މެންޗެސްޓަރ ސިޓީ އަށް ކުޅެމުން އަންނަ ބެލްޖިއަމްގެ މިޑްފީލްޑަރު ކެވިން ޑި ބްރޭނާ ހޯދުމުގެ މަސައްކަތް، ސައުދީ ޕްރޯ ލީގުގެ އަލް އިއްތިހާދުން ކުރަމުން ނުދާ ކަމަށް މީޑިއާ ރިޕޯޓުތައް ބުނެފި އެވެ.
މީޑިއާ ތަކުގައި ބުނެފައިވާ ގޮތުން އުމުރުން 33 އަހަރުގެ ކުޅުންތެރިޔާ ހޯދުމުގެ މަސައްކަތް އަލް އިއްތިހާދުން ކުރި އެވެ. އަދި އެ މަސައްކަތުގައި އަލް އިއްތިހާދުން ވަނީ ޑި ބްރޭނާ އާއެކު އެއްބަސްވުމަކަށް އައިސްފައި ކަމަށް ވެސް މީގެ ކުރިން ވަނީ ރިޕޯޓުކޮށްފަ އެވެ.
ނަމަވެސް، މީީޑިއާ ތަކުގައި މި ފަހުން ބުނެފައިވާ ގޮތުގައި ޑި ބްރޭނާ ހޯދުމުގެ މަސައްކަތް އަލް އިއްތިހާދުން ނުކުރެ އެވެ. އަދި އޭނާ އާއެކު، އެއްްވެސް އެއްބަސްވުމަކަށް އައިސްފައި ނުވާ ކަމަށް ވެސް ރިޕޯޓުތަކުގައިވެ އެވެ.
އޭގެ ބަދަލުގައި އަލް އިއްތިހާދުން މަސައްކަތް ކުރަނީ މެންޗެސްޓަރ ސިޓީ އަށް ކުޅެމުން އަންނަ ބްރެޒިލްގެ ގޯލު ކީޕަރު އެޑާސަން ހޯދުމަށް ކަމަށް ސައުދީގެ މީޑިއާ ތަކުގައި ވަނީ ބުނެފަ އެވެ. އެގޮތުން މި ހަފްތާގެ ތެރޭގައި އަލް އިއްތިހާދުން ސިޓީ އާއެކު އިތުރު މަޝްވަރާތަކެއް ކުރިއަށް ގެންދާނެ ކަމަށް ރިޕޯޓުކޮށްފައިވެ އެވެ.
ސިޓީ އާއެކު އެޑާސަން ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އެއްބަސްވުމުގައި ބާކީ ދެ އަހަރު އޮއްވާ އެޑާސަން ބޭނުން ވަނީ ސިޓީ ދޫކޮށްލަން ކަމަށް ރިޕޯޓުތައް ބުނެ އެވެ. މީގެ ކުރިން އެޑާސަން ހޯދުމުގެ މަސައްކަތް އަލް ނަސްރުން ވެސް ވަނީ ކޮށްފަ އެވެ.
އެ ކުލަބަށް އެޑާސަން ނުހޯދުނީ ސިޓީން ހުށަހަޅާ އަގަށް އެއްބަސް ނުވެވުމުން ކަމަށް ރިޕޯޓުތައް ބުނެ އެވެ. އެޑާސަން ދޫކޮށްލުމަށް ސިޓީން ހުށަހަޅާ އަގަކީ މަދުވެގެން 50 މިލިއަން ޔޫރޯ އެވެ. އެ އަގަށް އެއްބަސް ނުވެވުމުން އަލް ނަސްރުން ވަނީ އެޑާސަންހެ ބަދަލުގައި ބްރެޒިލްގެ ކީޕަރު ބެންޓޯގެ ސޮއި ހޯދައިފަ އެވެ.
