ސްޕެއިން އަކީ ފޭވަރިޓުންނެއް ނޫން: ފުއެންޓޭ

ޖަރުމަނުގައި ކުރިއަށްދާ ޔޫރޯ ފުޓުބޯޅަ މުބާރާތުގެ ފައިނަލްގައި އިންގްލެންޑާ ދެކޮޅަށް ނިކުންނައިރު، ސްޕެއިން އަކީ ފޭވަރިޓުން ނޫން ކަމަށް އެ ޓީމުގެ ކޯޗު ލުއިސް ޑި ލާ ފުއެންޓޭ ބުނެފި އެވެ.

މިއަހަރުގެ ޔޫރޯ މުބާރާތުގައި ސްޕެއިން އިން ވަނީ ރަނގަޅު ކުޅުމެއް ދައްކައިފަ އެވެ. މުބާރާތުގެ ފައިނަލާ ހަމައަށް ސްޕެއިން ދަތުރު ކުރީ، ގްރޫޕް ސްޓޭޖުގެ އިތުރުން ގަދަ 16 ވަނަ ބުރު، ކުއާޓާ ފައިނަލް އަދި ސެމީ ފައިނަލްގެ މެޗުތަކުން މޮޅުވެގެންނެވެ. އެހެންކަމުން ގިނަ ބައެއްގެ ނަޒަރުގައި މުބާރާތް ކާމިޔާބު ކުރާނެ ހޮޓް ފޭވަރިޓުންނަކީ ސްޕެއިން އެވެ.

ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފުއެންޓޭ ބުނީ، މުބާރާތުގެ ފައިނަލަށް އާދެެވުމުން އުފާވެފައި ތިބި ކަމަށެވެ. އަދި ފައިނަލް މެޗާ ކުރިމަތިލާން ކެތްމެދުވެފައި ހުރި ކަމަށާއި، މިއީ ފުޓުބޯޅައިގެ އެންމެ މަތީ ފަންތީގައި ހިމެނޭ އެއް ޙަރަކާތް ކަމަށް ވެސް އޭނާ ބުންޏެވެ. ސްޕެއިންގެ ޓީމު އޮތީ ވަރަށް ހަމަޖެހިގެން ކަމަށާއި، ފައިނަލާ ކުރިމަތިލަނީ ފުރިހަމަ އަށް ތައްޔާރުވެ، ވިސްނުންތެރިކަމާއެކު ކަމަށް ވެސް ފުއެންޓޭ ބުންޏެވެ.

މުބާރާތުގެ ނޮކް އައުޓް ބުރުގެ މެޗުތަކުގައި ސްޕެއިން އިން ދައްކާފައިވާ ކުޅުމަށް އިޝާރާތްކޮށް ފުއެންޓޭ ބުނީ، އެ މެޗުތަކުގައި ދެއްކި ފެންވަރުގެ ކުޅުމެއް ފައިނަލްގައި ނުދައްކައިފި ނަމަ، ސްޕެއިން އަށް މޮޅުވުމުގެ އެއްވެސް ފުރުސަތެއް ނެތް ކަމަށެވެ. އަދި ގޯސްތަކެއް ހަދައިފި ނަމަ، އުންމީދު ވެސް ނުކުރާ ގޮތަކަށް ފައިނަލް މެޗު ގެއްލިދާނެ ކަމުގައި ވެސް އޭނާ ބުންޏެވެ. އެކަން ފާހަގަކޮށް ފުއެންޓޭ ބުނީ ފައިނަލަށް ނިކުންނައިރު ފޭވަރިޓުންނެއް ނެތް ކަމަށާއި، ސްޕެއިން އަކީ ފޭވަރިޓުން ނޫން ކަމަށެވެ.

ފައިނަލްގައި ބައްދަލު ކުރާ ދެ ޓީމަކީ މި މުބާރާތުގައި އޮތް އެންމެ ރަނގަޅު ދެ ޓީމުކަން ފުއެންޓޭ ޤަބޫލު ކުރެ އެވެ. އެހެންކަމުން ފައިނަލް މެޗުގައި ފެންނާނީ ވާދަވެރި އަދި މޮޅު ދެ ޓީމުގެ ކުޅުމެއް ކަމަށް ވެސް އޭނާ ބުންޏެވެ. ފައިނަލް މެޗު ވެގެން ދާނީ އުނދަގޫ އަދި ކޮންމެ ވަގުތެއް ވެސް ދިގު ދެމިގެންދާ އިޙުސާސް ކުރެވޭ ކަހަލަ މެޗަކަށް ކަމަށް ވެސް އޭނާ ވަނީ ބުނެފަ އެވެ. ފުއެންޓޭ ފާހަގަ ކުރި ގޮތުގައި ފައިނަލް މެޗުގެ ކޮންމެ ހިސާބެއްގައި ވެސް ޙާލަތު ބަދަލުވުމަކީ އެކަށީގެންވާ ކަމެއް ކަމަށެވެ. އެހެންކަމުން ކުޅެން ޖެހޭނީ ވީވަރަކުން ގޯސްތައް މަދުކޮށްގެން ކަމަށް ވެސް އޭނާ ބުންޏެވެ.

މީގެ ކުރިން ތިން ފަހަރެއްގެ މަތިން މުބާރާތް ކާމިޔާބު ކޮށްފައިވާ ސްޕެއިންގެ ކޯޗު ކަމާ ފުއެންޓޭ ހަވާލުވީ 2022 ވަނަ އަހަރުގެ ޑިސެމްބަރު މަހުގެ ތެރޭގަ އެވެ. މިއަހަރުގެ ޔޫރޯ މުބާރާތް ސްޕެއިން އިން ކާމިޔާބު ކޮށްފި ނަމަ، އެ ޓީމު ވެގެން ދާނީ މުބާރާތުގެ އެންމެ ކާމިޔާބު ޓީމަށެވެ.