އިޒްރޭލުން ލުބްނާން އާ ދެކޮޅަށް ހަނގުރާމަ ފަށައިފިނަމަ ހިޒްބުﷲ އާ ގުޅިގެން އިޒްރޭލަށް ހަމަލާ ދިނުމުގައި ބައިވެރިވާނެ ކަމަށް އިރާގުގެ ސައްޔިދު އަލް-ޝުހަދާ ބްރިގޭޑްސް އިން ބުނެފިއެވެ.
އިރާގުގެ އަލް-ޝުހަދާ ބްރިގޭޑްސްގެ ފަރާތުން އެ ޖަމާއަތުގެ އަމީން އާއްމު އަބޫ އާލާ އަލް-ވަލީ ހޯމަ ދުވަހު ބުނީ ޔަހޫދީ ދައުލަތުން ލުބުނާނަށް ހަމަލާ ދީފިނަމަ އެ ހަމަލާ އަކަށް ރައްދު ދިނުމުގައި އެ ޖަމާއަތުން ބައިވެރިވުމުން ޖިއޮގްރަފީ ގޮތުން ހުރި ހުރަސްތައް ނައްތާލެވޭނެ ކަމަށެވެ.
ޝުހަދާ ބްރިގޭޑްސް އަކީ އިރާގުގެ ހަނގުރާމަވެރި ގްރޫޕްތައް އެކުލެވޭ އިސްލާމިކް ރެސިސްޓެންސް ގެ ކޯލިޝަން ގައި ބައިވެރިވާ ޖަމާއަތެކެވެ.
އޭނާ ބުނި ގޮތުގައި އިރާގުގެ ހަނގުރާމަވެރިން އިޒްރޭލުން ހިފާފައިފައިވާ ބިންތަކުގައި ހުރި އިޒްރޭލުގެ މުހިންމު މަރުކަޒުތަކަށް އެންމެ 800 މީޓަރުގެ ދުރުމިނުން މިހާރުވެސް ހަމަލާ ދޭ ކަމަށެވެ.
އިރާގުގެ ހަނގުރާމަވެރި ޖަމާއަތްތައް އެކުލެވޭ އިސްލާމިކް ރެސިސްޓެންސް އިން އިޒްރޭލުން ހިފާފައިވާ ބިންތަކުގައި ތިބި އިޒްރޭލް ސިފައިންނަށާއި އިޒްރޭލުގެ މުހިންމު މަރުކަޒް ތަކަށް އޮކްޓޯބަރު 7 ގައި އިޒްރޭލުން ގާޒާ އަށް އަރާ ހިންގާ އުދުވާނު ތަކާ ދެކޮޅަށް އަންނަނީ ހަމަލާތައް ދެމުންކަން ފާހަގަ ކުރެވެއެވެ.
ހިޒްބުﷲ ގެ ވެރިޔާ ހަސަން ނަސްރުﷲ ބުނެފައިވަނީ އިޒްރޭލުން ލުބުނާން އާ ދެކޮޅަށް ހަނގުރާމަ ފަށައިފިނަމަ އިޒްރޭލުގައި ސަލާމަތުން ހުރި އެއްވެސް ތަނެއް ނުބަހައްޓާނެ ކަމަށެވެ.
