ކުރިސްޓިއާނޯ ރޮނާލްޑޯ އަކީ ނަމޫނާ ކުޅުންތެރިއެއް: އަރިގޯ ސާޗީ
ބެލޮންޑޯ އެވޯޑް 4 ފަހަރެއްގެ މަތިން ވަނީ ހޯދާފަ.
ރޮނާލްޑޯ: ޗެމްޕިއަންސް ލީގު ފައިނަލްގައި ގޯލް ޖެހުމަށްފަހު އުފާފާޅު ކުރަނީ.
ކްރިސްޓިއާނޯ ރޮނާލްޑޯއަކީ އޭނާގެ ބުރަ މަސައްކަތުން ބޮޑެތި ކާމިޔާބީތަކެއް ހޯދާ ވިދާލާފައިވާ ކުޅުންތެރިއެއްކަމަށް އިޓަލީގެ ކުރީގެ ކޯޗް އަރިގޯ ސާޗީ ބުނެފިއެވެ.
ސާޗީ ބުނީ ކްރިސްޓިއާނޯ ރޮނާލްޑޯ އަކީ އުފެދުމުގައި މާމޮޅު ހުނަރެއް ލިބިފައިވާ ކުޅުންތެރިއެއް ނޫންކަމަށާއި އޭނާއަށް ލިބިފައިވާ ހުނަރުތަކާއި މޮޅުކަމަކީ އޭނާގެ ބުރަމަސައްކަތުން ހޯދާފައިވާ މޮޅުކަމެއް ކަމަށެވެ.
2005 ވަނަ އަހަރު ރެއާލް މެޑްރިޑުގެ ފުޓްބޯޅަ ޑިރެކްޓަރެއްގެ ގޮތުގައި މަސައްކަތް ކޮށްފައިވާ ސާޗީ ބުނީ ކްރިސްޓިއާނޯ ރޮނާލްޑޯ އަކީ ފުޓްބޯޅައިގައި ކުރިއަށްދާން ބޭނުންވާ ހުރިހާ ކުޅުންތެރިންނަށް ވެސް ނަމޫނާއެއް ކަމަށެވެ.
ސާޗީ ބުނީ ރޮނާލްޑޯ އަކީ ވަރަށް ބުރަކޮށް މަސައްކަތް ކުރާ ކުޅުންތެރިއެއް ކަމަށާއި އެގޮތުން ގިނަ ކާމިޔާބީތައް އަދިވެސް އޭނާ ހޯދާނޭ ކަމަށެވެ. ސާޗީ ބުނީ ރޮނާލްޑޯ ބެހޭގޮތުން އޭނާގެ ކޯޗެއްގެ ގޮތުގައި ކުރިން މަސައްކަތް ކުރި ކާލޯ އެޗެލޮޓީގެފަރާތުން މައުލޫމާތު ލިބިފައިވާ ގޮތުގައި އެހެން ކުޅުންތެރިންނަށްވުރެ ދެ ގަޑިއިރު ނޫނީ ދޮޅު ގަޑިއިރު ކުރިން ރޮނާލްޑޯ ޕްރެކްޓިސްތަކަށް ހާޒިރުވާނެއެވެ. އަދި އެހެން ކުޅުންތެރިންނަށްވުރެ ދެގުނަ އިތުރަށް ރޮނާލްޑޯ ތަމްރީން ހޯދާނެކަމަށްވެސް އެންޗެލޮޓީ ބުނެފައިވާ ކަމުގައި އޭނާ ވަނީ ބުނެފައެވެ.
އޭސީ މިލާނުގެ އިތުރުން އިޓަލީގެ ގައުމީ ޓީމަށްވެސް ކޯޗުކޮށްދީފައިވާ ސާޗީ ބުނީ ފުޓްބޯޅައަކީ ހަމައެނި ހުނަރު ހުރެގެން ކުޅެވޭނެ އެއްޗެއް ނޫންކަން ކްރިސްޓިއާނޯ ރޮނާލްޑޯ ސާބިތުކޮށްދީފައިވާ ކަމަށާއި، ކޮންމެ ދުވަހަކު ކުރާ ބުރަ މަސައްކަތުން މޮޅު ކުޅުންތެރިއަކަށް ވެވިދާނެކަން ރޮނާލްޑޯ ވަނީ މުޅި ދުނިޔެއަށް ހާމަކޮށްދީފައިކަމަށެވެ.
ކްރިސްޓިއާނޯ ރޮނާލްޑޯ އަކީ ރިއާލް މެޑްރިޑްގެ އެޓޭކިން ލައިނުގައި ތަފާތު ދައްކަމުން އަންނަ ކުޅުންތެރިއެއް ކަމަށާއި އަދި މީގެ އިތުރުން ކްރިސްޓިއާނޯ ރޮނާލްޑޯ އަންނަނީ ރިއާލް މެޑްރިޑްގައި މިހާރު ގިނަ ރެކޯޑްތަކެއް ހަދަމުންނެވެ.
ސާޗީ އަކީ 1994 ވަނަ އަހަރު އެމެރިކާގައި ބޭއްވުނު ދުނިޔޭގެ ފުޓްބޯޅަ މުބާރާތުގައި އިޓަލީގެ ގައުމީ ޓީމަށް އިރުޝާދު ދިން ކޯޗެވެ. އޭނާ ވަނީ އެއަހަރު ގެ މުބާރާތުގެ ފައިނަލަށް އިޓަލީ ގެންގޮސްދީފައެވެ. ޔޫއެފާގެ އެންމެ މޮޅު 10 ކޯޗުންގެ ތެރޭގައިވެސް ހިމެނޭ ސާޗީ ވަނީ އިޓަލީގެ މިލާނަށްވެސް ގިނަ ކާމިޔާބީތަކެއް ހޯދައިދީފައެވެ. އެގޮތުން އިޓަލީ ލީގު، އިޓާލިއަނ ސުޕަކަޕް، ޔޫއެފާ ސުޕަކަޕް،އިންޓަ ކޮންޓިނެންޓަލް ކަޕް މިލާނަށް ވަނީ ހޯދައިދީފައެވެ.
ސާޗީ އަކީ އިޓަލީ ފުޓްބޯޅައިގެ ހޯލްއޮފް ފޭމްގެ ލަގަބުވެސް 2011 ވަނަ އަހަރު ލިބިފައިވާ ފަރާތެކެވެ.
