ސުލްހައިގެ އެއްބަސްވުމަކަށް އާދެވުނު ކަމަށް ދެކެވޭ ވާހަކަ އަކީ ދޮގެއް: ހަމާސް

ގާޒާ ހަނގުރާމަ ނިމުމަކަށް ގެނެވޭތޯ ކުރަމުންދާ މަޝްވަރާތަކުގައި އިޒްރޭލާ ހަމާސް އިން އެއްބަސްވުމަކަށް އާދެވިއްޖެ ކަމަށް އެމެރިކާގެ މީޑިއާ އިން ފަތުރާ ޚަބަރަކީ ހަގީގަތެއް ނޫން ކަމަށް ބުރާސްފަތި ދުވަހު ފަލަސްތީންގެ ހަމާސް އިން ބުނެފިއެވެ.

ހަމާސްގެ އިސް އޮފިޝަލަކަށް މިކަމާ ގުޅޭ ގޮތުން މެދުއިރުމަތީގެ އޮންލައިން ނޫހެއް ކަމަށްވާ މިޑްލްއީސްޓް އައި އިން ސުވާލު ކުރުމުން އޭނާ ބުނެފައިވަނީ ސުލްހައިގެ ވާހަކަ ތަކާ ބެހޭ ގޮތުން "ދޭނެ އައު މައުލޫމާތެއް ނެތް،" ކަމަށެވެ.

ގަތަރުގެ ވެރިރަށް ދޯހާގައި އެމެރިކާ އާއި އިޒްރޭލް އަދި މިސްރާއި ގަތަރު ހިމެނޭ ގޮތުން ކުރިއަށް ދިޔަ ވާހަކަ ތަކުގައި އެންމެ ބޮޑު ހުރަހެއް ކުރިމަތިވަނީ އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫގެ ސަބަބުން ކަމަށް ހަމާސްގެ އޮފިޝަލް ވަނީ ބުނެފައެވެ.

އިޒްރޭލްގެ ބޮޑުވަޒީރު ގޮތް ދޫކުރެއްވުމެއް ނެތި ތަކުރާރު ކޮށް ވިދާޅުވަމުން ގެންދަވަނީ ހަމާސް މުޅިން ފޮހެލެވެންދެން ހަނގުރާމަ ހުއްޓާ ނުލައި ކުރިއަށް ގެންދަވާނެ ކަމަށެވެ.

ހަމާސްގެ އޮފިޝަލަކު މިހެން ބުނެފައި ވާއިރު ބުދަ ދުވަހު އެމެރިކާގެ ވޮޝިންގޓަން ޕޯސްޓްގައި ނަން ހާމަ ނުކުރާ އެމެރިކާގެ އޮފިޝަލަކާ ހަވާލާދީ ބުނެފައިވަނީ ހަނގުރާމަ ހުއްޓާލުމުގެ ފްރޭމްވޯކް އަށް އެއްބަސްވެއްޖެ ކަމަށާއި މިހާރު މަޝްވަރާ ކުރަމުންދަނީ ފްރޭމްވޯކް ތަންފީޒް ކުރާނެ ގޮތުގެ އިތުރު ތަފްސީލް ތަކާ ގުޅޭގޮތުން ކަމަށެވެ.

ހަމާސް އިން ވަނީ ވޮޝިންގޓަން ޕޯސްޓްގެ މި ރިޕޯޓް ދޮގުކޮށްފައެވެ.

ގާޒާގެ ހަނގުރާމަ ހުއްޓުމަކަށް ގެނެވޭތޯ ހަމާސް އާއި އިޒްރޭލުން މެދުވެރިން ބޭނުން ކޮށްގެން ޖަނަވަރީ މަހުން ފެށިގެން މަޝްވަރާތައް އަންނަނީ ބާއްވަމުންނެވެ. އެހެން ނަމަވެސް މިހާތަނަށް ސުލްހަ ގެނެވޭތޯ ކުރި މަސައްކަތުން އެދެވޭ ނަތީޖާއެއް ފެނިފައެއް ނުވެއެވެ.