ސްޓޫޑަންޓް ލޯނު ދިނަސް ކޭޝް ފްލޯއަށް ދައްޗެއް ނުވާނެ: މިނިސްޓަރު

ސްޓޫޑަންޓް ލޯނަށް ޝަރުތުހަމަވާ ހުރިހާ ދަރިވަރުންނަށް ލޯނު ދިން ނަމަވެސް ދައުލަތުގެ ކޭޝް ފްލޯއަށް އެއްވެސް ދައްޗެއް ނުވާނެ ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހީމް ހަސަން ވިދާޅުވެއްޖެއެވެ.

ބުރާސްފަތި ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ދެންނެވި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ އިއުލާނުކުރި އަދަދަށްވުރެ އިތުރު ދަރިވަރުންނަށް ސްޓޫޑެންޓް ލޯން ދޭން ނިންމީ މިނިސްޓްރީ އޮފް ފިނޭންސާއެކު މަޝްވަރާތަކެއް ކުރުމަށް ފަހުގައި ކަމަށެވެ.

މިނިސްޓަރު ވިދާޅުވީ ސްޓޫޑެންޓް ލޯނު ލިބޭ ދަރިވަރުންގެ ތެރެއިން އެ އަހަރު ތެރޭގައި އެންމެ ގިނަވެގެން ވެސް ފުރައިގެން ގޮސްފައިވަނީ 60 އިންސައްތަ ދަރިވަރުން ކަމަށެވެ. މިއަހަރު ވެސް 18 މަސް ދުވަސްތެރޭގައި ފުރައިގެން ދިއުމުގެ ފުރުސަތު ދަރިވަރުންނަށް ދީފައިވާއިރު މި ނިންމުމުން ކޭޝް ފްލޯއަށް އަސަރެއް ނުކުރާނެ ކަމަށެވެ.

މިނިސްޓަރުގެ ވާހަކަަފުޅުގައި ވަނީ 2018 ވަނަ އަހަރު ކުރީ ސަރުކާރުން ބަޖެޓު ހަމަނުޖައްސައި ލޯނަށް އިއުލާނުކުރި ކުރުން ފާހަގަކުރައްވާފައެވެ. އެގޮތަށް އެކަން ކުުރުމުން އެ ދަރިވަރުންގެ ލޯނު ފައިސާ ހަމަޖައްސަން ޖެހުނީ މި ސަރުކާރަށްކަން މިނިސްޓަރު ފާހަގަކުރެއްވިއެވެ.