ސުލްހައިގެ ވާހަކަ ތަކުން ހަމާސް ވަކިވަނީ

ގާޒާ ހަނގުރާމަ ނިމުމަކަށް ގެނައުމަށް ބާއްވަމުންދާ ސުލްހައިގެ ވާހަކަތަކުން ވަކިވުމަށް ހަމާސް އިން ނިންމައިފި ކަމަށް އެ ޖަމާއަތުގެ އިސް އޮފިޝަލަކު ބުނެފިއެވެ.

ހަމާސްގެ އިސް އޮފިޝަލަކު އޭއެފްޕީ އަށް އާދިއްތަ ދުވަހު ދިން ބަސްދީގަތުމެއްގައި ބުނެފައިވަނީ، ސުލްހައިގެ ވާހަކަތަކުން ހަމާސް ވަކިވާން ނިންމީ އިޒްރޭލުން ހުއްޓުމެއް ނެތި ހިންގަމުންދާ ގަތުލްއާންމުގެ ސަބަބުންނާއި މަޝްވަރާ ތަކުގައި އިޒްރޭލުގެ ފާޑު ހުންނަ ގޮތުން ކަމަށެވެ.

ގާޒާގެ ރެފިއުޖީ ކޭމްޕަކަށް ހޮނިހިރު ދުވަހު ޔަހޫދީ ސިފައިން ދިން ނުރައްކާތެރި ވަރުގަދަ ބޮމުގެ ހަމަލާ ގައި ފަލަސްތީނުގެ 92 މީހުން މަރުވެ، އެތައް ސަތޭކަ ބަޔަކު ޒަޚަމްވެފައިވާއިރު، އެ އުދުވާން އިޒްރޭލުން ހިންގީ ހަމާސްގެ އަސްކަރީ ވެރިޔާ މުހައްމަދު ދައިފް މަރާލުމުގެ ގޮތުން ކަމަށް އިޒްރޭލުން ބުނެފައިވާ އިރު، ހަމާސް ގެ އިސް އޮފިޝަލަކު ހާމަ ކޮށްފައިވާ ގޮތުގައި ދައިފް ހުރީ ހެޔޮ ހާލުގައި މަސައްކަތުގައި ކަމަށެވެ.

ހަމާސްގެ އޮފިޝަލް އިތުރަށް މައުލޫމާތު ދެމުން ބުނެފައިވަނީ، ގަތަރާއި މިސްރުން މަޝްވަރާތަކުގައި ބައިވެރިވާ ނިގޯޝިއޭޓަރުންނަށް އެމެރިކާގެ ރައީސް ބައިޑްން މެއި މަހު ހުށަހެޅުއްވި ސުލްހައިގެ ޕްލޭންގެ މަޝްވަރާ ތަކުގައި ކުރިއަށް ދާން ބޭނުން ނުވާކަން ހަމާސްގެ ލީޑަރު އިސްމާއީލް ހަނިއްޔާ މިހާރު ވަނީ އަންގާފައެވެ.

ހަމާސް އިން ބުނަމުންދަނީ މަޝްވަރާތަކުގައި އިޒްރޭލުން އެއްވެސް ސީރިއަސް ކަމެއް ނުދައްކާ ކަމަށާއި، ދިގުދެންމުމުގެ އުކުޅު ބޭނުން ކުރަމުންދާ ކަމަށާއި އަދި އެއްބަސްވުމަކަށް އައުމަށް ހުރަސް އަޅަމުންދާ ކަމުގައެވެ. އޭގެ އިތުރުން ހުއްޓުމެއްނެތި އެއްވެސް ކުށެއް ނެތް ފަލަސްތީނުގެ އާންމުން ޔަހޫދީ ސިފައިން މަރަމުން ގެންދިއުމަކީ ހަމާސް އިން މަޝްވަރާތަކާ ދުރައްދާން ޖެހުނު ސަބަބު ތަކުގެ ތެރޭގައި ފާހަގަ ކޮށްފައިވާ ކަންކަމެވެ.

ހަމާސް ގެ އޮފިޝަލް ފާހަގަ ކުރާ ގޮތުގައި އެ ޖަމާއަތުން ވަނީ ހަނގުރާމަ ހުއްޓާލުމަށް އެއްބަސްވުމަކަށް އައުމަށް ޓަކައި ދޫދޭންޖެހޭ ކިތަންމެ ކަމެއްގައި ދޫދީފައެވެ.

މިދިޔަ ހޮނިހިރު ދުވަހުގެ ރޭ ހަނިއްޔާ ނެރުނު ބަޔާނެއްގައި، ސުލްހައިގެ ވާހަކަ ތަކުގައި މެދުވެރިއެއްގެ ރޯލު އަދާ ކުރާ ފަރާތްތަކަށް ހަމަލާތައް ހުއްޓާލުމަށް އިޒްރޭލަށް ޕްރެޝަރ ކުރުމަށް ގޮވާލާފައިވެއެވެ.