ސްޕެއިން ޖޯޖިއާ އަށް ފުރިހަމަ އަށް އިޙުތިރާމް ކުރާނެ ކަމަށް، އެ ޓީމުގެ ކޯޗު ލުއިސް ޑެ ލާ ފުއެންޓޭ ބުނެފި އެވެ.

އޭނާ މިހެން ބުނީ، މުބާރާތުގެ ގަދަ 16 ވަނަ ބުރުގައި ޖޯޖިއާއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ސްޕެއިން އަކީ މިއަހަރުގެ މުބާރާތުގައި އެންމެ ރަނގަޅު ނަތީޖާއެއް ނެރެފައިވާ އެއް ޓީމެވެ. ގަދަ 16 ވަނަ ބުރުން ސްޕެެއިން ޖާގަ ހޯދީ، ގްރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެގެންނެވެ.

އަނެއްކޮޅުން ޖޯޖިއާ އިން ވަނީ މުބާރާތުގައި ހައިރާން ކުރުވަނިވި ނަތީޖާއެއް ނެރެފަ އެވެ. އަލަށް މުބާރާތުގައި ވާދަކުރާ ޖޯޖިއާ އިން ގަދަ 16 ވަނަ ބުރުގެ ޖާގައެއް ހޯދީ، ގްރޫޕް ސްޓޭޖުގެ ފަހު މެޗުގައި ޕޯޗުގަލްގެ މައްޗަށް ކުރި ހޯދައިގެންނެވެ. ގްރޫޕް އެފްގެ ތިން ވަނަ އަށް އެ ޓީމު ދިޔައިރު، ގަދަ 16 އިން ޖާގަ ލިބުނީ އެންމެ ރަނގަޅު ނަތީޖާއެއް ނެރޭ ތިން ވަނަ ޓީމުގެ ތެރޭގައި ހިމެނިގެންނެވެ.

ޖޯޖިއާ މެޗުގެ ކުރިން ވާހަކަ ދައްކަމުން ފުއެންޓޭ ބުނީ، ސްޕެއިން ކުޅެން ޖެހޭ ޓީމަކީ ޔޫރޯ ގައި ވަރަށް ރަނގަޅު ކުޅުމެއް ދައްކާފައިވާ ޓީމެއް ކަމަށެވެ. ޚާއްސަކޮށް އެ ޓީމުން ވަނީ ޕޯޗުގަލާ ދެކޮޅަށް ވަރަށް ފުރިހަމަ ކުޅުމެއް ދައްކާފައިކަން އޭނާ ފާހަގަ ކުރި އެވެ. އެހެންކަމުން، ސްޕެއިން އިން ޖޯޖިއާ އަށް ފުރިހަމަ އަށް އިޙުތިރާާމް ކުރާނެ ކަމުގައި ވެސް އޭނާ ވަނީ ބުނެފަ އެވެ. ޖޯޖިއާގެ ކުޅުމުން ދައްކައިދެނީ، އެ ޓީމު ކުރިއަށް ގޮސްފައިވާ މިންވަރު ކަަމަށް ވެސް ފުއެންޓޭ ވަނީ ބުނެފަ އެވެ.

މެޗުގައި ސްޕެއިން އިން ކުރަން ޖެހޭ ކަމަކީ، އެމީހުން މީގެ ކުރިން ވެސް ކުރަމުން އައި ކަންތައް ކަމަށް އޭނާ ދެކެ އެވެ. އެއީ ސްޕެއިންގެ އެންމެ މޮޅު ކުޅުން ދެއްކުން ކަމަށާއި، މެޗަށް ސަމާލުކަން ދިނުން ކަމަށް ވެސް އޭނާ ބުންޏެވެ. ޖޯޖިއާއާ ދެކޮޅަށް ނިކުންނައިރު، ސްޕެއިން އިން ގިނަ ކަންކަން ރަނގަޅު ކޮށްފައިވާނެ ކަމަށާއި، ކުޅުންތެރިންނާ މެދު އޭނާގެ އިތުބާރު އޮންނާނެ ކަމުގައި ވެސް ފުއެންޓޭ ބުންޏެވެ.

ސްޕެއިން އިން ޖޯޖިއާއާ ދެކޮޅަށް ނިކުންނާނީ އާދިއްތަ ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.