ޔޫރޯ ފުޓުބޯޅަ މުބާރާތުގެ ގަދަ 16 ވަނަ ބުރުގެ މެޗުގައި ނެދަލެންޑްސްގެ ތަފާތަކަށްވީ، މެޗު ފެށުނީއްސުރެ ދައްކަމުން އައި ކުޅުން ކަމަށް އެ ޓީމުގެ ކޯޗު ރޮނާލްޑް ކޫމަން ބުނެފި އެވެ.

ޖަރުމަނުގައި މިހާރު ކުރިއަށްދާ ޔޫރޯ ފުޓުބޯޅަ މުބާރާތުގެ ގަދަ 16 ވަނަ ބުރުގައި ނެދަލެންޑްސް ނިކުތީ ރޮމޭނިއާއާ ދެކޮޅަށެވެ. އެ މެޗު ނެދަލެންޑްސް އިން ކާމިޔާބު ކުރީ 3-0 އިންނެވެ. މެެޗުގައި ނެދަލެންޑްސް އިން ވަނީ މޮޅަށް ކުޅެފަ އެވެ.

އެ މެޗަށްފަހު ނޫސްވެރިންނާ ވާހަކަ ދައްކަމުން ކޫމަން ބުނީ، އެއް މެޗުގައި ތަން ކޮޅެއް ދަަށް ފެންވަރުގެ ކުޅުމެއް ދެއްކުމަށްފަހު، އަނެއް މެޗުގައި މޮޅު ކުޅުމެއް ދެއްކިދާނެ ކަމަށެވެ. އޭނާ ބުނީ، މެޗަކަށްފަހު މެޗެއް ރަނގަޅު ކުރަން މަސައްކަތް ކުރާ ކަމަށާއި، ކުޅުންތެރިންގެ ފަރާތުން ވެސް ފެންނަނީ އެ މަސައްކަތް ކަމަށެވެ.

އެގޮތުން ރޮމޭނިއާއާ ދެކޮޅަށް ކުޅުނު މެޗު ފަށައިގެން ނެދަލެންޑްސް އިން ދިޔައީ މޮޅަށް ކުޅެމުން ކަމަށް އޭނާ ފާހަގަ ކުރި އެވެ. މެޗުގެ އެންމެ ބޮޑު ތަފާތަކަށްވީ ސަބަބަކީ އެއީ ކަމަށާއި، ކުރީ ކޮޅު ލަނޑު ޖަަހައި ލީޑު ނެގުމުން ހަމަޖެހުމެއް ލިބުނު ކަމަށް ވެސް އޭނާ ބުންޏެވެ. އެހެން ނަމަވެސް، އެ ރޫޙުގައި ކުޅުމުން ދިޔަ ނަމަވެސް ދެ ވަނަ ލަނޑެއް ޖެހުމާ ދޭތެރޭގައި ގިނަ ވަގުތު ނެގިކަން ވެސް ފާހަގަ ކުރި އެވެ.

ކޫމަން ބުނީ އަބަދު ވެސް އެންމެ މުހިންމު ކަމަކީ މެޗުގެ ނަތީޖާ ކަމަށެވެ. އެހެން ނަމަވެސް ނެދަލެންޑްސް އަށް ހަމައެކަނި މުހިންމީ މެޗުގެ ނަތީޖާ ނޫން ކަމަށާއި، މެޗުގައި ރަނގަޅު ކުޅުމެއް ދެއްކުމަކީ ވެސް ނެދަލެންޑްސް އިން އިސްކަން ދޭނެ ކަމެއް ކަމަށް ކޫމަން ވަނީ ބުނެފަ އެވެ. މިހާތަނަށް އައިއިރު އޭނާ މަސައްކަތް ކުރަމުން އަންނަނީ ވެސް އެގޮތުގައި ކަމަށް ކޫމަން ބުންޏެވެ.

މީގެ އިތުރުން ކޫމަން ބުނީ، ރޮމޭނިއާއާ ދެކޮޅަށް އޭނާގެ ކުޅުންތެރިން ދެއްކީ އާދަޔާ ޚިލާފު ކުޅުމެއް ކަމަށެވެ. އަދި މުބާރާތުގެ ކުރިއަށް އޮތް މެޗުތަކަށް ބަލާއިރު، އެ ކުޅުން ތަކުރާރު ކުރަން ޖެހޭނެ ކަމަށް ވެސް އޭނާ ބުންޏެވެ. މިހާރު އޮތް ފެންވަރުގައި ހިފަހައްޓަން ޖެހޭނެ ކަމަށާއި، އެއަށްވުރެ ދަށް ވެއްޖެ ނަމަ ނެދަލެންޑްސް އަށް ފައިނަލަށް ނުދެވޭނެ ކަމަށް ވެސް ކޫމަން ވަނީ ބުނެފަ އެވެ.

ނެދަލެންޑްސްގެ ޓީމާ ގުޅޭ ގޮތުން ކޫމަން ބުނީ، އެ ޓީމުގައި ތިބީ ވަރަށް ހުނަރުވެރި އަދި މޮޅެތި ކުޅުންތެރިން ކަމަށެވެ. އެހެން ނަަމަވެސް، ނެދަލެންޑްސްގެ ކުރީގެ ޓީމުތަކާއި، މިހާރުގެ ޓީމާ މީހުން ވަރަށް ބޮޑަށް އަޅާ ކިޔާނެ ކަމަށާއި، އެހެންވެ އަބަދު ވެސް ކަންކަން ރަނގަޅުކޮށް، ކުރިއަރަން މަސައްކަތް ކުރަން ޖެހޭނެ ކަމަށް ކޫމަން ޤަބޫލު ކުރެ އެވެ.

މުބާރާތުގެ ކުއާޓާ ފައިނަލްގައި ނެދަލެންޑްސް ނިކުންނާނީ ތުރުކީއާ ދެކޮޅަށެވެ. މިއީ، 2008 ވަނަ އަހަރުގެ ފަހުން ނެދަލެންޑްސް މުބާރާތުގެ ކުއާޓާ ފައިނަލަށް ދިޔަ ފުރަތަމަ ފަހަރެވެ. އޭގެ ފަހުން 2012 ވަނަ އަހަރު އޮތް މުބާރާތް ނިންމާލީ ގްރޫޕް ސްޓޭޖުންނެވެ. އޭގެ ފަހުން 2016 ވަނަ އަހަރުގެ މުބާރާތް ކޮލިފައިނުވާއިރު، 2021 ވަނަ އަހަރު އޮތް މުބާރާތް ނިންމާލީ ގަދަ 16 ވަނަ ބުރާ ހަމައިންނެވެ.