ޔުއެފާ ނޭޝަންސް ލީގުގައި ނެދަލެންޑްސް އިން ހަންގޭރީއާ ދެކޮޅަށް ކުޅުނު މެޗުގައި އެ ޓީމުގެ ކެޕްޓަން ވާޖިލް ވެން ޑައިކަށް ދެއްކި ފުރަތަމަ ރީނދޫ ކާޑާ އެކު، ހައިރާންކަމެއް ލިބުނު ކަމަށް އެ ޓީމުގެ ކޯޗު ރޮނާލްޑް ކޫމަން ބުނެފި އެވެ.

މެޗުގައި ވެން ޑައިކަށް ރަތް ކާޑު ދެއްކީ ދެ ވަނަ ހާފުގަ އެވެ. އެއީ ފުރަތަމަ ރީނދޫ ކާޑު ދެއްކުމަށްފަހު، ދެ ވަނަ ރީނދޫ ކާޑާ އެކު ރަތް ކާޑު ދައްކައިގެންނެވެ. މެޗުގެ 77 ވަނަ މިނެޓުގައި ވެން ޑައިކަށް ވަނީ ރީނދޫ ކާޑު ދައްކައިފަ އެވެ. އެއީ ހަންގޭރީގެ އަޓިލާ ފިއޯލާ އަށް ރީނދޫ ކާޑު ދެއްކުމުން، އެކަމާ ރެފްރީއާ ދެމެދު ހިނގައިދިޔަ ދެބަސްވުމުގައި ދެއްކި ރީނދޫ ކާޑެކެވެ. އޭގެ ތިން މިނެޓު ފަހުން ދެ ވަނަ ރީނދޫ ކާޑެއް ދެއްކީ އޭނާ ކުރި ފައުލަކާ ގުޅިގެންނެވެ.

އެކަމާ ގުޅޭ ގޮތުން ވާހަކަ ދައްކަމުން ކޫމަން ބުނީ ޑޮންޔެލް މާލެން އަށް ހަންގޭރީ ކުޅުންތެރިޔަކު ފައުލް ކުރި ވަގުތު، އެކަމާ ހިތްހަމަ ނުޖެހިގެން ވެން ޑައިކް ވާހަކަ ދެއްކުމުން އޭނާ އަށް ރީނދޫ ކާޑު ދެއްކުމަކީ ހައިރާންވާ ކަމެއް ކަމަށެވެ. އެވަގުތުގައި ވަރަށް ބޮޑު މާޔޫސްކަމެއް ލިބުނުކަން ފާހަގަކޮށް ކޫމަން ބުނީ، ޓީމުގެ ކެޕްޓަނަށް ރެފްރީއާ ވާހަކަ ދައްކައި، މައްސަލަ ޖެއްސޭނެ ކަމަށް ޤަބޫލުކޮށްގެން އެންމެން ވެސް ތިބި ކަމަށެވެ.

ކޫމަން ބުނީ ހަންގޭރީގެ ކުޅުންތެރިޔާ މާލެން އަށް ކުރި ފައުލަކީ ރަތް ކާޑު ދައްކަން ޖެހޭ ވަރުގެ ފައުލެއް ކަމަށް ޤަބޫލު ކުރެވޭ ކަމަށެވެ. ސަބަބަކީ ބޯޅަ އަށް ކުޅުމުގެ އެއްވެސް ވިސްނުމެއް އޭނާގެ ނެތް ފަދަ ގޮތަކަށް އެ ވަގުތު ފައުލް ކުރުމުން ކަމަށެވެ. އޭގެ ފަހުން ވެން ޑައިކަށް ދެ ވަނަ ރީނދޫ ކާޑެއް ދެއްކިއިރު، އެކަމާ ދެކޮޅު ހެދެން ނެތް ކަމަށާއި، އެކަން ވެން ޑައިކަށް ވެސް އިނގޭނެ ކަމުގައި ކޫމަން ބުންޏެވެ.

ޔުއެފާ ނޭޝަންސް ލީގުގައި ނެދަލެންޑްސް އިން ދެން ނިކުންނާނީ ގްރޫޕް ތިނެއްގެ އެއް ވަަނައިގައި އޮތް ޖަރުމަނާ ދެކޮޅަށެވެ. ހަންގޭރީ މެޗުގައި ދެއްކި ރަތް ކާޑުގެ ސަބަބުން، ޖަރުމަނު މެޗުގައި ކެޕްޓަން ވެން ޑައިކަށް ނުކުޅެވޭނެ އެވެ. އޭނާ އަށް ރަތް ކާޑު ސަސްޕެންޝަނެއް ކުރިމަތިވީއިރު، އޭނާގެ ބަދަލުގައި އެ މެޗުގެ ސްކޮޑަށް އެހެން ކުޅުންތެރިޔަކު ނުނަގާނެ ކަމަށް ވެސް ކޫމަން ވަނީ ބުނެފަ އެވެ.