ތޫނު ހަތިޔާރު ބޭނުންކޮށްގެން މާރާމާރީ ހިންގައި ހުއްދަ ނޫން ގޮތުގައި މީހުން ހިފެހެއްޓުމުގެ މައްސަލަައިގައި 18 އަހަރާއި 23 އަހަރުގެ 3 ޒުވާނަކު ބަންދުކޮށްފިއެވެ.

ފުލުހުން އެދިގެން ނެރެފައިވާ ބަންދު އަމުރުގައި ބުނެފައިވަނީ މި މައްސަލައިގައި ހައްޔަރުކޮށްފައިވަނީ ތ. ތިމަރަފުއްޓަށް ނިސްބަތްވާ 21 އަހަރުގެ ޒުވާނަކާއި، ރ. ކަނދޮޅުދުއަށް ނިސްބަތްވާ 23 އަހަރުގެ ޒުވާނެއްގެ އިތުރުން ގދ. ގައްދޫއަށް ނިސްބަތްވާ 18 އަހަރުގެ ޒުވާނެކެވެ. މި ތިން މީހުންނަކީ ވެސް ދިވެހި ފިރިހެނުންނެވެ.

މި ތިން މީހުންގެ މައްޗަށް ތުހުމަތުކުރަނީ ތޫނު ހަތިޔާރު ބޭނުންކޮށްގެން މާރާމާރީ ހިންގުމާއި، ޖެހުމާއި ހުއްދަ ނޫންގޮތުގައި މީހުން ހިފެހެއްޓުމުގެ ކުށުގެ ތުހުމަތެވެ. ތިން މީހުންގެ ބަންދަށްވެސް ދީފައިވަނީ 5 ދުވަހެވެ.

3 މީހުންނާއި ދެކޮޅަށް ހުށަހަޅާފައިވަނީ ހެކީގެ ތެރޭގައި ކުށް ކުރިކަމަށް ތުހުމަތުކުރެވޭ މިންވަރުގެ ހެކި ގަރީނާ ހުށަހަޅާފައިވެއެވެ. އެގޮތުން އަނިޔާ ލިބުނު ފަރާތުގެ ބަޔާނާއި، އަނިޔާ ލިބުނު ފަރާތުގެ މެޑިކަލް ޑޮކިއުމެންޓްސްއާއި، އަނިޔާ ލިބުނު ފަރާތުގެ ފޮޓޯއާއި، ސީސީޓީވީ ސްނެޕްޝޮޓްތައް ހިމެނެއެވެ.

މި 3 މީހުން ބަންދުކުރުމަށް ނިންމާފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ 16 ވަނަ މާއްދާއަށް އިސްލާހު ގެނައުމުގެ ގާނޫނުގެ 16 ވަނަ މާއްދާގެ (ހ) އަށް ރިއާޔަތްކޮށް ނަމަވެސް، މި 3 މީހުން ވެސް ވަކީލަކު ބޭނުންވާކަމަށް ބުނެފައިވާތީ 5 ދުވަހުގެ މުއްދަތު ދެވިފައިވަނީ ޝަރީއަތްކުރުމާއި ބެހޭ ޖިނާއީ އިޖުރާއަތުގެ ގަވާއިދުގެ 14 ވަނަ މާއްދާއަށް ރިއާޔަތްކޮށެވެ.