ނަތަންޔާހޫ އެމެރިކާގެ ކޮންގްރެސް ގައި ހެއްދެވީ ހުސް ދޮގު: ހަމާސް

އިޒްރޭލުގެ ބޮޑު ވަޒީރު ބެންޔަމިން ނަތަންޔާހޫ އެމެރިކާ ގާނޫނު ހަދާމަޖިސް ގައި ބުދަ ދުވަހު ދެއްވި ތަގުރީރުގައި ވަނީ ހުސް ދޮގު ކަމަށާއި، އެކަމުން ދޭހަ ވަނީ ސުލްހަ ގެނައުމަށް އޭނާ ސީރިއަސް ނޫންކަމާއި، ހަނގުރާމަ ހުއްޓާލަން ބޭނުން ނުވާކަން ކަމުގައި ހަމާސް އިން ބުނެފިއެވެ.

ހަމާސް އާ ހަވާލާދީ ރޮއިޓާސް އިން ބުނެފައިވަނީ، ހަނގުރާމަ ނިމުމަކަށް ގެނައުމަށް ކުރެވޭ ހުރިހާ މަސައްކަތަކަށް ހުރަސް އަޅަނީ ވެސް އަދި ރަހީނު ކޮށްފައި ތިބި އިޒްރޭލު މީހުން މިނިވަން ކުރުމަށް ހުރަސް އަޅަމުން ގެންދަނީ ވެސް ނަތަންޔާހޫ ކަމަށެވެ.

ނަތަންޔާހޫ އެމެރިކާގެ ކޮންގްރެސް ގައި ތަގުރީރު ކުރައްވަމުން ގެންދެވި އިރު ގާނޫނު ހަދާ މަޖިލީހުގެ ބޭރުގައި ނަތަންޔާހޫ އާ ދެކޮޅަށް މުޒާހަރާތައް ދިޔައީ ކުރިއަށެވެ.

ގާޒާ ހަނގުރާމަ އާ ދެކޮޅު ހެދުމުގެ ގޮތުންނާއި ހަމާސްގެ ހައްޔަރުގައ ތިބި އިޒްރޭލުގެ ރަހީނުން މިނިވަން ކުރުމަށް އެއްބަސްވުމުކަށް އައުމުގައި ލަސްވަމުންދާ ކަމަށް ބުނެ އެތައް ސަތޭކަ ބަޔަކު ގެންދިޔައީ ނަތަންޔާހޫ އަށް އަމާޒު ކޮށް ރުޅިވެރި ކަމުގެ ޝުއޫރު ފާޅު ކުރަމުންނެވެ.

އެމެރިކާގެ ކޮންގްރެސް ގައި ޔަތަންޔާހޫ ކުރެއްވި ތަގުރީރު ގައި އިޒްރޭލުން ފަލަސްތީނު ރައްޔިތުންނާ ދެކޮޅަށް ކުރަމުންދާ ހަނގުރާމަ އަކީ ރަނގަޅު ކަމެއްގެ ގޮތުގައި ދެއްކެވުމަށް މަސައްކަތް ކުރެއްވި އިރު ބުދަ ދުވަހުވެސް ޔަހޫދީ ސިފައިން ގެންދިޔައީ ފަލަސްތީނު ރައްޔިތުންނަށް އަނިޔާވެރި ހަމަލާތައް ދެމުންނެވެ. ގާޒާ ސަރުކާރުގެ މީޑިއާ އޮފީހުން ބުނެފައިވަނީ ޚާން ޔޫނިސްގެ ސަލާހުއްދީން މަގުގައި ހަރަކާތެއް ހުރި ކޮންމެ އެއްޗަކަށް ޔަހޫދީ ސިފައިން ގެންދިޔައީ ބަޑި ޖަހަމުން ކަމަށެވެ. ޒަޚަމްވެފައިވާ މީހުންނަށް އެހީވުމަށް މަސައްކަތް ކުރާ މެޑިކަލް ޓީމަށް ވެސް ޔަހޫދީ ސިފައިން ހަމަލާ ދިން ކަމަށް މީޑިއާ އޮފީހުން އަލްޖަޒީރާ އަށް މައުލޫމާތު ދެމުން ބުނެފައިވެއެވެ.

ޚާން ޔޫނިސް އަށް މިފަހުން ޔަހުދީ ސިފައިން އަރާ ދިން ހަމަލާތަކުގައި ފަލަސްތީނުގެ 129 މީހުން މަރުވެފައިވާ ކަމަށް ރިޕޯޓްތައް ބުނެއެވެ. އަނެއްކޮޅުން އަމިއްލަ ގެދޮރުން ނުކުމެ ޚާން ޔޫނިސް ދޫކޮށް ދިއުމަށް މަޖުބޫރު ކުރުމުގެ ސަބަބުން އެ ތަނުގެ އާބާދީގެ 150،000 މީހުން މަގުމަތިވެފައިވާ ކަމަށް ޚަބަރުތައް ބުނެއެވެ.

ފަލަސްތީނުގެ ވަފާ ނިއުސް އޭޖެންސީ ބުނާ ގޮތުގައި ގާޒާ ސިޓީގެ ޝެއިޚް ރަދްވާން ސަރަހައްދަށް ޔަހޫދީ ސިފައިން ބުދަ ދުވަހު ހަމާލާ ދިނުމުގެ ސަބަބުން މަދުވެގެން ހަތަރު މީހުން ވަނީ މަރުވެފައެވެ. އޭގެ ތެރޭގައި ކުޑަކުދިންނާ އަންހެނުންވެސް ހިމެނެއެވެ.

ގާޒާ ގައި އިޒްރޭލުން ކުރަމުންދާ ހަނގުރާމައިގައި މިހާތަނަށް 39،145 ފަލަސްތީން މީހުން ވަނީ ޝަހީދު ވެފައެވެ. އޭގެ އިތުރުން 90،257 މީހުން ޒަޚަމްވެފައިވެއެވެ.