ޕްރި ސީޒަން ފްރެންޑްލީ: ވަރުގަދަ ބާސެލޯނާގެ މައްޗައް ޗެލްސީއިން ކުރި ހޯދައިފި

ޖަޕާނުގައި ކުޅުނު ޕްރި ސީޒަން ފްރެންޑްލީގައި ޗެލްސީއިން 2-1ގެ ނަތީޖާއަކުން ވަރުގަދަ ބާސެލޯނާ ބަލިކޮށްފިއެވެ.

ހަމަހަމަ ކުޅުމެއް ފެނިގެން ދިޔަ މި މެޗުގެ ފުރަތަމަ ހާފުގައި ޗެލްސީގެ އަބްރަހަމް ވަނީ ލަނޑު ޖަހާ ޗެލްސީއަށް ލީޑު ނަގައިދީފައެވެ. މި ލަނޑު އޭނާ ކާމިޔާބު ކުރީ ބާސެލޯނާގެ ކީޕަރު ބީޓު ކުރުމަށް ފަހުއެވެ. މި ލަނޑާއިއެކު މެޗުގެ ފުރަތަމަ ހާފު ނިމިގެންދިޔައީ ޗެލްސީ ކުރީގައި އޮވެގެންނެވެ.

މެޗުގެ ދެވަނަ ހާފުގައި ވެސް ޗެލްސީގެ ފަރާތުން މޮޅު ކުޅުމެއް ފެނިގެންދިޔައެވެ. އެގޮތުން ޗެލްސީއިން ވަނީ ބާސެލޯނާގެ ގޯލަށް ގިނަ ހަމަލާތަކެއް ފޮނުވައިލައިފައެވެ. މެޗުގެ 81 ވަނަ މިނެޓުގައި ޗެލްސީގެ ރޯސް ބާރކްލޭ ވަނީ އިތުރު ލަނޑެއްޖަހާ ލީޑު ފުޅާ ކޮށްފައެވެ. މި މެޗުގައި ބާސެލޯނާއިން ކާމިޔާބު ކުރި ހަމައެކަނި ލަނޑު އެޓީމަށް ކާމިޔާބު ކޮށްދިނީ އިވާން ރަކިޓިޗްއެވެ.

މި މެޗުގައި ބާސެލޯނާގެ ތަރި ލިއޮނަލް މެސީ ކުޅެފައެއްނުވެއެވެ. ނަމަވެސް މި މެޗުގައި ބާސެލޯނާއާއި އަލަށް ގުޅުނު ފްރާންސްގެ ތަރި ގްރީޒްމަން ވަނީ ކުޅެން އަރާފައެވެ. މި މެޗުގެ ތަރިޔަކަށް ވެގެން ދިޔައީ ޗެލްސީއަށް ލަނޑު ޖަހައިދިން އަބްރަހަމްއެވެ.