ޔޫރޯ ފުޓްބޯޅަ މުބާރާތުގައި ޖަރުމަނާއި ސްޕޭން ކުޅުނު މެޗު އަލުން ކުޅެން ޔޫއޭފާއަށް ހުށަހަޅަން ޖަރުމަނުގެ ސަޕޯޓަރުން ފެޓިޝަނެއް ހަދަން ފަށައިފި އެވެ.

ޖަރުމަނު ސަޕޯޓަރުން ހުށަހަޅާ މައްސަލައަކީ މެޗުގެ އިތުރު ވަގުތުގައި ޖަމާލް މުސިއާލާ ފޮނުވާލި ބޯޅަ ސްޕޭންގެ ޑިފެންޑް މާކް ކުކުރޭޔާގެ އަތުގައި ޖެހުމުން ޕެނަލްޓީ ނުދިން މައްސަލަ އެވެ. އިނގިރޭސި ރެފްރީ އެންތަނީ ޓެއިލާ މި ބޯޅަ އަށް ޕެނަލްޓީ ނުދިނުމުން ޖަރުމަނުގެ އެއްތައް ބަޔަކު ވަނީ މިކަން ގަބޫލުނުކޮށްފަ އެވެ.

މި ޕެޓިޝަން ހެދި ނަމަވެސް މެޗު އަލުން ކުޅޭނެ ކަމުގެ މާބޮޑު އުއްމީދެއް ނެތެވެ. ނަމަވެސް ޖަރުމަނުގެ ސަޕޯޓަރުން ބުނަނީ މިފަދަ ކަންކަމަކީ ޔޫއޭފާއަށް އެހާ ފަސޭހައިން ހަމަޖައްސާލެވޭނެ ކަންކަމަށް ހަދައިގެން ނުވާނެ ކަމަށެވެ. މިހެންވެ ޕެޓިޝަން ހަދަނީ މި މައްސަލަ ރަސްމީކޮށް ފައިލްކުރުމަށް ކަމަށެވެ. ޕެޓިޝަނުގައި ބުނެފައިވަނީ ކުކުރޭޔާގެ އަތުގައި ޖެހުނު ބޯޅަ އަކީ ދުވާޅުގެ އަލި ފަދައިން ޝައްކެތްނެތް ކަމެއް ކަމަށާއި އެ ޕެނަލްޓީ އަކީ ދޭންޖެހޭ އެއްޗެއް ކަމަށެވެ. އަދި މިކަން ރެފްރީ އާއި ޔޫއޭފާއިން ޖާމަނީގެ ސަޕޯޓަރުންނަށް ސާފުކޮށް ކިޔައިދޭން ޖެހޭ ކަމަށެވެ. ރެފްރީންގެ ނިންމުން ގޯސްނަމަ އެންމެ ރަނގަޅު ގޮތަކީ މެޗު އަލުން ކުޅުން ކަމަށެވެ.

މި މެޗަށް ފަހު ސަޕޯޓަރުން ވަނީ އެންތަނީ ޓެއިލާ އާއި އޭނާއާއެކު މެޗަށް އިންސާފުކުރި ރެފްރީންގެ ޓީމާ ދިމާކޮށްލައިފަ އެވެ. މި ގޮތުން ރެފްރީންގެ ޓީމު ދަނޑުން ނުކުތް ވަގުތު ސަޕޯޓަރުން އެ ސަރަހައްދަށް އެއްވި އެވެ. އަދި ޖަރުމަނުގެ ބައެއް ނޫސްވެރިން ވެސް ވަނީ ރެފްރީއާ ސުވާޅުކުރަން މަސައްކަތް ކޮށްފަ އެވެ.

ޖަރުމަނުގައި ބާއްވާ ޔޫރޯގައި އެ ގައުމު ކުއާޓާ ފައިނަލާ ހިސާބުން ކެޓުމުން ވަރަށް ގިނަ ބަޔަކު ވަނީ މާޔޫސްވެފަ އެވެ. މި ފަހަރުގެ ޔޫރޯ ފެށިއިރު ޖަރުމަނުގައި ފޯރި އެހާ ގަދައެއްނޫނެވެ. ސަބަބަކީ 2014ގެ ފަހުން ޖަރުމަނަށް ބޮޑު މުބާރާތެއްގެ ތައްޓެއް ލިބިފައިނުވުމެވެ.