ރިސޯޓު ވޮލީ މުބާރާތުގެ ތަށި ބަނޑޮހުން ދިފާއުކޮށްފި

އާލާ އިންޓަރ ރިސޯޓު ވޮލީ ބޯޅަ މުބާރާތުގެ ޒޯން ޗެމްޕިއަންސް ލީގުގެ ތަށި ވަން އެންޑް އޮންލީ ރީތި ރަށް ބަލިކުރުމަށްފަހު ބަނޑޮހުން ދިފާއު ކޮށްފިއެވެ.

ބަނޑޮހުގައި ކުޅުނު މި މެޗު ވާދަވެރި ކުޅުމަކަށްފަހު ބަނޑޮހުން ކާމިޔާބުކުރީ 3-1 ސެޓުން މޮޅުވެގެންނެވެ.

ވިއްސާރައިގެ ސަބަބުން އެންމެ އެދެވޭ ކުޅުމެއް ދެޓީމަށްވެސް ދެއްކިފައި ނުވާއިރު ފޯރިގަދަ ކުޅުމެއް ދެޓީމުގެ ފަރާތުން ފެނިގެންދިޔައެވެ. މި މެޗުގެ ސެޓުތައް ބަނޑޮހުން ގެންދިޔައީ 19-25، 30-28. 25،20 އަދި 19-25 އިންނެވެ.

ފުރަތަމަ ސެޓުގައި ރީތި ރަށުން ސެޓުގެ ކުރީކޮޅު ލީޑު ނެގިނަމަވެސް ފަހަތުން އަރައި ބަނޑޮހުން ވަނީ ސެޓު ގެންގޮސްފައެވެ. މި ސެޓުގައި ބަނޑޮހުގެ އިސްމާއީލް ސާޖިދު (ކުޑަކާއްޓޭ)ގެ ފަރާތުން މޮޅު ކުޅުމެއް ފެނިގެންދިޔަ އިރު އޭނާ ފޮނުވައިލި ބާރު ހަމަލާތަށް ދިފާއު ކުރުމަށް ރީތި ރަށުގެ ކުޅުންތެރިންނަށް އުނދަގޫވިއެވެ.

މެޗުގައި އެންމެ ވާދަވެރި ކުޅުމެއް ފެނިގެން ދިޔައީ މެޗުގެ ދެވަނަ ސެޓުގައެވެ. އެގޮތުން މި ސެޓުގައި ދެޓީމުގެ ފަރާތުން ފެނިގެންދިޔައީ ހަމަހަމަ ކުޅުމެކެވެ. ވާދަވެރި ކުޅުމެއް ފެނިގެންދިޔަ މެޗުގެ ދެވަނަ ސެޓުގައި ބަނޑޮހުގެ ކުޅުންތެރިނަށް ހެދުނު ގޯސްތަކުގެ ފައިދާ ނަގައި މި ސެޓު ވަން އެންޑް އޮންލީ ރީތި ރަށުން ވަނީ ގެންގޮސްފައެވެ.

މެޗުގެ ފަހު ދެސެޓުގައި ބަނޑޮހުގެ ކުޅުންތެރިންގެ ފަރާތުން ތަފާތު މޮޅު ކުޅުމެއް ފެނިގެންދިޔައި އިރު މެޗުގެ ފަހު ދެ ސެޓު ބަނޑޮހުން ވަނީ ފަސޭހަ ކަމާއެކު ކާމިޔާބުކޮށްފައެވެ.

މި މުބާރާތުގެ އެންމެ މޮޅު ކުޅުންތެރިންނަށް ހޮވިގެންދިޔައީ ބަނޑޮހުގެ ކުޑަކާއްޓޭ، އަހުސަން، ބަޓިސް އަދި ރަޒާން އާއި ރީތި ރަށުގެ ނަބީލް، އެޑަމް އަދި ހަސަން އިބްރާހީމެވެ. މުބާރާތުގެ އެންމެ މޮޅު ކޯޗަކަށް ހޮވުނީ ބަނޑޮހުގެ އަދި ޤައުމީ ފިރިހެން ޓީމުގެ ކޯޗު މުހައްމަދު ސާޖިދުއެވެ.

މިއީ ބަނޑޮހުން މި މުބާރާތް ޖެހިޖެހިގެން ކާމިޔާބުކުރި ދެވަނަ ފަހަރެވެ.