އެޑިޑާސްގެ އައު ބޫޓު ނަން ހާއްސަ ކުރަނީ ޓޯނީ ކްރޫސްއަށް

ކުޅިވަރު ސާމާނު ވިއްކާ މަޝްހޫރު ކުންފުނި އެޑިޑާސްއިން ނެރޭ އައު ބޫޓުގެ ނަން ޖާމަނީގެ މަޝްހޫރު ފުޓްބޯޅަ ކުޅުންތެރިޔާ ޓޯނީ ކްރޫސް އަށް ހާއްސަ ކުރަން ނިންމައިފި އެވެ.

ސްޕޭން އަތުން ޖާމަނީ ޔޫރޯ ކުއާޓާ ފައިނަލުން ބަލިވުމާއެކު ޓޯނީ ކްރޫސްގެ ފުޓްބޯޅަ ކެރިއަރު ނިމުމަކަށް އައީ އެވެ. އުމުރުން 34 އަހަރުގެ މިޑްފީލްޑަރު ނިންމައިގެން ހުރީ މި މުބާރާތަށް ފަހު ފުޓްބޯޅަ ކުޅުން ހުއްޓާލުމަށެވެ. އޭނާގެ ޝަރަފުގައި އެޑިޑާސްގެ އައު ބޫޓަށް ކިޔަން ނިންމާފައިވަނީ އެޑިޑާސް ޓޯނީ ކްރޫސް ޕްރޯ އެވެ.

ޓޯނީ ކްރޫސް އަކީ ޖަރުމަނުގައި މިހާތަނަށް އުފެދުނު އެންމެ ކާމިޔާބު ކުޅުންތެރިޔާ އެވެ. ސްޕޭނުގެ ރެއާލް މެޑްރިޑާއި ޖަރުމަނުގެ ބަޔާން މިއުނިކަށް ކުޅުނު މިޑްފީލްޑަރު ވަނީ އޭނާގެ ކެރިއަރުގައި މިހާތަނަށް 34 ތަށި ހާސިލްކޮށްފަ އެވެ. އޭގެ ތެރޭގައި 2014 ވަނަ އަހަރުގެ ވޯލްޑްކަޕާއި ޔޫރަޕުގެ އެންމެ ޝަރަފުވެރި ކުލަބު މުބާރާތް ކަމަށްވާ ޗެމްޕިއަންސް ލީގު ހަ ފަހަރު އަދި ޖަރުމަނު ލީގާއި ކުލަބު ވޯލްޑްކަޕާއި ސްޕެނިޝް ލީގު ހިމެނެ އެވެ.

ކްރޫސް އާއި އޭނާގެ އަންހެނުންނަކީ ކުޅިވަރުގެ އެހެން އެތްލީޓުން ފަދައިން އެޑިޑާސްގެ ބޫޓުތައް އަބަދުވެސް އިހްތިޔާރުކުރާ ބައެކެވެ. ނަމަވެސް ގިނަ ކުޅުންތެރިންނާ ހިލާފަށް އެޑިޑާސްއިން ކްރޫސް އަށް ތައްޔާރުކޮށްދެނީ ކޮންމެ ވައްތަލަކުން ހުދު ކުލައިގެ ބޫޓެކެވެ. އެޑިޑާސް ކުންފުނިން ބުނީ ކްރޫސް ހުދު ކުލައިގެ ބޫޓަށް އަރަން ނިންމީ ޖަރުމަނާއި ރެއާލް މެޑްރިޑަކީ ވެސް ހުދު ކުލައިގައި ކުޅޭ ދެ ޓީމަށްވުމުން ކަމަށެވެ.

ކްރޫސް ނިންމާފައިވަނީ ކުޅުން ހުއްޓާލުމަށްފަހު ސްޕޭންގައި ދިރިއުޅުމަށެވެ.