ބުދަ 28 އޮކްޓޯބަރ 2020
11 ހެއި
1442 ރަބީއުލް އައްވަލް 11
ފަތިސް 04:36
އިރުއަރާ 05:49
މެންދުރު 11:54
އަސްރު 15:11
އިރުއޮއްސޭ 17:51
އިޝާ 19:04
މާލޭ ލީގު

މާލޭ ލީގު: ރިޒޭގެ ހެޓްރިކާއެކު ބޮޑު ތަފާތަކުން މާޒިޔާ ބަލިކޮށް އީގަލްސް ފެންވަރު ދައްކާލައިފި

  • މާޒިޔާގެ މައްޗަށް އީގަލްސް ކުރިހޯދީ 0-4 ގެ ނަތިޖާއަކުން
  • އިގަލްސް ވަނީ ޕޮއިންޓް ތާޥަލުގެ ހަތަރުވަނަ އަށް ޖެހިލާފައި
  • މާޒިޔާ އޮތީ އަދިވެސް ޕޮއިންޓް ތާވަލުގެ އެއްވަނައިގައި

ކ. މާލެ | 23 ޖޫން 2017 | ހުކުރު 16:51 | 2,740

މާޒިޔާ އާއި އީގަލްސް ބައްދަލުކުރި މެޗުގެ ތެރެއިން - މާޒިޔާ ސްޕޯރޓްސް ކްލަބް

މާލޭ ލީގުގައި އަހުމަދު ރިޒްވާން (ރިޒޭ) ގެ ހެޓްރިކާއެކު ބޮޑު ތަފާތަކުން މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް އީގަލްސް ފެންވަރު ދައްކާލައިފި އެވެ.

ބުރާސްފަތި ދުވަހުގެ ރޭ ލީގުގެ ދެވަނަ ބުރު ހުޅުވި މެޗުގައި ވަރުގަދަ މާޒިޔާއާ ވާދަކޮށް އީގަލްސް އިން މެޗު ކާމިޔާބުކުރީ 0-4 ގެ ނަތީޖާއަކުންނެވެ.

ގަލޮޅު ރަސްމީ ދަނޑުގައި ކުޅުނު މި މެޗުގެ ފުރަތަމަ ހާފްގައި މާޒިޔާގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، ލީޑު ނެގުމަށްވެސް އެޓީމަށް ވަނީ ފުރުސަތުތަކެއް ލިބި ބޭކާރުވެފައެވެ.

މީގެއިތުރުން އީގަލްސްއަށް ވެސް ވަނީ ފުރަތަމަ ހާފްގައި ލީޑު ނެގުމަށް ރަނގަޅު ފުރުސަތުތަކެއް ލިބި ބޭކާރުވެފައެވެ. އެގޮތުން އަހުމަދު ނާޝިދު (ނައްޓޭ) އަށް ލިބުނު ފުރުސަތުތައް ހިމެނެއެވެ.

ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން އީގަލްސް އިން ވަނީ އެޓީމުގެ ކުޅުން ރަނގަޅުކޮށް އެޓޭކްތައް ވަރުގަދަކޮށްފައެވެ. އެގޮތުން ކައުންޓާގައި އީގަލްސްގެ ރިޒޭ އަށް މުޅިން ހުސް ބޯޅައެއް ލިބިފައިވާއިރު، އޭނާ ވަނީ މާޒިޔާ ދެ ކުޅުންތެރިން ކައިރިން ނައްޓާލުމަށްފަހު ގޯލު ތެރެއަށް ފޮނުވާލައިގެން އެޓީމަށް ލީޑު ނަގައިދީފައެވެ.

މި ލަނޑަށްފަހު މާޒިޔާ އިން ވަނީ ކުރިޔަށް ޖެހި ނަތީޖާ ހަމަހަމަ ކުރުމަށް ބުރަ މަސައްކަތްކޮށްފައެވެ. އެހެންނަމަވެސް 74 ވަނަ މިނެޓުގައި ރިޒޭ ވަނީ އީގަލްސް އަށް މެޗުގެ ލީޑު ފުޅާކޮށްދީފައެވެ.

މެޗުގެ 79 ވަނަ މިނެޓުގައި މާޒިޔާގެ އަސަދުﷲ އަބްދުﷲ (އަސައްކޮ) އަށް ނަތީޖާގެ ފަރަގު ކުޑަކުރުމަށް ފުރުސަތު ލިބިފައިވާއިރު، އޭނާ ފޮނުވާލު ބޯޅަ އީގަލްސްގެ ބިދޭސީ ކީޕަރު ސުޖަން ޕެރޭރާ ވަނީ ހުށިއާރުކަމާއެކީ ދިފާއުކޮށްފައެވެ.

އީގަލްސް އިން ތިންވަނަ ލަނޑު ޖެހީ 83 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ މުހައްމަދު ނާއިމް އެވެ. އޭނާ މި ލަނޑު ކާމިޔާބުކުރީ އޭރިޔާ ބޭރުން ފޮނުވާލި ބާރު ޝޮޓަކުންނެވެ.

އީގަލްސް އިން މެޗުގައި ޖެހި ހަތަރުވަނަ ލަނޑު އިތުރުވަގުތު ތެރޭގައި ކާމިޔާބުކޮށް ރިޒޭ ވަނީ މެޗުގައި އޭނާގެ ހެޓްރިކް ފުރިހަމަކޮށްފައެވެ. ރިޒޭ އަންނަނީ މި ސީޒަނުގައި ރަނގަޅު ކުޅުމެއް ދައްކަމުންނެވެ.

މި ނަތީޖާއާއާއެކު އީގަލްސް 16 ޕޮއިންޓާއެކު ޕޮއިންޓް ތާވަލުގެ ހަތަރުވަނަ އަށް ޖެހިލާފައެވެ. މެޗުން ބަލިވި މާޒިޔާ އަދިވެސް 21 ޕޮއިންޓާއެކު އޮތީ އެއްވަނައިގައެވެ. އެހެންނަމަވެސް ހުކުރު ދުވަހުގެ ރޭ ޓީސީ އަތުން ނިއު މޮޅުވެއްޖެ ނަމަ ނިއު އިން މާޒިޔާއާ ޕޮއިންޓްގެ ގޮތުން ހަމަހަމަވާނެ އެވެ.

އެންމެ ފަހުން އަޕްޑޭޓް ކުރީ: 7 މަސް ކުރިން | ރިވިއު ކުރީ: ހުސެން ފިޔާޒް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.