މިނިވަން މުއައްސަސާތަކުގެ މެމްބަރުންގެ އަދަދުކޮށް، ބައެއް މުއައްސަސާތައް އުވާލާނެ ކަމަށް ސަރުކާރުން ބުނެފިއެވެ.
ޕީއެންސީގެ ޖަގަހަ ޖަލްސާގައި ވާހަކަދައްކަވަމުން ރައީސް ޑރ.މުހައްމަދު މުއިއްޒު ވަނީ މިހާރު މިނިވަން މުއައްސަސާތަކުގައި ތިބި މެމްބަރުންގެ އަދަދަކީ ވަރަށް ބޮޑު އަދަދެއް ކަމަށް ފާހަގަކުރައްވާފައެވެ. އެގޮތުން ރާއްޖޭގައި ނުކަތާ ވަރަށް މުއައްސަސާތައް އުފައްދާފައި އެބަހުރި ކަމަށް އެމަނިކުފާނު ވިދާޅުވިއެވެ.
އެމަނިކުފާނުގެ ވިސްނުންފުޅަކީ ކުރިއަށް އޮތް ތަނުގައި މުއައްސަސާތައް މަދުކުރުން ކަމަށް ފާހަގަކުރައްވާ އެމަނިކުފާނު ވަނީ މެމްބަރުންގެ އަދަދު މަދުކުރުމަށް ޤާނޫނަށް އިސްލާހު ހުށަހަޅުއްވާނެ ކަަމަށް ވިދާޅުވެފައެވެ.
އެމަނިކުފާނު ވިދާޅުވީ ރައްޔިތުންނަށް ތެދުވެރިކަމާއި އިހްލާސްތެރިކަމާ އެކީގައި ހިދުމަތް ކުރާ ނަމަ މިނިވަން މުއައްސަސާތަކުގައި ގިނަ މެމްބަރުން ތިބުން މުހިންމު ނޫން ކަމަށެވެ. މީގެ އިތުރުން އެއް މަސައްކަތެއްކުރާ ގިނަ ކޮމިޝަން ރާއްޖޭގައި އުފައްދާފައިވާކަމަށް ވެސް ރައީސް މުއިއްޒު ވަނީ ވިދާޅުވެފައެވެ. އެފަދަ މުއައްސަސާތައް އެއްކޮށްލާނެ ކަމަށާއި ބައެއް ކޮމިޝަންތައް އުވާލުމުގެ މަސައްކަތްވެސް ކުރައްވާނެ ކަމަށް އެމަނިކުފާނު ވިދާޅުވިއެވެ.
އޭގެ އެފިޝިއަންސީ އިތުރުކޮށް މި ދެންނެވި ގޮތަށް އެއްޒާތެއްގެ މަސައްކަތް ކުރާ މުއައްސަސާތައް އެއްކޮށްލުމަކީ ކުރެވޭނެ ކަމެއް. ނަތީޖާއަކަށް ވާނީ ގިނަ ކޮމިޝަންތަކެއް ނުވަތަ ބޮޑީތަކެއް ހުރުމުގެ ބަދަލުގައި ރައްޔިތުންނަށް އޭގެ ނަތީޖާ ނެރެވޭ ފަދަ އެފިޝިއެންޓް ނިޒާމެއް ޤާއިމްވުން. މިދެންނެވި އިސްލާހުތައް ގެންނާނަން. ގެނައިމަ ޚަރަދުގެ ގޮތުން ބަޖެޓުން ވަރަށް ބޮޑުތަނެއް ސަލަމަތްކުރެވޭނެ.ރައީސް ޑރ.މުހައްމަދު މުއިއްޒު
ރާއްޖޭގައި މިހާރު ހުރި މިނިވަން މުއައްސަސާތަކުގެ ތެރޭގައި ހިއުމަން ރައިޓްސް ކޮމިޝަން، ޕޮލިސް އިންޓަރގްރިޓީ ކޮމިޝަން، ސިވިލް ސަރވިސް ކޮމިޝަން، ބްރޯޑްކާސްޓިން ކޮމިޝަން ފަދަ ކޮމިޝަންތައް ފާހަގަކުރެވެއެވެ. މިނިވަން މުއައްސަސާތަކަށް ބޭފުޅުން އައްޔަންކުރައްވަނީ ރައީސުލްޖުމްހޫރިއްޔާ ފޮނުއްވާ ނަންތައް ދިރާސާކޮށް ރައްޔިތުންގެ މަޖިލީހުން ނިންމާ ގޮތެއްގެ މަތިން ރައީސުލްޖުމްހޫރިއްޔާއެވެ. މިނިވަން މުއައްސާތަކަށް ބަދަލުގެންނަވަން ނިންމެވިކަން ރައީސް ހާމަކުރެއްވި ނަމަވެސް އެކަމުގެ ތަފްސީލް ހިއްސާކުރައްވާފައެއް ނުވެއެވެ.
