ހަމާސްގެ އަސްކަރީ ވެރިޔާ މުހައްމަދު ދައިފް، ގާޒާ ގެ ޚާން ޔޫނިސް އަށް އިޒްރޭލުން ޖުލައި 13 ވަނަ ދުވަހު ދިން ހަމަލާގައި މަރުވެފައިވާ ކަން ޔަގީން ކުރެވިއްޖެ ކަމަށް އިޒްރޭލުގެ އަސްކަރިއްޔާ އިން ބުނެފިއެވެ.

އިޒްރޭލުން މި ބުނާ ބުނުން ކަށަވަރު ކުރެވޭނެ މައުލޫމާތެއް މިހާތަނަށް ހަމާސް އިން ހާމަ ކޮށްފައެއް ނުވެއެވެ.

އިޒްރޭލުން ދެކެނީ ހުސްވި އަހަރުގެ އޮކްޓޯބަރު މަހުގެ 7 ވަނަ ދުވަހު ދެކުނު އިޒްރޭލަށް ދިން ކުއްލި ހަމަލާ ރޭވުމުގައި އިސްކޮށް ހުރި އެއްފަރާތަކީ ހަމާސްގެ އަސްކަރީ ވެރިޔާ ދައިފް ކަމަށެވެ.

އަނެއްކޮޅުން ހަމާސްގެ ސިޔާސީ ވެރިޔާ އިސްމާއީލް ހަނިއްޔާ، އީރާނުގައި ހުންނަވަނިކޮށް ބުދަ ދުވަހުގެ ފަތިހުގެ ވަގުތެއްގައި ވަނީ ޝަހީދު ކޮށްލާފައެވެ. ހަނިއްޔާ އަވަހާރަ ކޮށްލުމުގެ ހަމަލާ ދިން ކަމަށް އިޒްރޭލުން އަދި ސީދާ ގޮތެއްގައި އެއްބަސްވެފައި ނެތަސް އީރާނުން އެންމެ ފުރަތަމަ ވެސް އެ ހަމަލާގެ ޒިންމާ އަޅުވާފައި ވަނީ އިޒްރޭލުގެ ބޮލުގައެވެ.

ހަމާސްގެ އަސްކަރީ ވެރިޔާ މުހައްމަދު ދައިފްގެ މަރާ ބެހޭ ގޮތުން އިޒްރޭލުގެ އަސްކަރިއްޔާ އިން ބުރާސްފަތި ދުވަހު ނެރުނު ބަޔާނުގައި ބުނެފައިވަނީ އިޒްރޭލުގެ އަސްކަރިއްޔާ ގެ އިންޓެލިޖެންސް އެސެސްމަންޓް ތަކުން ޖުލައި 13 ވަނަ ދުވަހުގެ ހަމަލާގައި ދައިފް މަރުވެފައިކަން ކަށަވަރު ކުރެވޭ ކަމަށެވެ.

ދައިފް ގެ މަރާ ބެހޭ ގޮތުން ހަމާސް އިން ހިންގާ ގާޒާގެ ސިއްހަތާ ބެހޭ ވުޒާރާ އިން ބުނެފައިވަނީ ޖުލައި 13 ގެ ހަމަލާގައި ފަލަސްތީނުގެ 90 މީހުން މަރުވި ކަމަށާއި އެހެން ނަމަވެސް މަރުވި މީހުންގެ ތެރޭގައި ދައިފް ނުހިމެނޭ ކަމުގައެވެ.

ދައިފް އަކީ ޔަހްޔާ ސިންވާރ އާ ޖެހިގެން ފަލަސްތީނުގައި ހުންނަ ހަމާސްގެ އެންމެ އިސް ފަރާތް ކަމަށް ވަނީ ބެލެވިފައެވެ.

ރިޕޯޓްތައް ބުނާ ގޮތުގައި މުހައްމަދު ދައިފް އަކީ، ހަމާސް ގެ ހަތިޔާރު އެޅި ގޮފި ކަމުގައިވާ އިއްޒުއްދީން އަލް-ގަސަމް ބްރިގޭޑްސްގެ ވެރިޔާ އެވެ. 2002 ވަނަ އަހަރުން ފެށިގެން ހަމާސްގެ އަސްކަރީ ހަރާކަތްތައް ހިންގުމުގެ އެންމެ އިސްފަރާތަކީ އޭނާއެވެ.

އިޒްރޭލުން މަރާލަން އެންމެ ބޭނުންވާ މީހުންގެ ލިސްޓްގައި ދައިފް ހިމަނާފައި އޮންނަތާ އެތައް އަހަރެއް ވެއްޖެކަމަށް ރިޕޯޓްތައް ބުނެއެވެ. ރެކޯޑް ކުރެވިފައިވާ ގޮތުގައި އޭނާގެ ފުރާނަ ދުއްވާލުމަށް ދިން ހަތް ހަމަލާ އަކުން ދައިފް ވަނީ ސަލާމާތް ވެފައެވެ.

ދައިފްގެ ފުރާނަ ދުއްވާލަން އިޒްރޭލުން މިހާތަނަށް ދިން އެންމެ ބޮޑު އެއް ހަމަލާއަކީ 2014 ވަނަ އަހަރު ގާޒާގެ ޝެއިޚް ރަދްވާންގެ ގެއަކަށް ދިން ހަމަލާއެވެ. އެހަމަލާގައި ދައިފްގެ އަންހެނުން ވިދާދް އާއި ކުޑަ ފިރިހެން ދަރިފުޅު އަލީ މަރުވިއެވެ. އިޒްރޭލުން ހީކުރީ އެ ހަމަލާ ގައި ދައިފް ވެސް މަރުވި ކަމަށެވެ. އެހެން ނަމަވެސް ފަހުން އެނގުނީ އިޒްރޭލުން ހަމަލާ ދިން އިރު އެ އިމާރާތުގައި ދައިފް ނެތް ކަމެވެ.