މުޅި ޓީމު އޮތީ ފުރިހަމައަށް ތައްޔާރުވެފައި، އަމާޒަކީ ތިން ޕޮއިންޓު ހޯދުން:ޗެތުރީ

މުޅި ޓީމު އޮތީ އަންގާރަ ދުވަހުގެ މެޗަށް ފުރިހަމައަށް ތައްޔާރުވެފައި ކަމަށް ބެންގަލޫރު އެފްސީގެ ކެޕްޓަން އަދި އިންޑިއާގެ ގައުމީ ޓީމުގެ ކެޕްޓަން ސުނިލް ޗެތުރީ ބުނެފިއެވެ.

ސުނިލް ޗެތުރީ މިހެން ބުނެފައިވަނީ މާޒިޔާ އާއި ދެކޮޅަށް އޭއެފްސީ ކަޕްގެ ގުރޫޕް ސްޓޭޖުގައި ކުޅުމަށް ރާއްޖެ އައިސް ވެލާނާ އިންޓަނޭޝަނަލް އެއާޕޯޓުގައި ރާއްޖެ އެމްވީ އަށް ދެއްވި އެކްސްކްލޫސިވް އިންޓަވިއުއެއްގަ އެވެ. ސުނިލް ޗެތުރީ ބުނެފައިވަނީ، މުޅި ޓީމު އޮތީ ފުރިހަމައަށް ތައްޔާރުވެފައި ކަމަށާ، ޓީމުގައި ތިބި ގައުމީ ޓީމުގެ ހަތް ކުޅުންތެރިންވެސް ދެ ދުވަސް ކުރިން ޓީމާއި ގުޅި ހުރިހާ ތައްޔާރީތަކެށް ވެފައި ވާކަމަށެވެ. މުބާރާތުގެ ގުރޫޕު ސްޓޭޖުގެ ފުރަތަމަ މެޗުން ތިން ޕޮއިންޓް ހޯދާފައިވުމުން ދެން ބޭނުންވަނީ މާޒިޔާ ބަލިކޮށް ގުރޫޕުގެ ކުރި ހޯދަން ކަމަށް ސުނިލް ޗެތުރީ ވަނީ ބުނެފަ އެވެ.

ޗެތްރީ ބުނީ، ގުރޫޕު ސްޓޭޖުގައި މާޒިޔާ އާއި ޑާކާ އަބަހާނީ ލިމިޓެޑް ބައްދަލުކުރި މެޗް ބެލި ކަމަށާ، މާޒިޔާ އަކީ ފެންވަރު ރަނގަޅު ވަރުގަދަ ޓީމެއް ކަމަށެވެ. މީގެ އިތުރަށްވެސް ޗެތްރީ ބުނީ، މާޒިޔާގައި މޮޅެތި ލޯކަލް ޕްލެޔަރުންނާއި ބިދޭސީ ކުޅުންތެރިން އެބަ ތިބި ކަމަށާ އެހެންކަމުން އަންގާރަ ދުވަހުގެ މެޗް އެއްގޮތަކަށްވެސް ފަސޭހަ ނުވާނެ ކަމަށެވެ.

ރާއްޖޭގެ ފުޓުބޯޅައާއި ބެހޭ ގޮތުން ވާހަކަ ދައްކަމުން ޗެތުރީ ބުނީ ރާއްޖެއަކީ ފުޓުބޯޅާގައި އަބަދުވެސް އިންޑިއާ އާއި ވާދަވެރި ގައުމެށް ކަމަށާ، ރާއްޖެއާއި ދެކޮޅަށް ކުޅޭ ކޮންމެ މެޗަކީވެސް އިންޑިއާ އަށް ޕްރެޝަރު ބޮޑު އުނދަގޫ މެޗުތަކެށް ކަމަށެވެ. ރާއްޖޭގައި ކުރިއަރަމުން އަންނަ ރަނގަޅު ކުލަބުތަށް އެބަހުރި ކަމަށް ބުނެ ޗެތުރީ ވަނީ ދިވެހި ފުޓުބޯޅައަށް ތައުރީފް ކޮށްފައެވެ. ޗެތުރީ ބުނީ އޭނާ އަބަދުވެސް ދިވެހި ފުޓުބޯޅަ އަށާއި ދިވެހި ގައުމީ ޓީމަށް ރަނގަޅު ކާމިޔާބީތައްވުން އެދޭކަމަށެވެ.

އިންޑިއާގެ ގައުމީ ޓީމާއި ބެންގަލޫރު އެފްސީގެ ވެސް ކެޕްޓަން ކަމުގެ މަގާމު މިވަގުތު އަދާކު ކުރަމުންދާ ޗެތުރީއަކީ އިންޑިއާގައި އުފެދުނު އެންމެ ހުނަރުވެރި އެއް ފުޓުބޯޅަ ކުޅުންތެރިޔާ އެވެ. ބައިޗަން ބުޓިއާއައްފަހު އިންޑިއާގައި އުފެދުނު އެންމެ މޮޅު ކުޅުންތެރިޔާގެ ގޮތުގައި ގިނަބަޔަކު ގަބޫލުކުރާ ޗެތުރީ ވަނީ ދާދިފަހުން، ގައުމީ ޓީމަށް ކުޅުން ހުއްޓާލަން އުޅޭކަމުގެ އިޝާރާތެށް ދީފައެވެ.