ސްޕޭނާއި ޔޫރަޕުގެ ޗެމްޕިަން ރެއާލް މެޑްރިޑުގެ ކުޅުންތެރިއެއްގެ ގޮތުގައި ފްރާންސްގެ ކެޕްޓަން ކީލިއަމް އެމްބާޕޭ ދައްކާލައިފި އެވެ.

ފްރާންސްގެ ޕީއެސްޖީ ދޫކޮށްލި ކުޅުންތެރިޔާ ރެއާލް އަށް ސޮއިކުރީ ފަސް އަހަރު ދުވަހަށެވެ. މެޑިކަލް ހަދައި ރެއާލްގެ ކޮންޓްރެކްޓްގައި ސޮއިކުރުމަށްފަހު ސަޕޯޓަރުންނަށް އޭނާ ދައްކާލުން ބޭއްވީ ރެއާލްގެ ސްޓޭޑިއަމް ކަމަށްވާ ސެންތިއާގޯ ބާނަބައުގަ އެވެ. މި ރަސްމިއްޔާތަށް 80000 މީހުން ޖަމާވި ކަމަށް ރެއާލް މެޑްރިޑުން ބުނެ އެވެ.

އެމްބާޕޭ އަށް ރެއާލްގައި އާމްދަނީގެ ގޮތުގައި އަހަރަކު ލިބޭނީ 12.5 މިލިއަން ޔޫރޯ އެވެ. މިއީ ޕީއެސްޖީގައި ލިބުނު އަދަދަކަށްވުރެ 60 އިންސައްތަ މަދު އަދަދެއް ކަމަށްވެ އެވެ. ނަމަވެސް އޭނާ ރެއާލް އަށް ބަދަލުވީ ކުޑައިރުއްސުރެ އެކުލަބަށް ކުޅެން ދެކެމުން އައި ހުވަފެން ހަގީގަތަކަށް ހެދުމަށެވެ.

އެމްބާޕޭ ރެއާލް އަށް ބަދަލުވިއިރު އޭނާ މިކަން ކުރިޔަ ނުދޭނެ ފްރާންސްގެ ސަރުކާރާއި ގަތަރު ސަރުކާރުން ވެސް މަސައްކަތްކުރި އެވެ. މި ގޮތުން ގަތަރުގެ ބެއިން ސްޕޯޓްސްއިން ފްރާންސް ލީގު ސްޕޮންސާކޮށް އޭގެ ފައިދާގެ ބައެއް އެމްބާޕޭއަށް ދޭން ވެސް ހުށަހެޅި އެވެ.

އޭނާ ރެއާލް މެޑްރިޑްގައި ބޭނުންކުރާނީ ނުވަ ނަންބަރު ޖާޒީ އެވެ. އާއްމުކޮށް އޭނާ ލައި އުޅޭ 10 ނަންބަރު ޖާޒީ ނުލިބުނީ ރެއާލް އަށް ކުޅޭ ކްރޮއޭޝިޔާގެ ކެޕްޓަން ލޫކާ މޮޑްރިޑް މިދިޔަ ސީޒަނަށް ފަހު ކުޅުން ހުއްޓާނުލުމުންނެވެ.

ނުވަ ނަންބަރުގައި އެންމެ ފަހުން ރެއާލްގައި ވިދާލި ދުނިޔޭގެ ފެންވަރުގެ ދެ ކުޅުންތެރިންނަކީ ފްރާންސްގެ ފޯވަޑް ކަރީމް ބެންޒެމާ އާއި ބްރެޒިލްގެ ރޮނާލްޑޯ އެވެ. އަދި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ވެސް އެންމެ ފުރަތަމަ ރެއާލްގައި ބޭނުންކުރީ 9 ނަންބަރު ޖާޒީ އެވެ.