނިޝް ލީގުގައި މިދިޔަ ސީޒަނުގައި މެސީ ޖެހި ލަނޑުގެ އަދަދު 37 އަށް އަރައެވެ.

ބާސެލޯނާއާއެކު މެސީ ކުރިން ހަދާފައިވާ އެއްބަސްވުމުގެ މުއްދަތު އަންނަ އަހަރަށް ހަމަވާއިރު، މެސީ އެކްލަބުގެ އެއްބަސްވުން އައު ކުރުމަށް ދެކޮޅު ހެދި ކަމުގެ އަޑުތަކެއް މިދިޔަ މެއި މަހުގެ ތެރޭގައި ފެތުރުނެވެ. އެހެންނަމަވެސް ބާސެލޯނާގެ އެއްބަސްވުން އައު ކުރުމަށް މެސީ އެއްބަސްވެފައިވާކަން އެކްލަބުން ޖުލައި މަހު ހާމަ ކޮށްފައިވެއެވެ.

މެސީ ބާސެލޯނާ އާ ގުޅުނީ 2000 ވަނަ އަހަރު އެވެ. އޭރު އުމުރުން 13 އަހަރުގެ މެސީ އެކްލަބުގެ ޔޫތު ޓީމްތަކާއެކު މޮޅު ކުޅުމެއް ދެއްކުމަށް ފަހު، އެކްލަބުގެ ސީނިއަރ ޓީމަށް ކުޅެދިން ފުރަތަމަ މެޗަކީ އުމުރުން 16 އަހަރުގައި ބާސެލޯނާ އަދި ޕޯޗުގަލްގެ އެފްސީ ޕޯޓޯ ބައްދަލުކުރި ރަހުމަތްތެރިކަމުގެ މެޗެވެ. ބާސެލޯނާގެ ސީނިއަރ ޓީމަށް މެސީ ކުޅެދިން ރަސްމީ ފުރަތަމަ މެޗަކީ ޖެހިގެން އައި ސީޒަނުގައި އެސްޕަނިޔޯލް އާ ދެކޮޅަށް ކުޅުނު މެޗެވެ. އޭރު މެސީގެ އުމުރަކީ 17 އަހަރެވެ.

ބާސެލޯނާގެ ސީނިއަރ ޓީމާއެކު ހޭދަ ކުރި 13 ސީޒަނުގައި ސްޕެނިޝް ލީގު އަށް ފަހަރު އަދި ޔުއެފާ ޗެމްޕިއަންސް ލީގު ހަތަރު ފަހަރު ކާމިޔާބު ކޮށްފައިވެ އެވެ. މީގެ އިތުރުން ސްޕެނިޝް ކޮޕަ ޑެލްރޭ ފަސް ފަހަރު، ސްޕެނިޝް ސުޕަރ ކަޕް ހަތް ފަހަރު، ޔޫރަޕިއަން ސުޕަރ ކަޕް ތިން ފަހަރު އަދި ފީފާ ކްލަބް ވޯލްޑް ކަޕް ތިން ފަހަރު ކާމިޔާބު ކޮށްފައިވެއެވެ. ބާސެލޯނާ އާއެކު މެސީ 30 ތަށްޓެއް ކާމިޔާބު ކޮށްފައިވާއިރު، އެއީ އެކްލަބުގެ ރެކޯޑެކެވެ. ބާސެލޯނާ އާއެކު އެންމެ ގިނަ މުބާރާތް ކާމިޔާބު ކުރި ކުޅުންތެރިންގެ ތެރޭގައި މެސީގެ އިތުރުން ދެން ހިމެނެނީ މިޑްފީލްޑަރ އަންދްރޭސް އިނިއެސްޓާ އެވެ.

ބާސެލޯނާ އަށް ކުޅުނު 602 މެޗުގައި މެސީ ވަނީ އެކްލަބަށް 523 ލަނޑު ޖަހައިދީފައެވެ. މީގެ އިތުރުން ވެސް މެސީ ވަނީ ބާސެލޯނާ އާއެކު ގިނަ ރެކޯޑްތަކެއް ގާއިމް ކޮށްފައެވެ. މެސީ އަކީ ބާސެލޯނާ އަދި ސްޕެނިޝް ލީގުގެ ތާރީޚުގައި ވެސް އެންމެ ގިނަ ލަނޑު ޖެހި ކުޅުންތެރިޔާ އެވެ.

ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ ގޮތުގައި ގިނަ ބަޔަކު ދެކޭ މެސީ ވަނީ، ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމް ފަސް ފަހަރު ހޯދާފައެވެ.